2 SAMUEL 14 - Pathien Lekhabu Inthieng (BSI)

Absalom a kirnâwkna dinga Joab remruot

¹ Zeruia naupa Joab chun lal lungril chu Absalom chungah ân nghat ti a hriet a.

² Chuongchun, Joab chun Tekoa khuoah mi a tir a, chutaka nuhmei var pakhat chu a vân ṭhuoitir a, a kuomah, “Lusûn angin insiem la, lusûnna puon sil la, sahriek khawm innâl loin, nuhmei sâwttak mithi sûn ta angin um rawh;

³ chun, lal kuomah fe la, a kuomah hieng ang hin thu va hril rawh aw,” a ta. Chuongchun, Joab chun thu chu a hril tah a.

⁴ Chun, Tekoa khuoa nuhmei chun lal kuoma thu hril ding chun hmaia hnuoi sikin chibai a bûk a, a bawkkhup a, “Aw lalpa, mi ṭhangpui rawh,” a ta.

⁵ Chun, lal chun a kuomah, “Ieng am a ni leh?” a ta. Chun, ama chun a dawn a, “Hmeithai ka nih a, ka pasal chu a thi tah a.

⁶ Chun, i suoknu hin naupasal pahni ka nei a, an pahni chun loah an insuol a, tukhawm a ṭheltu ding an um si nawh a, a pakhat chun pakhat dang chu a vuok a, a sukhlum tah a.

⁷ Chun, ngai ta, an sûngkuo po po chun i suoknu hi an do hrawn a, ‘A unaupa thattu chu, a unaupa a that leia kan that ve theina dingin mi pe raw khai, chuongchun, rohluotu ding khawm sukbohmang nghâl kan tih,’ an ta; chuongchun, ka meiling la um sun chu sukhlum an ta, ka pasal chu hnuoi chunga hming le thla hrim hrim nei loin a um el ding a nih,” a ta.

⁸ Chun, lal chun nuhmei kuoma chun, “I inah fe ta la, i chungchâng thua chun thu pe el ka ti che,” a ta.

⁹ Chun, Tekoa khuoa nuhmei chun lal kuoma chun, “Aw lalpa, ka pu, bawsietna maw chu keia chunga le ka pa sûnghai chungah tla el raw se; chun, lal le lalṭhungpha chun maw chu phur naw raw se,” a ta.

¹⁰ Chun, lal chun, “Tukhawm i chunga ieng amanih hril taphawt chu ka kuomah hung ṭhuoi la, tâwk nâwk ta naw tawp an ti che,” a ta.

¹¹ Ama chun, “Thisen insuotuhai chunga phuba latuhaiin sukbohmang ta lo dingin lal chun LALPA i Pathien chu hre zing raw se aw; chuong naw chun chu ka naupa hi sukbohmang rawi an tih,” a ta. Chun, ama chun, “LALPA hringna sâlin ka hril a nih, i naupa samzai pakhat khawm hnuoia hin tla naw nih,” a ta.

¹² Chuongchun, nuhmei chun, “Ka hni che hi, i suoknu hin lalpa ka pu kuoma hin thu bau khat chau hang hril nâwk raw se,” a ta.

¹³ Ama chun, “Hril ta la,” a ta. Chun, nuhmei chun, “Annawleh, ieng leia Pathien mihai dodâla hienga thaw i tum am a nih a? Hieng thua inthawk hin lal chu thiemnaw chang angin ân lang a nih, lal chun a mi tlân hmang chu a ṭhuoikîr nâwk si naw lei hin.

¹⁴ Ei thi ngei ngei ding a na; chun, tuisik hnuoia inbaw tahnung rût nâwk thei ta lo ang hi ei na. Pathienin hringna hi a lâk hmang a ni nawh a, a tlân hmang chu amaa inthawka mi hran a ni nawna dingin rem a ruot a ni lem a nih.

¹⁵ Chuongchun, lalpa, ka pu kuoma hi thu hril dinga ka hung khawm hi mi ka ṭi lei a na, chun, i suoknu chun lal kuoma hin hril phawt ka ta, lal chun a suoknu hnina chu ân hlawtlingtir rawi mawh.

¹⁶ Lal chun kei le ka naupa hi Pathien ro hluo lo dinga mi sukbo- hmang tumtu kuta inthawkin i suok- nu hi sansuok dingin lo ngaisak i tih ka tih a.

¹⁷ Chuongchun, i suoknu ta ding hin, lalpa, ka pu thu chu lung- muongumtak ni sienla, ka hni che a nih, a sie a ṭha lo thlier dingin lalpa ka pu chu Pathien vântirko ang el a ni sih a; chun, LALPA Pathien chu i kuomah um raw se, ka ti a nih,” a ta.

¹⁸ Chun, lal chun a dawn a, nu- hmei kuoma chun, “Ka îndawn taphawt che chu ka kuomah ieng- khawm ip naw rawh aw,” a ta. Chun, nuhmei chun, “Lalpa ka pu chun hril raw se chu,” a ta.

¹⁹ Chun, lal chun, “Hieng thua hrim hin Joab hin ṭhangna a nei am?” a ta. Chun, nuhmei chun a dawn a, “Lalpa ka pu, i thlarau hringna sâlin ka hril a nih, lalpa ka pu hin a hril taphawt chu tukhawma vawitienga manih, changtienga manih an fe khêl thei âwm nawh a, i siehlaw Joab chun a mi tir a, hieng thuhai po po hi i suoknu hi a hril vawng a nih;

²⁰ thil umdân sukdanglam dingin i siehlaw Joab chun hieng thil hi a thaw a nih; chun, ka pu chu khawvêla thil um po pohai hre theiin Pathien vântirko ang elin a var a nih,” a ta.

²¹ Chun, lal chun Joab kuomah, “Ngai ta, tuhin hi thil hi ka thaw ve tah a, chuleiin, tuhin fe la, tlangvâl Absalom chu va ṭhuoi nâwk raw le,” a ta.

²² Chun, Joab chu hmaia hnuoi sikin a bawkkhup a, chibai a bûk a, lal chun mal a sâwm a; chun, Joab chun, “Aw lalpa, ka pu chun a siehlaw hnina chu ân hlawtlingtir leiin vawisûn hin i siehlaw hin i mit ka tlung a nih ti ka lo hriet tah a,” a ta.

²³ Chuongchun, Joab chu a tho a, Gesura chun a feh a, Absalom chu Jerusalema chun a hung ṭhuoi tah a.

²⁴ Chun, lal chun, “Ama in tieng fe sienla, ka hmêl chu hung hmu naw raw se,” a ta. Chuongchun, Absalom chu ama in tieng chun a feh a, lal hmêl chu a hmu ta nawh a.

²⁵ Tuhin Israelhai po po lai Absalom ang hrima hmêl ṭhata inpâk kai tukhawm an um nawh a, a ke lêra inthawka a lusîp chenin sawisêlna hrim hrim a um nawh a.

²⁶ A lu a vâw chun (kum khat peiah a vâw hlak a, a sam chu a rik êm leiin a vâw hlak a nih) a sam chu a bûk hlak a, lal bûk dâna shekel za hni a tling hlak a nih.

²⁷ Chun, Absalom chun naupasal pathum le naunuhmei pakhat a nei a, a hming chu Tamar a na, hmêl ṭhatak a nih.

²⁸ Chuongchun, Absalom chu kum hni pumhlûm Jerusalemah a um a, nisienlakhawm, lal hmêl hrim hrim chu a hmu nawh a.

²⁹ Chuongchun, Absalom chun lal kuoma tir dingin Joab chu ân chah a; nisienlakhawm, a fe nuom nawh a; chun, ân châ nawn nâwk a, nisien- lakhawm, a fe nuom chuong nawh a.

³⁰ Chuongchun, a siehlawhai kuomah, “I aw, Joab lo chu ka lo kâwl a na, buṭei a nei a, va rawpêk vawng ro,” a ta. Chuongchun, Absalom sie- hlawhai chun lo chu an va raw tah a.

³¹ Chuongchun, Joab chu a tho a, Absalom kuomah a ina chun a feh a, a kuomah, “Iengdinga i siehlawhaiin ka lo an raw am?” a ta.

³² Absalom chun Joab chu a dawn a, “Ngai ta, ‘Iengdinga Gesura in- thawka hung am ka nih a? Chutaka chun um zing lang ka ta dingin a ṭha lem ding bah,’ tia lal kuoma tir dingin kân cha cheh a, chuleiin, lal hmêl chu mîn hmutir raw khai, chun, bawsiet- na nei ka lo ni chun mi sukhlum el raw se,” a ta.

³³ Chuongchun, Joab chu lal kuoma chun a feh a, a hril a; chun, Absalom chu a ko a, lal kuomah a feh a; chun, lal hmaa chun hmaia hnuoi sikin a bawkkhup a; chun, lalin Absalom chu a fâwp tah a.