HEBRAIHAI 7 - Pathien Lekhabu Inthieng (BSI)

Melkizedek Thiempu nina

¹ Chu Melkizedek chu Salem lal, Pathien Chunghnungtak Thiem- pu, Abraham lalhai thata a hung tieng lo tuoka malsâwmtu a nih.

² Ama chu Abrahamin iengkim sâwma pakhat a pêk a. A hming umzie chu a hmasatakah Felna Lal a na, a dawtah Salem lal a ni bawk a, chu chu Remna Lal tina a nih.

³ Ama chu pa nei loin, nu nei loin, chi thlatuhai chanchin nei loin, um ṭanna nei loin, hring tâwp khawm nei chuong loin, Pathien Naupa anga siema umin, Thiempuah a um zing a nih.

⁴ Chuongchun, chi thlatu Abra- hamin a râllâk ṭha po sâwma pakhat a ipêk chu, chu mihriem ropuizie chu ngaituo ta u.

⁵ Levi thlahai laia thiempu sin chang taphawt chun Dân thu angin mihai kuoma inthawkin sâwma pakhat lâkna thu an hmu ngei a nih, chu chu an unauhaia inthawkin a nih; chuonghai chu Abraham ṭhalbea insieng ni hai sien khawm;

⁶ amiruokchu, anni laia thlatuhai sui sa ve naw khan Abrahama inthawk- in sâwma pakhat a lâk a, thutiemhai vawngtu chu mal a sâwm ta sih a.

⁷ Nisienlakhawm, sêl ruol loin a chîn lem chu a lien lem malsâwm pêkin a um hlak.

⁸ Chun, hitaka hin mihriem thi hlakhai hin sâwma pakhat an hmu hlak a, chutaka ruok chun, “a hring zing,” tia a thu an inhriettir chun a hmu a nih.

⁹ Chun, Levi sâwma pakhat la hlaktu hmanin, Abraham kuta khan sâwma pakhat a pêk tah, ti thei a nih;

¹⁰ Melkizedekin a lo tuok lai khan a pa ṭhâlbeah a la um sih a.

¹¹ Chuongchun, Levihai thiempu nîna leia famkimna hmu thei a ni chun (chu hnuoia chun mihaiin Dân thu an lo hmu sih a), Aron um dân anga ruot loin, Melkizedek um dân anga thiempu dang hung um hi ieng am a ngai na?

¹² Thiempu nîna chu a hung danglam ta leiin Dân thu chu suk- danglam ve a hung ngai ta hrim a nih.

¹³ Hieng a thu an ihril hi hnam dang mi a ni sih a, chu hnam laia mi chu tûkhawm mâichâmah an châng ngai nawh.

¹⁴ Ei Lalpa chu Juda hnam laia inthawka hung suok a ni ti ân lang fel sih a, chu hnam thua chun Mosiein thiempuhai kawng thu iengkhawm a hril nawh.

¹⁵ Chun, ei thu hril kha nasatakin chieng nâwkzuol a tih: Melkizedek anga thiempu dang,

¹⁶ tisa thupêk Dân thu anga siem mi ni lo, hring tâwp nei lo, thilthaw- theina anga siem lem mi, a hung um ding chun:

¹⁷ “Nang chu Melkizedek um dân anga, Chatuon thiempu i nih ie,” ti inhriettir a ni sih a.

¹⁸ A hrât naw le a ṭhathnem nawna leiin thupêk um hmasa chu peiin a um a.

¹⁹ Dân thu chun iengkhawm a sukfamkim si nawh. Beiseina ṭha lem lâk lûta hung um hin Pathien a mîn hnaitir lem a nih.

²⁰ Chun, inkhâm naw a ni naw leiin, anni chu inkhâm loa thiempua siem an ni sih a,

²¹ ama ruok chun, “ ‘Nang chu chatuona Thiempu i nih,’ tiin Lalpa ân khâm a, inkîr nâwk ta naw ni,” tia hriltu kut khan (inkhâma Thiem- pua siem a ni lem),

²² chuong ang bawka nasa chun Isu chu thuthlung ṭha lem sukdet- puitu a hung ni tah a.

²³ Chun, anni ruok chu thi leia um sawng thei an ni naw leiin, thiempua siem an tam ngei a;

²⁴ ama ruok chu chatuona a um zing leiin a Thiempu nina chu thleng thei ruol loin a nei ta lem a nih.

²⁵ Chuongchun, amaa Pathien kuoma hunghai chu a tâwp khâwk chenin a sandam thei bawk a nih; anni ṭawngṭai pêk dingin chatuona a hring zing leiin.

²⁶ Chuong ang, Thiempu Laltak, mi inthieng, sawisêlbo, inthieng naw- na kai lo, mi suolhai laia inthawka a tuma um, vânhai nêka chunghnung lema siem ta chu ei ta dingin a âwm hrim sih a.

²⁷ Chuong thiempu lalhai chun ni tin mâni suolna leiin inthawina an inhlân hmasa zet a, chu hnungah mihai suolna leiin an inhlân nâwk a. Chuong chu ama ta ding chun a ngai nawh, ama le ama ân hlân fâwm lai khan ṭum khatah a lo suktlingtla ta leiin.

²⁸ Dân thu chun mihriem hrât nawna neihai chu, Thiempu Laltakah a ruot hlak a; inkhâm thu, Dân thu hnunga hung um ruok chun, Naupa chatuona dinga sukfamkim ta chu a ruot lem a nih.