FESUOKNA 11 - Pathien Lekhabu Inthieng (BSI)

Nau lutîr thi ding hrillâwkna

¹ LALPA chun Mosie kuomah, “Pharao le Aigupta chungah hri pakhat la hung intlungtir nâwk ka tih, chu hnunga chun hitaka inthawk hin infetir a ti cheu. Ân fetir pha cheu chun a namin nam suok fai vawng a ti cheu.

² Mipuihai hrieta chun hril la, pasal tin le nuhmei tinin, rângkachak le tangkaruo incheinahai an tuol- bâwmhaia inthawkin haw seng raw hai se,” a tih a.

³ LALPA chun Aiguptahai mit- hmuah Israel mihai chu ditsakna ân hmutir a, Mosie ngei khawm chu mipui mithmu le Pharao siehlawhai mithmuah Aigupta ram sûnga chun mi lientak a ni bawk a.

⁴ Mosie chun, “Hieng ang hin LALPAIN a tih: ‘Zân ril lai vêlah Aigupta mihai lai fe suok ka ta;

⁵ Aigupta rama nau lutîr po po, Pharao nau lutîr a lalṭhungphaa ṭhunga inthawka, bu râwtnawinaa sinthaw suoknu nau lutîr tak chen le, ran ruol tê hmasatakhai le chun thi fai vawng an tih.

⁶ Chun, Aigupta ram sûng po poa chun ṭap nasatak um a tih: chuong ang hrim hrim chu a la um ngai dêr nawh a, um khawm um nâwk ta dêr bawk naw ni.

⁷ Nisienlakhawm, Israel mihai le Aigupta mihai kâra chun LALPAIN ieng ang lâwma danglamna am a sie ti in hriet theina dingin, Israel thlahai laia chu ran le mihriem khawm ui khawmin inngak naw ni.

⁸ Chun, hieng i siehlawhai po po hi ka kuomah hung an ta, ka hmaa bawkkhupin, Nanga zuitu dinghai po po le chun suok ta rawh,’ mi tîng an tih; chun, chu hnunga chun suok tâng ka tih, tiin,” a tih a. Pharao kuoma inthawk chun lunginsentakin a suok tah a.

⁹ Chun LALPAIN Mosie kuomah, “Aigupta rama hin ka thilmakhai sukpung a ni theina dingin, Pharao chun in thu a ngai naw ding a ni hi,” a tih a.

¹⁰ Mosie le Aron chun Pharao hmaa chun thilmakhai po po chu an thaw tah a; nisienlakhawm, LALPA chun Pharao lungril chu a sukngar a, Israel thlahai chu a rama inthawk ân fe suoktir chuong nawh a.