HEBRAIHAI 5 - Pathien Lekhabu Inthieng (BSI)

¹ Thiempu Laltak taphawt, suolna- hai leia thilpêk le inthâwina ân hlân kawp theina dingin, mihriem laia inthawka lâk tuma lo umin, Pathien tieng thilhaia chun mihriem- hai ta dingin ruot an ni hlak sih a.

² Chuonghai chun iengkhawm hre nawhai le lampui inhmanghai chungah zai an daw thei hlak a nih, anni ngei khawm hrât nawna inhuol vêla an um bawk leiin.

³ Chun, chu lei chun, mihai ta dinga an inhlânpêk angin, anni ta ding ngei khawmin suolhai leiin in- hlân ve naw thei an ni nawh.

⁴ Chun, tûkhawmin chu chawi- mawina chu mâni ta dingin an inbel ngai nawh. Aron anga Pathien iko an ni naw chun.

⁵ Chuong ang bawkin Krista khawm chu Thiempu Laltaka siem dingin mâni ân sukropui nawh a, “Nang chu ka Naupa i na, Vawisûn hin ka nei che a nih,” tia hriltu khan a sukropui ta lem a nih;

⁶ “Nang chu Melkizedek um dân anga Chatuon Thiempu i nih,” tia hmun danga a hril ang khan.

⁷ Ama chun a tisa put lai nihaia khan thinaa inthawka ama sandam theitu kuoma khan nasataka khêk le mitthli tla puma ṭawngṭainahai le hninahai ân hlân a, a ṭi dêk leiin ngaiin a um a,

⁸ Naupa rau ni sienla khawm a thil tuorhaia chun thu âwi ân chûk tah a nih;

⁹ chuongchun, sukṭhat famkima hung umin a thu awi po pohai ta dingin chatuona sandamna bulpui a hung ni tah a,

¹⁰ Melkizedek um dân anga Thiempu Laltakah Pathienin ân bûk tah a.

Tlûkna kawnga vau lâwkna

¹¹ Chu mi chanchina chun hril ding tamtak kan nei a, hrilfie khawm ân tak, in na a lo sêt ta leiin.

¹² A hun ngaituo chun inchûktirtu ni rau ta âwm in nia chu, Pathien thu inchûktirna bulhai chu inchûktir in ngai nâwk tah a; bu rum ni loa, nênetui la ngai mi ang in hung ni nâwk ta hi.

¹³ Nênetui ring taphawt chun felna thua chun hrietna an nei nawh a, nautê an la ni leiin.

¹⁴ Bu rum ruok chu puitlinghai ta dingin a nih, chuonghai chun asie aṭha hrefie dingin an hriettheina chu hmangin an sâwizawi tah.