2 SAMUEL 1 - Pathien Lekhabu Inthieng (BSI)

Davidin Saula thi thu a lo hriet

¹ Chun, Saula a thi hnungin, David chu Amalek mihai rûnnaa inthawkin a hung a, David chu Ziklag khuoa ni hni a um hnung chun,

² a ni thum ni chun, ngai ta, mi pakhat an ṭhanghmuna inthawk Saula kuoma mi chu a puonhai tlêr nengnungin le a lua pilvut kai nung hin a hung a; chun, David kuomah a hung tlung chun hnuoia bawkkhupin chibai a bûk a.

³ David chun a kuomah, “Khaw laia inthawka hung am i nih a?” a ta; ama chun, “Israel mihai ṭhanghmuna inthawkin ka hung tlân suok a nih,” a ta.

⁴ Chun, David chun a kuomah, “Ieng angin am thil a um a, mi hril ta khai?” a ta. Ama chun a dawn a, “Indonaa inthawk chun mihai chu an tlânseh a, mi tamtak chu an tluh a, an thi tâwl a, chun, Saula le a naupa Jonathan khawm an thi ve a,” a ta.

⁵ Chun, David chun a hriltu tlangvâl kuoma chun, “Iengtin am Saula le a naupa Jonathan chu an thi ti i hriet a?” a ta.

⁶ A hriltu tlangvâl chun, “Iengtin tin amanih Gilboa tlânga chun ka lo um kher a; chun, ngai ta, Saula chu a fei ringsana ngîr ka hmuh a, chun, tawlailîrhai le sakawr chung chuong mihai chun an hung hnai ta hle el a.

⁷ Chun, a hnungtieng a hung ngha chun a mi hei hmuh a, a mi hei ko a. Chun, kei chun, ‘Hitaka hin ka um ie,’ tiin ka dawn a.

⁸ Chuongchun, ka kuomah, ‘Tu am i nih a?’ tiin a mîn dawn a. Chun, kei chun, ‘Amalek mi ka nih,’ tiin ka dawn a.

⁹ Chun, ama chun ka kuomah, ‘Ka kâwla hin ngîr la, mi hung that el ta, ka la dam ting a, lunginzîngnain a mi tlâkkhum ta sih a,’ a ta.

¹⁰ Chuongchun, a kâwla chun ka ngîr a, chuonga tlu dêr ta hnung chu a dam zo ta âwm hrim hrima ka hriet naw leiin ka that ta el a, a lua lallukhum le bânbun chu ka lâk a, ka pu kuomah hitaka hin ka hung lâk a nih,” a ta.

¹¹ Chuongchun, David chun ama silfênhai chu a chel a, a keithlêr tah a, chuong ang bawk chun a kuoma mi um po pohai chun an thaw veh a;

¹² chuongchu, Saula le a naupa Jonathan le LALPA mihai le Israel sûnghai chun an sûn a, an ṭah a, zântieng chenin bu an nghei a, kâwlhnâma sukhlum an ni tâk leiin.

¹³ Chun, David chun a hriltu tlangvâl kuoma chun, “Khâwtieng mi am i nih a?” a ta. Ama chun, “Hmêl- mak mi, Amalek mi naupa ka nih,” a tih a, a dawn a.

¹⁴ Chun, David chun a kuomah, “LALPA hrieknâl sukbohmang dinga a chunga kutthlâk chu iengtiziea ṭi lo am i nih a?” a ta.

¹⁵ Chuongchun, David chun tlang- vâlhai laia mi pakhat chu a ko a, “Va hnai la, va that rawh,” a ta. Chun, a va sât a, a thi tah a.

¹⁶ Chun, David chun a kuomah, “I thisen chu nangma lu chung ngeiah um raw se, nangma bâu ngeiin, ‘LALPA hrieknâl chu ka that a nih,’ tiin a phuong si cheh a,” a ta.

Saula le Jonathan chunga David ṭap hla

¹⁷ Chuongchun, David chun Saula le a naupa Jonathan chu hi ṭaphla hin a ṭah a,

¹⁸ chun, thal hla chu Juda thlahai inchûktir dingin a tir tâwl a, ngai ta, Jaser bua chun ziek a nih.

¹⁹ Aw Israel, i ropuina chu i bâwlhmunahai that a na, Mi thilthawtheihai an tlu ta hi!

²⁰ Gath-a chun hril naw unla, Askelon kawtthlêrahai chun phuong bawk naw ro; Chuong naw chun Philistin naunuhai lâwm an ta, Sertan lo naunuhai hlimin khêk pal rawi an tih.

²¹ Nangni Gilboa tlânghai, In chungah dâidâw le ruo khawm tla naw raw se; thil inhlân ding khawm insuo bawk naw ro. Chutaka chun mi thilthawthei phaw chu tirdakumtakin an pei sih a; Saula phaw, hrieknâl lo mi phaw ang elin.

²² Thathai thisena inthawk le, mi thilthawthei thâua inthawk chun, Jonathan thal chu a lêt nawh a; Saula kâwlhnâm chu a thlâwnin a lêt bawk nawh.

²³ Saula le Jonathan umdân chu dit a umin a mâwi a, An thi khawma an inṭhe nawh; Mupuihai nêkin an ṭuonrang lem a, Sakeibakneihai nêkin an hrât lem.

²⁴ Nangni Israel naunuhai, Saula chu ṭa ro, Puon sen mawihaia inthuom cheu a, In puonahai rângkachaka cheimawinahai belpêktu cheu chu.

²⁵ Indo lai taka mi thilthawtheihai an tlûk el chu! I bâwlhmunahai Jonathan chu an that tah.

²⁶ Ka unaupa Jonathan, i chungthua hin ka lunginzîng a nih; Ka chungah i ṭha êm êm hlak a, I mi hmangaina chu a mak a, Nuhmei hmangaina chu a khûm dai a nih.

²⁷ Mi thilthawtheihai chu an tluh a, Indona thuomhnawhai khawm a bohmang zo tah!