2 SAMUEL 22 - Pathien Lekhabu Inthieng (BSI)

Sansuokna Hla

¹ Chun, David chun a hmêl- mahai po po kuta inthawk le Saula kuta inthawk LALPAIN a sansuok ni chun hi hla thu hi LALPA kuomah a hril a;

² chuongchun, ama chun: “LALPA chu ka lungpui le ka kulpui le a mi sanhimtu a na, ka ta ngei a nih;

³ Ka lungpui, Pathien ama chu ring ka ta, Ka phaw le ka sandamna ki, ka kulbîng insâng le kân humhimna a nih; Ka sandamtu, nangin inpâwngnêknaa inthawkin i mi sandam hlak.

⁴ Inpâktlâk LALPA chu ko ka ta, Chuongchun, a mi dotuhaia inthawka sandamin um ka tih.

⁵ Thina hung insawk chun a mîn huol vêl a, Pathien ngaisak nawna tuilien chun a mi suklau a.

⁶ Seol hruihruolhai chun a mi khuop vêl a, Thina chânghai chun a mi âwk bawk a.

⁷ Ka lunginzîngin LALPA chu ka ko a, Anih, ka Pathien chu ka ko hlak. Chun, ama chun a biekina inthawk chun ka râwl chu a hriet a, Chun, ka khêkri chu a naa chun a lût tah a.

⁸ Chu phingle chun hnuoi hi ân hning a, ân thin tah a, A lunginsen leiin vân innghatna chenin ân hnîngin ân thin tah a.

⁹ A hnâra inthawk chun meikhu ân tung ta ngut ngut a, A baua suok mei chun a kâng ta dur dur a; Chu chun meihawl khawm chu a sukchawk ta dur dur a.

¹⁰ Ama chun vânhai khawm a sukkûn a, a ṭum tah a, A ke hnuoiahai chun inthim sâmup hi a hung um a.

¹¹ Cherub chungah a chuong a, a vuong tah a, Anih, thli thlaahai chun an hmuh a.

¹² Inthim chu ama inhuol vêlna bûktêah a siem a, Tuihai, vâna sûm sâmuphai chu fâwkkhâwmin,

¹³ A hmaa varna lei chun, Meilinghai chu a chawk a.

¹⁴ LALPA chu vâna khin a hung inri dur dur a, Achunghnungtak chun a râwl ân suoh a.

¹⁵ Chun, thalhai chu a kâp suok a, anni chu a sukdar a, Kâwl dâm ân leptir a, a sukbuoi tah a.

¹⁶ Chu phingleh LALPA kâwkna leia, A hnâra inthuok suokin a mût rak lei chun, Leihnuoi innghatnahai chu suklangin a um tah a.

¹⁷ Ama chun chung tienga inthawkin a hung ban a, a mi chel a, Tui tamtaka inthawk chun a mi hnûk dawk a.

¹⁸ A mi dotu hrâttaka inthawk chun a mi sanhim a, A mi theidatuhaia inthawk leh, keia ta ding chun an hrât talaw sih a.

¹⁹ Anni chun ka vângsiet ni chun an mi hung thawh a, Nisienlakhawm, LALPA chu kân nghatna tak a nih.

²⁰ Ama chun hmun inthâwltakah a mi ṭhuoi suok a, Ka chunga a lâwm leiin a mi lo sanhim tah a nih.

²¹ LALPA chun ka felzie ang peiin ka chungah a thawh a, Ka kuthai ân thieng ang ngeiin a mi thung a nih.

²² LALPA lampuihai chu ka hrawh a, Ka Pathien kuoma inthawk chun suoltakin ka fe hmang ngai si nawh a.

²³ A rorêlna po po ka hmaah a um hlak a, A thuruothai hlak chu ka nghatsan ngai si nawh a.

²⁴ Ama kuoma chun hrilsietbo ka ni bawk a, Ka rîtlonaa inthawkin kân siekieng hlak a.

²⁵ Chuleiin, LALPA chun ka felzie ang peiin a mi lo thung tah a; A mithmua kân thiengzie ang peiin.

²⁶ Mi lunginsiet theihai kuoma chun lunginsiet theitakin insuklang i ta, Mi ṭha famkimhai kuoma chun ṭha famkimin insuklang i tih.

²⁷ Mi inthieng kuoma chun inthiengin insuklang i ta, Chun, mi kâwmaw kuoma chun kâwmaw angin insuklang i tih.

²⁸ Rinum tuor mihai chu sandam i ta, Mi chapohai ruok chu i suktlâwm theina dingin an chungah i mit a fu zing a.

²⁹ Aw LALPA, khâwnvar i ni sih a; LALPA chun kân thimna hi sukvar a tih.

³⁰ Nangma ṭhangpuiin râl ka baw sih a, Ka Pathien ṭhangpui bawkin kul kân châwmhlên a nih.

³¹ Pathien chu a lampui a ṭha famkim a, LALPA thu chu inchien a ni tah. Ama ringtuhai po po ta dingin ama chu phaw a nih.

³² LALPA naw chu tu am Pathien an um? Ei Pathien naw chu tu am lungpui an um a?

³³ Pathien chu ka kulpui nghettak a na, Mi ṭha famkim chu a lampuiah a ṭhuoi hlak.

³⁴ Ka kehai chu sazukpui ke angin a siem a, Ka hmun insângahai a mîn umtir hlak.

³⁵ Ka kuthai hi râl kâp dingin ân chûktir hlak a, Chuongchun, ka bânhai hin dâr thalngul a kuoi zo hiel a.

³⁶ Nangin i sandamna phaw chu i mi pêk bawk a; I înngaitlâwmna chun i mi siem lien tah.

³⁷ Ka hnuoia ka kalchawina chu i suklien a, Chuongchun, ka kehai hi ân tleu nawh a.

³⁸ Ka hmêlmahai chu ka hnawt phâk a,ka sukbohmang a, Sukbohmang dêra an um hmakhat chun ka kîr nawh.

³⁹ An tho nâwk thei nawna dingin ka sukbohmang dêr a, ka sât fik a; Anih, ka ke hnuoiah an tlu tah a.

⁴⁰ Nangin inthawnaa ding chun ka taiah hrâtnain i mi hrên sih a, A mi hung thawtuhai chu ka hnuoiah i tukdawl tah a.

⁴¹ A mi theidatuhai chu ka sukbohmang theina dingin, Nangin a mi dotuhai chu mi hnunginnghatin în umtir ta bawk a.

⁴² An ngha vêl a, nisienlakhawm, sandamtu ding tukhawm an um nawh a; LALPA ngei chu an hang en a, nisienlakhawm, a dawn si nawh.

⁴³ Chu phingle chun hnuoia pilvut ang elin ka vuok phit a, Khawlai chirhak ang elin ka sukhmât a, ka sukdar tah a.

⁴⁴ Nangin ka mihai insuolnaa inthawk khawmin i mi sanhim tah a, Hnam tin lu chu ni dingin i mi vawng ṭha a. Ka hriet ngai naw hnam chun ka rawng bâwl tâng an tih.

⁴⁵ Hnam danghai chu ka kuomah inpêng an ta, Ka chanchin an hriet phingleh ka thu zâwm an tih.

⁴⁶ Hnam danghai chu chul an ta, An kulbînghaia inthawk dâm chun inthin pumin hung suok an tih.

⁴⁷ LALPA chu a hring zing a, ka lungpui chu inpâkin um raw se; A mi sandamna lungpui, Pathien chu chawimawiin um raw se.

⁴⁸ Phuba mi lapêktu le, Hnam tin ka hnuoia tukdawltu Pathien ngei chu.

⁴⁹ A mi dotuhaia inthawka a mi la suoktu, Anih, nangin a mi thawtuhai chungtieng chun i mi dawm kâng a; Mi nunsiea inthawk chun i mi sanhim hlak.

⁵⁰ Chuleiin, aw LALPA, hnam tinhai lai chun lâwmthu hril ka ti cheh a, I hming inpâkin hla sak bawk ka tih.

⁵¹ Ama chun sandamna ropuitak a lal a pêk hlak a; A hrieknâl chungah, David le a thlahai chung ngeia chun, Kumkhuoin a zainêmzie inlangtir a tih,” a tih a.