FESUOKNA 27 - Pathien Lekhabu Inthieng (BSI)

Râwhmang inthâwina mâichâm

¹ “Shittim thing mâichâm tawng ngaa sei, tawng ngaa lien i siem ding a na, chu mâichâm chu kil li nei, tawng thuma insâng a ni ding a nih.

² A kil pali chunga chun kihai siem i ta, chu kihai chu ama le chun zawm khat an ni ding a nih; dârsenin inluon khum bawk i tih.

³ A vut dawna dingin bêlhai siem i ta, meikhelnahai, châwtawlhai, thîr- kuoihai le vutluohai siem i ta; a hmangruohai po po chu dârsena siem a ni ding a nih.

⁴ Chu ta ding chun dârsen inphan thuk siem bawk i ta; chun, a lên kil palia chun dârsen kuol pali siem i tih.

⁵ A lên chu mâichâm inchenna zu tlung dingin mâichâm rei hnuoi zar zarah sieng i tih.

⁶ Mâichâm zâwnna ding chun zâwnfunghai shittim thingin siem i ta, dârsen inluon khum i tih.

⁷ Zâwnfunghai chu dârsen kuolhai sûnga chun rawl ding a nih, hang zâwn zâwngin zâwnfunghai chu mâichâm sîr hnia chun um an tih.

⁸ Thingphêkhaiin mâichâm chu a kawrawngin i siem ding a nih, tlânga inhmutir i ni ang tak khan siem a ni ding a nih.

⁹ “Biekbûk tuolzâwl chu i siem ding a na; a simtieng pang tuolzâwla dinga puonzârhai chu puon zai inhmi kawp, sîr khata dinga tawng za khat a ni ding a nih.

¹⁰ A ban chu sâwmhni le a kerkuok sâwmhni dârsena siem nîng a ta, ban kuoikimhai le a tuommawinahai chu tangkaruo a ni ding a nih.

¹¹ Chuong ang bawk chun hmar- tieng pang tluonsuok chun puonzâr- hai tawng za khat le ban sâwmhni, kerkuok sâwmhni dârsena siem um an ta; ban kuoikimhai le tuom- mawinahai chu tangkaruo a ni ding a nih.

¹² Thlangtieng pangah a tuolzâwl tluonsuokin puonzârhai tawng sâwm- nga, ban sâwm le kerkuok sâwm bawk leh um a tih.

¹³ Saktieng pangah tuoltieng tuol- zâwl lienzie chu tawng sâwmnga nîng a tih.

¹⁴ Kawt sîr khata puonzârhai chu tawng sâwm le panga nîng a ta, ban pathum le a kerkuok pathum leh.

¹⁵ Chun, a sîr khingtienga ding chun puonzârhai chu tawng sâwm- panga nîng a ta, a banhai pathum le a kerkuokhai pathum leh.

¹⁶ A tuolzâwl kawta ding chun puonzâr tawng sâwmhni, sahmul dumpâwl le a êm le seninlâr le pat zai inhmi kawpa siem ṭhuimawi thiem- taka ṭhui a ni ding a nih, a ban pali le a kerkuok pali leh.

¹⁷ A tuolzâwl sîr vêl po poa a banhai po po chu tangkaruoin tuom- mawi ding a na, a kuoikimhai tangkaruo, a kerkuokhai dârsen an ni ding a nih.

¹⁸ A tuolzâwl huol sûng chu a dungtieng tawng za khat, a khang- tieng tawng sâwmnga, ân sângtieng tawng nga, a puon zai inhmi kawp inkhai tawng nga le an kerkuokhai chu dârsen an ni ding a nih.

¹⁹ Chutaka Biekbûk rawngbâwlna po poa hmangruohai po po le a kilnahai po po le a tuolzâwl inhuon- naa a kilna po po chu dârsen vawng a ni ding a nih.

Khâwnvar enkawl dân

²⁰ “Chun, khâwnvar chu a chawk zingna dingin, meivar dingin oliv hriek sâwr inthieng i kuoma hung la dingin Israel thlahai chu thu pêng i tih.

²¹ Intuokna puon in Thuthlung bâwm hmaha puonzâr puoa chun Aron le a naupasalhai chun LALPA hmaa chun zântienga inthawka zîngkâr chen chun enkawl an ta; Israel thlahai aiin an thlahai chen- in kumkhuoin an bata ngai nîng a tih.