FESUOKNA 40 - Pathien Lekhabu Inthieng (BSI)

Biekbûk inngîr le inhlânna

¹ LALPA chun Mosie kuomah a hril a,

² “Thla khatna ni khat niah intuokna puon in biekbûk chu în ngîr ding a nih.

³ Chun, a sûnga chun Thuthlung bâwm chu sieng i ta, Thuthlung bâwm chu puonzârin zâr hlieng i tih.

⁴ Dawkân chu hung la lût i ta, a chunga thil umhai chu indawt peiin sieng i tih: khâwnvar siena chu hung la lût i ta, chutaka chun khâwnvarhai chu inṭhut i tih.

⁵ Riminhnik rawna rângkachak mâichâm chu Thuthlung bâwm hmaa chun inṭhut i ta, biekbûk kawtkhâr puonzâr chu zâr i tih.

⁶ Pumrawhmang inhlânna mâi- châm chu intuokna puon in biekbûk kawtkhâr hmaa chun inṭhut i tih.

⁷ Maihûn chu intuokna puon in le mâichâm inkâra chun inṭhut i ta, a sûngah tui sieng i tih.

⁸ Tuolzâwl inhuonna chu a vêlin inngîr i ta, tuolzâwl inhuonna puonzârhai chu khai i tih.

⁹ Chun, innâlna hriek lâng i ta, biekbûk le a sûnga um po po chu nâl i ta, inhlân i ta, chutaka hmangruo po po le chun; chuongchun, hung inthieng tâng an tih.

¹⁰ Chun, pumrawhmang inhlânna mâichâm chu nâl i ta, a hmagruo po po khawm nâl bawk i ta; chun, mâichâm chu inhlân i ta, mâichâm chu inthiengtak hung ni tâng a tih.

¹¹ Maihûn le ân ṭhutna khawm nâl i ta, inhlân i tih.

¹² Chun, Aron le a naupasalhai chu intuokna puonin kawtkhâra chun hung ṭhuoi i ta tuiin insiltir i tih.

¹³ Aron chunga chun silfên inthienghai chu bel i ta, ama chu hriek nâl i ta, inhlân i tih, thiempu sina ka rawng a bâwl theina dingin.

¹⁴ A naupasalhai chu hung ṭhuoi i ta, anni chu zakawchunghai inhâktir i ta,

¹⁵ an pa i nâl ang bawk khan hriek nâl i tih, thiempu sina ka rawng an bâwl theina dingin. Hriek nâl an nina chu an ta dingin an thlahai chena thiempu an ni zingna ding nîng a tih,” tiin.

¹⁶ LALPAIN thu a pêk po po angin Mosie chun a thawh a; chuong ang tak chun a thaw a nih.

¹⁷ Chun, kum hninaa thla hmasa tak, chu thla ni khatnaa chun biekbûk chu inngîr a lo ni tah a.

¹⁸ Mosie chun biekbûk chu ân ngîr a, a kerkuokhai chu a sieh a, chutaka chun a thingphêkhai chu ân ngîr a, a bangruhai chu a thun lût a, a banhai chu ân ngîr tah a.

¹⁹ A puon in chu biekbûk chunga chun a keiphar a, a chunga chun inkhumnain ân khum a, LALPAIN Mosie thu a pêk ang tak chun.

²⁰ Chun, thuthlung chu a lâk a, Thuthlung bâwm sûnga chun a sie tah a; Thuthlung bâwma chun a zâwnfunghai a rawl a; Thuthlung bâwm chunga chun zângaina ṭhung- pha chu a sieh a;

²¹ chun, Thuthlung bâwm chu biekbûk sûnga chun a hung lâk lût a; pindangna puonzârhai chu a khai a, Thuthlung bâwm chu a zarhlieh a, LALPAIN Mosie thu a pêk ang tak chun.

²² Puonzâr puo biekbûk hmar- tieng pangah intuokna puon ina chun dawkân a sieh a,

²³ LALPA hmaah bei chu indawt thlie hin a sieh a, LALPAIN Mosie thu a pêk ang tak chun.

²⁴ Biekbûk simtieng pangah daw- kân zawna chun sathâu khâwnvar siena chu a sieh a,

²⁵ LALPA hmaa chun khâwn- varhai chu ân ṭhut a, LALPAIN Mosie thu a pêk ang tak chun.

²⁶ Puonzâr hmaah, intuokna puon ina chun rângkachak mâichâm chu a sieh a,

²⁷ chu chunga chun riminhnik rawmi chu a rawh a, LALPAIN Mosie thu a pêk ang tak chun.

²⁸ Chun, biekbûk kawtkhâr puon- zârhai chu a zâr a.

²⁹ Intuokna puon in biekbûk kawt- khâra chun pumrawhmang thil inhlânna mâichâm chu ân tung a, a chunga chun pumrawmhmang thilin- hlânhai le fâkmi thilinhlânhai ân hlân a, LALPAIN Mosie thu a pêk ang tak chun.

³⁰ Mâichâm le intuokna puon in inkâra chun maihûn chu ân ṭhut a, insâwpna dingin a sûnga chun tui a sieh a.

³¹ Chutaka chun Mosie le Aron le a naupasalhai chun an kuthai le an kehai an sâwp hlak a;

³² intuokna puon ina an lût pha le mâichâm hnaia an hung pha an sâwp hlak; LALPAIN Mosie thu a pêk ang tak chun.

³³ Tuolzâwl inhuonna chu biekbûk le mâichâm huol vêl vawngin ân ngîr a, tuolzâwl inhuonna kawtkhâr puonzârhai khawm a khai a. Chuong- chun, Mosie chun sin chu a zo tah a.

Biekbûk chunga sûm chu

³⁴ Chun, sûm chun intuokna puon in chu ân khum a, LALPA ropuinain biekbûk chu a suksip a.

³⁵ Biekbûk chu LALPA ropuinain a suksip leiin le, sûm chu a chunga a um zing leiin Mosie chu intuokna puon in sûngah a lût thei ta nawh a.

³⁶ An inzin sûng po po chun, sûm chu biekbûk chunga inthawka lâk kânga a um phingleh Israel thlahai chun hmatieng an pan pei a;

³⁷ sûm chu lâk kânga a um naw ruok chun, lâk kânga a um ni hma po chun an fe suok ngai nawh a.

³⁸ An inzin sûng po chun, Israel sûnghai po po mithmuah, LALPA sûm chu biekbûk chungah sûnah a um a, zâna chun sûma chun mei- chawk a um hlak a.