2 SAMUEL 13 - Pathien Lekhabu Inthieng (BSI)

Amnon le Tamar chanchin

¹ Chun, David naupa Absalom chun farnu hmêl ṭhatak a nei a, a hming chu Tamar a nih. Chun, David naupa Amnon chun ama chu a hmangai a.

² Chuongchun, Amnon chu a farnu Tamar lei chun a buoi ta hle el a, a damnaw tah a; ama hlak chu nu- nghâk inthieng a ni sih a; a chunga thil ieng amani hang thaw chu Amnon ta ding chun khirtak a nih.

³ Amiruokchu, Amnon chun ruol a nei a, a hming chu Jonadab a na, David unaupa Simea naupa a nih; Jonadab chu mi var vervêktak a nih.

⁴ Chun, a kuomah, “Aw, nang lal naupa hi a ni têla iengtiziea chêr tel tel am i nih a? I mi hril nuom naw ding am a nih?” a ta. Chun, Amnonin a kuomah, “Ka unaupa Absalom farnu Tamar hi ka hmangai tlat el a nih,” a ta.

⁵ Chun, Jonadab chun a kuomah, “I khumah zâl zing la, damnaw tehlêm thaw la, chun, i pain a hung en pha che a kuomah, ‘Ka hni che a nih, ka farnu Tamar kha ka kuomah hung sienla, bei fâk ding mi hung pe sienla; chun, ka hmu theiah, ka mit- hmu ngeiah fâk ding mi buotsaipêk raw se; a kuta inthawk ngeiin lo fâng ka tih,’ lo ti raw khai,” a ta.

⁶ Chuongchun, Amnon chu a zâl a, a damnaw tehlêm tah a; chun, lalin a va en chun Amnon chun lal kuomah, “Ka hni che a nih, ka farnu Tamar kha hung sienla, ka mithmu ngeia hin beiphêk pahni mi siempêk sienla, ama kuta inthawk ngei chun lo fâng ka tih,” a ta.

⁷ Chuongchun, David chun Tamar kuoma chun, “I ṭapa Amnon in tieng fe la, fâk ding va siempêk raw khai,” tiin a inah mi a tir a.

⁸ Chuongchun, Tamar chu a ṭapa Amnon in tieng chun a feh a; ama chu a lo zâl zing a. Chun, beihlawm chu a lâk a, a hmet a, a mithmuah beiphêk chu a siem a, beiphêkhai chu a em tah a.

⁹ Chun, a emna chu a lâk a, a hmaa chun a bun a; nisienlakhawm, a fâk nuom nawh a. Chun, Amnon chun, “Mi po pohai hin mi suoksan vawng raw hai se,” a ta. Chuongchun, ama chu an suoksan ta vawng a.

¹⁰ Chun, Amnon chun Tamar kuoma chun, “I kuta inthawk ngeia ka fâk theina dingin fâk ding chu pindana hin hung la ta raw le,” a ta. Chun, Tamar chun a beiphêk siemhai chu a lâk a, a ṭapa Amnon kuomah pindana chun a lâk lût a.

¹¹ Infâktir dinga a kâwl hnaia a va fe chun a lo man a, a kuomah, “Ka farnu, hung ta zâl ei tih,” a ta.

¹² Ama chun a dawn a, “Ni lo ve, ka ṭapa, mi thawlui naw rawh, Israelhai lai hin hieng ang thil hi thaw ding a ni nawh ie, hi thil suol invêtthlâktak hi thaw naw raw khai.

¹³ Chun, keiin ka muolphona chu khâwlai am fepui ka ta? Chun, nang khawm Israelhai lai hin mi invêta ngai i ni el ding i sawnnaw. Chuleiin, lal be lem raw khai, i mi nei chu sêl chuong naw nih,” a ta.

¹⁴ Nisienlakhawm, a râwl chu a ngai nawh a, ama nêkin a hrât lem sih a, a thawlui a, a zâlpui tah a.

¹⁵ Chuongchun, Amnon chun theida namênin a theida nâwk ta si nawh a, a theidana chu ama a hma- ngai laia a hmangaina nêka nasa lemin a nih a theida chu. Chuong- chun, Amnon chun a kuomah, “Tho la, fe hmang dai rawh,” a ta.

¹⁶ Chun, ama chun a kuomah, “Chuong ang ding chu a ni nawh, hienga indiknawtaka i mi tirhmang hi ka chunga i thil thaw ta nêk hman khan a ṭha naw lem a nih,” a ta. Nisienlakhawm, ama chun a ngai chuong nawh a.

¹⁷ Chuongchun, a rawngbâwltu a siehlaw chu a ko a, “Hi nuhmei hi ka kuoma inthawkin insuoktir la, kawt kal tlat rawh,” a tih a.

¹⁸ Zakawfuol ze tum tuma ṭiel a hâk a, chuong ang zakawfuol chu lal nunghâk inthienghai chun an hâk hlak a. Chuongchun, a siehlaw chun a ṭhuoi suok a, kawt a kal ta tlat a.

¹⁹ Chun, Tamar chun a lua chun vut a phul a, zakawfuol ze tum tuma ṭiel a hâk chu a keithlêr a, a lusîpah a kut a sui a, inringtaka ṭap malam peiin a fe tah a.

²⁰ Chun, a ṭapa Absalom chun a kuomah, “I ṭapa Amnon chu i kuomah a hung lût a ni maw? nisienlakhawm, to el rawh, ka farnu, ama chu i ṭapa a ni annâwm, engto nuom naw rawh,” a ta. Chuongchun, Tamar chu a ṭapa Absalom ina chun ngûitakin ân khum ta tlat el a.

²¹ Nisienlakhawm, lal Davidin chuong thil po po a hung hriet chun a lunginsen hle el tah a.

²² Chun, Absalom chun Amnon kuoma chun a sie a ṭha, iengkhawm a hril nuom nawh a; Absalom chun a farnu Tamar chu a lo thawlui lei chun Amnon chu a theida hle a nih.

Absalom a phubalâkna le a tlân hmang thu

²³ Chun, kum hni pumhlûm a bo hnung chun Ephraim kâwla Baal- hazora chun Absalom chun berâm hmul ân vâwtir a; Absalom chun lal naupahai po po chu a fiel a.

²⁴ Chun, Absalom chu lal kuoma chun a feh a, “Ngai ta, i siehlaw chun berâm hmul ân vâwtir a, lal le a siehlawhai chu a siehlaw kuoma hin fe ve hai sienla,” a ta.

²⁵ Chun, lal chun Absalom kuomah, “Ni lo e, ka naupa, kan rêng chun fe naw ning ung, sukkhaw taluo rawi kan ti che,” a ta. Ama chun a fiel a fiel a, amiruokchu, a fe nuom chuong nawh a, mal ruok chu a sâwm a.

²⁶ Chuongchun, Absalom chun, “Annawleh, ka hni che hi, ka unaupa Amnon bêk kan kuomah hung raw se,” a ta. Chun, lal chun a kuomah, “Iengdingin am fe bîk a ta?” a ta.

²⁷ Nisienlakhawm, Absalom chun Amnon le lal naupahai chu an rênga a kuoma fe ve dingin a ngênpêk ṭâl a.

²⁸ Chun, Absalom chun a sie- hlawhai chu, “Ngai ta, Amnon chu uoin dâwna a hlim laiin in kuomah, ‘Amnon kha that ro,’ ka ti cheu chun that unla, ṭi naw ro, thu ka pêk ta cheu annâwm; insukhuoi unla, insukpasal ṭha unla,” tiin thu a pêk a.

²⁹ Chuongchun, Absalom siehlaw- hai chun Amnon chunga Absalom thupêk ang chun an thawh a. Chuongchun, lal naupahai po po chu an tho a, an sabengtung lien chi chungah an chuong seng a, an tlân hmang tah a.

³⁰ Chun, lampui kâra an la um laiin, “Absalomin lal naupahai po po a that ta vawng el a, pakhat khawm hla a nei nawh,” tiin David kuoma chun chanchin a hung tlung a.

³¹ Chuongchun, lal chu a tho a, a silfênhai a keithlêr a, hnuoiah a zâl tah a; chun, a siehlawhai po po chu an silfênhai keithlêrin a kâwla chun an ngîr a.

³² Chun, David unaupa Simea naupa Jonadab chun a dawn a, “Ka pu hin lal naupasal tlangvâlhai po po chu an that vawng ti ring naw raw se, Amnon chau a thi a nih; a farnu Tamar a thawlui chena khan Absalom chun hieng anga thaw hi a tum hrim a nih.

³³ Chuleiin, ka pu lal chun lal naupahai po po an thi amanih ti ringin, lung inhângpui naw raw se, Amnon chau a thi a nih,” a ta.

³⁴ Absalom ruok chu a tlânhmang tah a. Chun, a râl vêngtu tlangvâl chun a mit a hang inlên a, a hang en a; chun, ngai ta, a hnungtienga tlâng panga lampuia chun mi tamtak an hung a.

³⁵ Chun, Jonadab chun lal kuom- ah, “Ngai ta, lal naupahai chu an hung ie, i siehlawin a hril ang chie kha a ni ngei el,” a ta.

³⁶ Chun, a hril zo phingle chun, ngai ta, lal naupahai chu an hung tlung a, an râwl insuo meuin an ṭap a; chun, lal khawm chu a siehlawhai le chun an ṭap ta rak rak el a.

³⁷ Absalom ruok chu a tlânhmang a; Gesur lal Ammihur naupa Talmai kuomah a feh a. Chun, David chun ni tin hin a naupa chu a sûn hlak.

³⁸ Chuongchun, Absalom chu a tlânhmang a, Gesur rama chun a feh a, chutaka chun kum thum a va um a.

³⁹ Lal David chun Absalom kuoma fe chu ân hâwk êm êm a. Amnon chungchâng thua chun a thlamuong tah a, ama chu a thi ta sih a.