HEBRAIHAI 1 - Pathien Lekhabu Inthieng (BSI)

Pathienin a Naupaah thu a hril

¹ Pathien inhmaa thlatuhai kuoma bung tamtak le kawng tinrênga zâwlneihaia thu lo hriltu khan,

² hieng ni tâwpa hin eini kuomah a Naupaa chun thu a hril tah. Ama chu iengkim rohluotu dingin a ruot a, amaa bawk chun khawvêlhai chu a siem a.

³ Ama chu a Pathien ropuina var le, a tak angpui ngei leh, ama thil- thawtheina thuah iengkim tungding- tu niin, suolhai a sukthieng hnungin chung tienga Ropuitak changtienga khin a hang ṭhung a.

⁴ Vântirkohai nêka hming ṭha lem ro a hluo sâwng ang ngeiin anni nêka ropui lem a hung ni ta sih a.

Pathien Naupa chu vântirkohai nekin a chunghnung lem

⁵ Vântirko hai laia tu kuom am hi thu hi a hril hlak a? “Nang chu ka Naupa i nih, Vawisûn hin ka nei che a nih,” ti le, “A ta dingin Pa ning ka ta, Ama chu keia ta dingin Naupa ning a tih,” ti hi.

⁶ Chun, Nau lutir chu khawvêla hin a ṭhuoi lût nâwkin, “Pathien vântirkohai po po khawmin, Ama chibai bûk raw se,” a tih a.

⁷ Chun, vântirko chungchâng thua chun hi hi a hril a nih: “Ama chun a vântirkohai chu, Thliah ân changtir hlak a, A rawngbâwltuhai khawm, Meichawkah ân changtir hlak,” ti hi.

⁸ Naupa chungchâng thua ruok chu hi hi a hril a nih: “Aw Pathien, i lalṭhungpha chu Chatuonin a um ding a nih; Indikna lal hmawl khawm chu, I ram lal hmawl chu a nih.

⁹ Felna chu i ngaina a, Bawsietna chu i theida kha; Chuleiin, Pathien, i Pathien chun, I ruolhai nêk chun, Hlimna hriek a nâl nasa lem che hi,” ti le,

¹⁰ “Nang Lalpa, a tîrin, Leilung innghatsan i phûm tah a, Vânhai khawm i kutsuok a na,

¹¹ Chuonghai chu la bohmang a ta, Nang ruok chu um sawng ding i nih; Chun, chuonghai po po chu, Silfên angin la hlui a ta,

¹² Puon angin zuol bawk i ta– Silfên ang elin, Chuongchun, hung danglam tâng a ta; Nang ruok chu i pângngai rawp a, I kumhai khawm bo naw ni,” tiin.

¹³ Nisienlakhawm, vântirkohai laia tu chungchâng thu âm hi hi a hril hlak a? “Ka changtieng ṭhung rawh, I hmêlmahai i kepha sirsana, Ka siem hmakhat chun,” ti hi.

¹⁴ Anni po po chu rawngbâwlna thlarauhai, sandamna rohluotu ding- hai ta dinga rawngbâwl dinga tirsuok an ni naw am a nih?