FESUOKNA 25 - Pathien Lekhabu Inthieng (BSI)

Biekbûka dinga thilpêk pêk thu

¹ LALPA chun Mosie kuomah,

² “Israel thlahai kuoma chun hril la, ka ta dingin thilpêk dâwl raw hai se; mi tin a lungrila inhâwktaka petua inthawkin ka ta dinga thilpêk chu in lâk ding a nih.

³ Hieng hi annia inthawka thilpêk in lâk dinghai chu a nih; rângkachak, tangkaruo le dârsen leh,

⁴ sahmul dumpâwl, a êm le seninlâr le patzai inhmi thlûr, kêl hmul,

⁵ berâmchal vun suksen, seal vunhai le shittim thing leh;

⁶ meivar dingin hriek, riminhnik, râwmi ding le innâlna hriek dingin riminhnik,

⁷ Onik lung le lunghai thiempu zakawsîng le a âwma bel ding leh nîng a tih.

⁸ Chun, hmun inthieng mi siem- pêk raw hai se, anni laia ka um zing theina dingin.

⁹ Biekbûk riruot le a thuom- hnawhai riruot kân entir che po po ang tak hin in bâwl ding a nih.

Thuthlung Bâwm

¹⁰ “Shittim thingin Thuthlung bâwm siem an ta; a seitieng tawng hni le a chenve, a lientieng tawng khat le a chenve, ân sângtieng tawng khat le a chenve bawk ning a tih.

¹¹ Rângkachak inthiengin inluon khum i ta; a sûng le puo inluon khum i tih; a chunga chun a vêlin râng- kachakin a tlâng kâwm i tih.

¹² Rângkachak kuol pali sut i ta, a kehai palia chun inbûk i tih; kuol hni chu a sîr khatah um an ta, kuol hni dang chu a sîr khingtiengah um an tih.

¹³ Shittim thing zâwnfunghai siem i ta, rângkachak inluon khum i tih.

¹⁴ “Thuthlung bâwm sîra a kuol sûnghaia chun Thuthlung bâwm zâwnna ding chun rawl i tih.

¹⁵ Zâwnfunghai chu Thuthlung bâwma a kuolhai sûnga chun um zing an tih, lâk suok an ni hrim hrim ding a ni nawh.

¹⁶ Thuthlung bâwm sûnga chun thuthlung ka pêk ding che chu sieng i tih.

¹⁷ Chun rângkachak inthiengin zângaina ṭhungpha siem i ta, a sei- tieng tawng hni le a chenve, a lientieng tawng khat le a chenvein.

¹⁸ Rângkachak cherub pahni a suta sutin, zângaina ṭhungpha hmawr ve veah sieng i tih.

¹⁹ Cherub pakhat chu a hmawr khingkhatah, cherub pakhat dang chu a hmawr khingtiengah siem i tih; a hmawr pahni tâwpa cherubhai chu zângaina ṭhungpha le hlûm khata inthawkin siem i tih.

²⁰ Cherubhai chun chungtieng an thla zar an ta, an thlahai chun zângaina ṭhungpha chu zar hlieng an ta, an hmaihai chu innghattuok ve vein, cherubhai chun zângaina ṭhungpha tieng chu nghâng an tih.

²¹ Chun, Thuthlung bâwm chunga chun zângaina ṭhungpha chu sieng i ta; chun, Thuthlung bâwm sûnga chun thuthlung ka pêk ding che chu sieng i tih.

²² Chutaka chun intuokpui ka ti cheh a, Israel thlahai kuoma thupêk kawnga thil ka pêk ding che po po chu, Thuthlung bâwm chunga zângaina ṭhungpha chunga inthawk chun hung inhriettir ka ti che.

Inentirna bei dawkân chu

²³ “Shittim thingin dawkân siem i ta; a seitieng tawng hni, a lientieng tawng khat, ân sângtieng chu tawng khat le a chenve nîng a tih.

²⁴ Rângkachak inthiengin inluon khum i ta, a vêlin rângkachakin a tlâng kâwm i tih.

²⁵ A vêlin kutphabawkin a rei siem i ta, chu rei chu a vêlin rângkachakin inluon i tih.

²⁶ Chu ta ding chun rângkachak kuol pali siem i ta, chu kuolhai chu a kil palia a ke palia chun inbûk i ta;

²⁷ Dawkân zâwnna zâwnfunghai rawlna dingin a kuolhai chu a rei hnaiah an um ding a nih.

²⁸ Dawkân zâwnna ding chun shit- tim thing zâwnfunghai siem i ta; rângkachakin inluon khum i tih.

²⁹ A thlênghai, haihawhai, notung seihai, noinkûmhai, dâwn mi thilin- hlân bun suokna dingin siem i tih: chuong chu rângkachak inthiengin i siem ding a nih.

³⁰ Chun, ka hmaah dawkân chung- a chun entirna bei sie rawp i tih.

Khâwnvar siena chu

³¹ “Chun rângkachak inthiengin sathâukhâwnvar siena siem i tih. Sathâukhâwnvar chu zawm khat vawng a ni ding a nih; a nohai, a mûmhai le a hmawr pârhai chu hlûm khat vawnga inthawka siem a ni ding a nih.

³² Chu khâwnvar siena ngul chun kâu paruk nei a ta, sîr khata chun sathâukhâwnvar siena kâu thum, a sîr khingtiengah sathâukhâwnvar siena kâu thum bawk;

³³ kau khata chun almond zîk anga siem khei pathum, amûm le a hmawr pâr um, a kâu danga chun almond zîk anga siem khei pathum, amûm le a hmawr pârhai um a tih; sathâukhâwnvar siena kâu hung suok, a kâu parukhai chu chuong ang seng chu an nih.

³⁴ Chun, sathâukhâwnvar siena ngula almond zîkhai anga siem no pali, a mûmhai le a hmawr pârhai leh um a tih.

³⁵ Chun, sathâukhâwnvar siena ngula kâu paruk ṭo suokhaia kâu hni tuok hnuoi peiah a mûm pakhat um pei bawkin.

³⁶ A hmawr pârhai le an kâuhai chu zawm khat an ni ding a nih a, a pumpui chun rângkachak inthieng sutzawm vawng a ni ding a nih.

³⁷ Chun, chutaka chun khâwn- varhai pasari siem i ta, an umna hmazâwn hmun ruok elvar dinga inṭhut nîng an tih.

³⁸ A chaichehai le a vâmdawhai khawm chu rângkachak inthienga siem an ni ding a nih.

³⁹ Rângkachak inthieng talent khat bûka siem ding a nih, hieng a bûrlebêl po pohai le hin.

⁴⁰ Chun, a riruot tlâng chunga inentir i ni angtak khan i siem ngei ding a nih.