2 SAMUEL 11 - Pathien Lekhabu Inthieng (BSI)

David le Bathseba chanchin

¹ Chun, kum dâm a hung invawi a, lalhai indo dinga an suok hlak lai chun, Davidin Joab chu a tir a, a mihai le Israel mihai po po leh; chun, Ammon thlahai chu an suk- bohmang a, Rabba khuo an inhuol a, David ruok chu Jerusalemah a um a.

² Chun, zântieng nisa innêma chun hieng hi a hung na, David chu a khuma inthawk chun a tho a, lal in inchunga chun a hang lêng a; chun, inchunga inthawk chun nuhmei pakhat insil lai hi a hei hmuh a, chu nuhmei chu hmêl ṭhatak a nih.

³ Chun, David chun mi a tir a, chu nuhmei chanchin chu ân dawn feltir a. Chun, mi pakhatin, “Eliam naunu, Bathseba, Hit mi Uria nuhmei a ni naw am a nih?” a tih a.

⁴ Chun, David chun mi a tir a, an va ṭhuoi tah a; chun, a kuoma a va tlung chun a lo zâlpui tah a; (a felnaw zo insukthieng laitak a na) chun, a in tieng a fe nâwk tah a.

⁵ Chuongchun, nuhmei chu a hung inrai tah a, chun, “Nau ka vawn a ni tah,” tiin David chu mi ân hriltir a.

⁶ Chun, David chun Joab kuomah, “Hit mi Uria chu ka kuomah inhung- tir rawh,” tiin ân chah a. Chun, Joab chun Uria chu David kuomah ân fetir a.

⁷ Chun, Uriain a kuom a hang tlung chun, Joab le mihai chu ieng am an chang a, indonahai ieng am an chang ti ân dawn a.

⁸ Chun, David chun Uria kuomah, “I in tieng fe la, i kehai zu sâwp rawh,” a ta. Chuongchun, Uria chu lal ina inthawk chun a suok a, chun, lal chun fâk dinghai leh a hnawtzui a.

⁹ Nisienlakhawm, Uria chu a lalpa siehlawhai lai lal in kawtkhâr bula chun a zâl ve ta el a, a in tieng chun a fe ta nawh a.

¹⁰ Chun, David chu, “Uria chu a in tieng a fe nawh,” ti an hril phingleh David chun Uria kuoma chun, “Inzin hung i nih a ni naw am a nih? Ieng- dinga i in tieng i fe naw am?” a ta.

¹¹ Uria chun David kuomah, “Pathien bâwm le Israelhai le Juda- hai chu bûkah an um a, chun, ka pu Joab le ka pu mihai chu ramhnuoiah an inkul bawk a; kei ka ina fein fain dâwnin, ka nuhmei kuomah ka zâl bîk ding maw? I hringna le i thlarau hringna sâlin ka hril a nih, chu chu thaw naw tawp ka tih,” a ta.

¹² Chun, David chun Uria kuom- ah, “Vawisûn chu hitaka hin um la, zîngah fe de ti nih,” a ta. Chuong- chun, Uria chu Jerusalema chun chu ni le a zînga khawm chun a um tah a.

¹³ Chun, David chun a ko a, a hmaa chun a fâkin a dâwn a, a sukrui ta dêr a; chun, zântieng chun a in tienga fe loin a pu siehlawhai laia zâl ding chun a suok a.

¹⁴ Chun, a zîngah zîngkâr chun David chun Joab chu lekha a thawn a, Uria chu ân chawitir a.

¹⁵ Chun, lekhaa chun, “Uria chu râl zuolna laitaka inhmatâwngtir unla, an thata a thi hlauna dingin thlathlam ro,” tiin a ziek a.

¹⁶ Chun, Joab chun khuo chu ân huol vêl lai chun mi huoi huoi umna nia a hrieta chun Uria chu ân ṭhang- tir a.

¹⁷ Chun, khuoa mihai chu an hung suok a, Joab chu an hung thawh a, mi ṭhenkhat David mihai laia mi ngei khawm chu an thih a; chun, Hit mi Uria khawm chu a thih a.

¹⁸ Chuongchun, Joab chun mi a tir a, indona chungchâng thu tieng po po chu David chu a hril a;

¹⁹ chun, a mi tir kuoma chun, “Lal kuoma indona chanchin po po i hril zo hnungin,

²⁰ a lung a sen thuta, ‘Iengdinga thaw dinga khaw bul ela in fe am a na? Kula inthawkin kâp el an ti cheu ti in hriet naw am a nih?

²¹ Jerubbeseth naupa Abimelek kha tuin am a that a? Bu râwtnawina lung chunghnung lem nuhmeiin kula inthawkin a chungah a zuk thlâk a, Thebez-a khan a thi a ni naw am a nih? Iengdinga chuong kul bul ela fe am in ni a?’ a ti chun, ‘I siehlaw Uria Hit mi khawm kha a thi annaw,’ ti rawh aw,” tiin a hril a.

²² Chuongchun, a mi tir chu a feh a, a va tlung a, Joabin a tirna san po po chu David chu a hril tah a.

²³ Chun, a mi tir chun David kuoma chun, “Mihai chun an mi hung nawr a, phûlah an mi hung thawh a; keini chun an khaw lûtna kawtkhâr tlung rakin kan nawr ve thung a.

²⁴ Chun, kâptuhai chun kula inthawk chun i siehlawhai chu an kâp a, chuongchun, lal siehlaw ṭhenkhat- hai chu an thih a; chun, i siehlaw Hit mi Uria khawm kha a thi annaw,” a ta.

²⁵ David chun a mi tir kuoma chun, “Joab kuoma chun hieng ang hin va hril rawh, ‘Hieng hin i lungril chu suklâwm naw chuong naw raw se, kâwlhnâm chun tu tu khawm a thlierbîk si nawh a, nasa nâwkzuolin khuo chu thaw unla, sukse ro,’ tiin infui rawh,” a ta.

²⁶ Chun, Uria nuhmei chun a pasal Uria a thi ti a hriet chun a pasal chu a sûn a.

²⁷ Chun, a sûn hunbi a bo hnung chun David chun ama in tieng ân ṭhuoitir a, a nuhmeiah a nei tah a, naupasal a neipêk a. Nisienlakhawm, David thilthaw chun LALPA a suklungni nawh a.