2 TIMOTHE 2 - Pathien Lekhabu Inthieng (BSI)

Isu Krista sipai ṭha

¹ Chuongchun, nang, ka nau, Krista Isua lunginsietna uma hin suknghetin um rawh.

² Chun, hretu tamtakhai laia ka bâua thu i hriethai kha, chuong chu, mi ringum, mi danghai inchûktir sâwng thei dinghai kuoma chun inkawltir rawh.

³ Krista Isu sipai ṭhatak angin rinum mi tuorpui rawh.

⁴ Sipaia um dinga thlangtu chu a suklâwm theina dingin, sipai tû- khawm indo laiin hi dam sûng khawsakna hin ân sukhnawk ngai nawh a.

⁵ Chun, in ruolsieknahaia khawm chun mîn thaw sien khawm, dân angin a thaw naw chun inkhumtirin a um ngai nawh a.

⁶ Loneitu sin inrim chu a ra chang hmasatu a ni ding a nih.

⁷ Ka thu hril hi ngaituo rawh; Lalpa chun kawng iengkimah hriet- theina a pêk ding che a ni sih a.

⁸ Isu Krista, David thlaa mi ka Chanchin Ṭha hril anga mithi laia inthawka thonâwk kha, hre zing rawh.

⁹ Chu Chanchin Ṭha lei chun thil suksuoltu angin khuop hiel khawpin rinumhai ka tuor hlak a nih; nisienlakhawm, Pathien thu chu khuopin a um si nawh.

¹⁰ Chuleiin, Krista Isua um san- damna chu, chatuona ropuina leh an hmu ve theina dingin, thlanghai lei chun iengkim ka tuor hlak.

¹¹ Hi thu hi ring a um a nih; “Ama leh ei thi ta si chun, Ama leh hring bawk ei tih;

¹² Ei tuor chun, Ama leh ro rêl ei tih; Ama ei inphat chun, Ama khawmin mîn phat a tih;

¹³ Eini ringum loin um inla khawm, Ama chu ringumin a um zing a nih; Ama le ama ân phat thei si nawh a,” ti hi.

Sinthawtu ni tlâk mizie ding

¹⁴ Chuong thu chu inhriet thartir zing la, thu mei meiah an insêl nawna dingin Lalpa mithmuah ṭhahnem- ngaitakin inhriettir rawh, chu chu iengkhawm a ṭhahnem nawh a, a ngaituhai ta dingin bohmangna a ni lem hlak.

¹⁵ Sinthawtu mâni sinthaw inzâ- pui ngai nawtu angin, Pathien thutak indiktaka inchûktirin, Pathien pawm tlâka um dingin i theitâwp suo rawh.

¹⁶ Amiruokchu, Pathien inza nawna tieng thu hril mei mei chu nghatsan hlak rawh; chuong ang mi chu Pathien ngâisak nawna tiengah nasa nâwk zuol an ta,

¹⁷ an thu khawm chun pânse fâk angin fa pei a tih, anni lai chun Humenai le Philet an ṭhang a nih.

¹⁸ Chuong mihai chun, “Tho- nâwkna chu tu khawm hin a ni dai tah,” tiin, thutak kawng chu an fe kâwisan a, mi ṭhenkhathai ringna an sukbo hlak.

¹⁹ Nisienlakhawm, Pathien lung- phûm nghet chu a la ngîr zing a, hi inchikna hi a nei a, “Lalpa chun ama tahai chu a hriet,” ti le, “Lalpa hming lam taphawt chun suol fe san raw se,” ti hi.

²⁰ Nisienlakhawm, in ropuia hin bûr le bêl rângkachak le tangkaruoa siem chau a um nawh a, thing le bepila siem khawm a um hlak a; ṭhenkhathai ngaihlut ding a um bawk a, ṭhenkhathai chu ngaihlut naw ding a um bawk.

²¹ Chuleiin, miin chuong thilhaia inthawk ân siekieng chun, bêl in- thieng, Lalpa hmang tlâk, sin thaw ṭha tinrênga in zosa, ngaihlut ding mi nîng a tih.

²² Nisienlakhawm, tleirâwl châk- nahai chu tlânsan la, lungril in- thienga Lalpa lam taphawthai kuom- a chun felna dâm, ringna dâm, hmangaina dâm, inremna dâm hnawt ve rawh.

²³ Amiruokchu, indona a siem hlak ti hrein, insêlna invêt le, var nawahai chun ṭhang nuom naw.

²⁴ Lalpa suok chun do ding a ni si nawh a, mi po po chungah zaidamin, inchûktir thiemin, suol chungah dâwtheiin,

²⁵ ama do dinga insiemhai chu thuhnuoirawl takin ân chûktir lem ding a nih; chuongchun, sima thutak an hung hriet theina dingin Pathienin hun remchâng a pêk el thei a nih;

²⁶ Pathien dit zâwng thaw dingin Lalpa suoka manin, Diebol chânga inthawkin an suok thei hlau rawi mawh.