HLAHAI HLA 1 - Pathien Lekhabu Inthieng (BSI)

Mo le Jerusalem naunuhai

¹ Hlahai hla, Solomon ta chu.

Hla pakhatna Nunghâk

² A baua fâwpnahai chun mi hung fâwp sien; I hmangaina chu uoin nêk chun a ṭha lem sih a.

³ I hriekhai chun rim inhnikna tak a nei a; I hming chu hriek bun suok ang a nih; Chuleichun, nunghâkhaiin an hmangai che a nih.

⁴ Mi hîp la, i hnungah hung tlân kan tih: Lal chun a pindanhaia chun a mi ṭhuoi a; Nangmaa chun hlimin lâwm kan tih; Uoin nêk chun i hming chu hung hril lem kan ta; An hmangai takzet che a nih.

⁵ Ka hâng a, nisienlakhawm, ngaino ka bei, Aw nangni Jerusalem naunuhai, Kedar puon inhai ang le, Solomon puonzârhai ang el chun.

⁶ Ka hâng êm leiin kei mîn sit naw unla, Nisa chun a mi em duk leiin. Ka nu naupasalhai chu ka chungah an lunginsen a, Grêp huon enkawltuah an mi siem a; Keima grêp huon ruok chu ka enkawl nawh.

⁷ Aw nang ka thlain a ihmangai, mi hril rawh, I ran ruol chu khâwlai am în tlattir a, sûn huna chun khâwlai am în châwltirna; I pâwlhai ran ruol sîra chun, Iengdinga invâk invâk ding am ka na? Tlangvâl

⁸ Aw nang nuhmeihai laia hmêlṭha tak, i hriet naw a ni chun, Ran ruolhai kehnunga chun i lampui chu zui suok la, I kêltehai chu berâmpu puon in kâwla chun intlattir rawh.

Mo le moneitu chu

⁹ Aw ka hmangai, Pharao sakawr tawlailîra, Sakawr lâ le chun ka hrilkhi cheh a.

¹⁰ I bienghai chu samphier le chun ngaino an bei hle a, I rînga lunghlu ṭhihruihai le chun.

¹¹ Rângkachak ṭhi hrui, Tangkaraw sûngphûm nei siempêk kan ti che. Nunghâk

¹² Lal chu a ṭhungnaa a ṭhung lai chun, Ka spiknard chun a riminhnik a tirsuok a.

¹³ Ka hmangaitak chu ka ta ding chun murra bâwm ang a na, Ka âwmhai inkâra um ang hi.

¹⁴ Ka hmangaitak chu ka ta dingin henna pârbâwr, En-gedi grêp huona ang chu a nih. Tlangvâl

¹⁵ Ngai ta, ka hmangai, i hmêl a ṭha, ngai ta, i hmêl a ṭha, I mithai chu vaṭhu mit ang a nih. Nunghâk

¹⁶ Ngai ta,i hmêl a ṭha, ka hmangai, anih, lung sukâwi; Ei khum khawm a hring a.

¹⁷ Ei in tlungpûmhai chu sidar thing an na, Ei insunhai chu fâr thing an nih.