AMOS 6 - Pathien Lekhabu Inthieng (BSI)

Israel suksieta a umna

¹ “Zion tlânga inhawitir taluoa umhai le, Samari tlânga himtaka umhai le hnam lientak mi ropuihai, an kuoma Israel sûngkuohai an fenahai chu an chung a rik ie!

² Kalne khuoa chun fe unla, en ro; chun, chutaka inthawkin Hamath khaw ropuia chun fe unla, en ro; chun, Philistin ram Gath khuoa chun fe thla unla, hieng ramhai nêk hin an ṭha lem am? In ram nêkin an ram chu a lien lem am?

³ Nangni ni ṭha naw hlataka sie le nunse ṭhungna inhnaitir hai;

⁴ saiha khuma zâl a, an ṭhungpha sei chunghaia inzih a, berâm ruol laia berâmte le sebâwng umna laia sebâwng tuoihai fah a;

⁵ ṭingṭanga zawmthâwtna hlahai sak a, David anga mâni ta dinga hla thlûk hmangruohai siem a;

⁶ berbu liena uoin dâwn a, hriek ṭhataka innâl hlakhai chu; nisienla- khawm, Josefhai rinumna leiin an lungngai nawh.

⁷ Chuongchun, tuhin sala fe hmasahai leh salah fêng an ta, inzihai hlimna bur bur chu bo tâng a tih.”

⁸ LALPA, sipaihai Pathien chun, Lalpa PATHIEN chun ama le ama insâlin ṭawng ân khâm a: “Jakob chapona chu ka tirdak a, a lal inhai ka theida a; chuleiin, khuo le a sûnga um po pohai chu kân mantir ding a nih,” tiin.

⁹ In pakhatah mi sâwm an la um chun thi vawng an tih.

¹⁰ Chun, mi pakhat pami ama rawtu ngei khawmin a lâk a, in sûnga inthawka a ru la suok dingin, in sûngril taka um kuomah, “I kuomah tukhawm an la um am?” a tih a, ama chun, “Um lo,” a ti chun; ama chun, “To zing rawh, LALPA hming chu ei sâm ding a ni si nawh a” tîng a tih.

¹¹ Ngai ta u, LALPA chun thu a pêk sih a; chun, in lien chu chim rem rum a ta, in chîn khawm chu kak hek huk bawk a tih.

¹² Sakawrhai chu lungpui chung- ah an tlân ding am a nih? Chutaka chun miin sebâwngin hnuoi an inlet ding am a nih? Nangnîn rorêlna chu thina hloa le, felna chu sairam thingah in inchangtir hi;

¹³ nangni iengkhawmlo chunga lâwm a. “Eini hrâtnain a ni nâwm a ni kihai ei lâk?” tituhai.

¹⁴ “En ta u, Aw Israel sûngkuohai, nangni hi do dingin hnam hung in- ngîrsuotir ka ta, chun, Hamath khaw kawtsuoa inthawkin Araba vadung chenin suknawmnâng an ti cheu,” LALPA, sipaihai Pathien chun a ti sih a.