HEBRAIHAI 10 - Pathien Lekhabu Inthieng (BSI)

Krista inthâwina chunghnung lemna chu

¹ Dân thu chun thil ṭha hung um dinghai angpui nei loin, a hlim chau a nei leiin, kum tina inthâwina pângngai an inhlân rawphai chun, a hung hnaihai chu iengtika khawm sukfamkim thei si naw ni a.

² Chuong chu ni naw sien chu a betuhai chu vawi khata sukthieng nghâla umin suolhai inhrietna nei ta naw nihai a, inhlân chu an ma dai ta naw ding am a nih?

³ Nisienlakhawm, chuong inthâwi- naa chun kum tinin suolhai hriet nâwkna a hung um rawp lem a nih.

⁴ Bâwngchalhai le kêlhai thisen chun suolhai sukbo thei ruol a ni si nawh a.

⁵ Chuongchun, khawvêla a hung lût laiin: “Inthawina le thil inhlân i dit nawh a, Ka ta dingin taksa i mi buotsai pêk lem a;

⁶ Pumrâwhmanga inthâwinahaia le, Suol ta dinga inthâwinahaia chun Lâwmna hrim i nei nawh.

⁷ Chu phingle chun keiin, ‘Aw Pathien, ngai ta, (Lekhabu zuola chun ka thu ziek a nih), I dit zâwng thaw dingin ka hung,’ ka tih a,” a ta,

⁸ A saka khin, “Inthawina dâm, thil inhlân dâm, pumrâwhmanga inthâwina dâm, suol ta dinga in- thâwina dâm i dit nawh a, chuonga chun lâwmna i nei bawk nawh,” a tih a. (Chuonghai chu dân thu anga inhlân a nih).

⁹ Chu phingle chun, “Ngai ta, I dit zâwng thaw dingin ka hung,” a lo ti tah a. A pahnina hi ân tungding theina dingin a hmasa chu a sukbo ta a nih.

¹⁰ Chu chu dit zâwng chun, Isu Krista taksa vawi khata hlân nghâl lei khan sukthiengin ei um tah.

¹¹ Chun, thiempu tinrêngin kâwla nisa suok tiema rawng bâwlin suolhai iengtik lai khawma sukbo thei naw inthâwina pângngai inhlân rawpin an ngîr hlak;

¹² ama ruok hi chu, chatuona dingin suolhai ta dinga inthâwina ṭum khat chau ân hlân hnungin, Pathien changtieng a hang ṭhung ta lem a.

¹³ Chu chena inthawk chu, a hmêlmahai a kepha innghatnaa siem an ni hmakhat chu a nghâk zing a.

¹⁴ Thil inhlân ṭum khat chauin sukthieng tahai chu chatuona dingin a sukfamkim ta sih a.

¹⁵ Chun, Thlarau Inthieng khawm chun a mîn hriettir bawk a:

¹⁶ “Chuong ni hnunga chun, An kuoma thu ka thlung dinghai chu hieng hi a nih, Lalpain a tih, An lungrilah ka thupêkhai sieng ka ta, An lungrilah ziek bawk ka tih,” tia a hril hnung khan;

¹⁷ “An suolhai le an bâwsietnahai Hre zing ta naw ning,” a ti sih a.

¹⁸ Chuongchun, chuong ang ngai- damna taphawta chun suol ta dingin thil inhlân a um ta naw a nih.

Inthlâda lo ding le dettaka um zing dinga infuina

¹⁹ Chuongchun, unauhai, Isu thi- sen lei chun, Hmun Inthienga khan lût ei huom a;

²⁰ Puonzâr (a taksa) chu fe thlengin, lam thar le hring a mi hawng pêk tah a;

²¹ Chuongchun, Pathien sûnghai chunga Thiempu ropuitak ei nei leiin,

²² ei lungrila sie le ṭha hrietna faitaka umin, ei taksa khawm tui inthienga sâwpa umin, ringna fam- kim neia lungril indiktak putin hnai ei tiu.

²³ Inhnîng lovin ei beisei thuring hi pawm tlat ei tiu; thutiemtu chu ring a um sih a.

²⁴ Chun, hmangai le thilthawa in- chawktho tuo dingin inngaituo seng ei tiu.

²⁵ Ṭhenkhat thaw dân anga in- khâwm dâm bânsan loin, infui tuo lem ei tiu, ni chu hung hnai deu deua in hrietin infui tuo nâwkzuol sau ro.

²⁶ Thutak hrietna famkim chu ei chang hnunga thil ei suksuol ṭâl chun, suolhai dingin inthâwina um ta dêr naw ni a,

²⁷ rorêlna ṭi lâwkna râpthlâktak ieng amani leh dotuhai kâng hmang dinga lungsenna mei chu um lem tâng a tih.

²⁸ Mosie Dân thu pawisa naw mi chu, hretu pahni pathum amani thuin lainatna ṭhang loin an thi hlak.

²⁹ Pathien Naupa sirde a, thu- thlung thisen ama sukthiengna thil narâna ruota, lunginsietna Thlarau suknuortu chu, chu mi chu ieng anga hremna nasa lem tuor tlâka ruot ni dingin am in ngai a?

³⁰ “Phuba hrim hrim keia lâk ding a nih, keiin thung ka tih,” ti le “Lalpa chun a mihai ngaituong a tih,” ti nâwktu chu ei hriet si a.

³¹ Pathien hring kuta tlûk chu thil râpthlâktak a nih.

³² Nisienlakhawm, inhmaa suk- vara in um hnunga tuorna buoi nasatak in tuor lai nihai kha hre nâwk ro:

³³ kawng khata chun hmusit le rinumhai khawm tuorin ennuoma siemin in um a, kawng khata chun chuong anga inhmaa lo umhai kha tuorpuituhai in hung nih.

³⁴ Kawlbunhai chu in lainat a, thil ṭha lem, um sawng bawk ding chu, mâniin in nei ti hrein, in thilneihai lâkpêka in umnaa khawm lâwmtakin in lo tuor tah a.

³⁵ Chuongchun, in ringna lâwm- man pêk nasatak nei ding chu peihâwn naw ro,

³⁶ Pathien dit zâwng in thaw hnungin thiltiem chu in hmu theina dingin selna in ngai a nih.

³⁷ “Sawt nawtê hnungah, A hung ding chu a hung ding a ni sih a. Sâwt riel ta naw nih.

³⁸ Nisienlakhawm, ka mi fel chu Ringnain hring a tih; A hnungtawl ruok chun, Ka lungrilin amaa chun lâwmna hrim nei naw ni,”

³⁹ Nisienlakhawm, eini chu bo- hmang dinga hnungtawl pâwla mi ei ni nawh a, hringna humhim dinga ringna nei pâwla mi ei ni lem.