2 KORINTH 3 - Pathien Lekhabu Inthieng (BSI)

Thuthlung Thara rawngbâwltuhai

¹ Mâni inhrilmawi ei phut nâwk ding a ni ta maw? Annawleh, in kuoma pêk ding amanih, in kuoma inthawk amanih hrilmawina lekha, mi ṭhenkhat ta dinga a ngai angin, kan ta dingin a ngai ve ding a ni maw?

² Nangni hi kan lekha, kan lungrila ziek, mi po po ihriet le tiem chu in nih,

³ Krista lekha, keini a mîn ziektir, lekhatuia ziek nilo, Pathien hring Thlaraua ziek lem, lung phêka ziek niloa, tisa lung phêka ziek lem chu in nih, ti chiengtaka inlangtir a ni sih a.

⁴ Chun, Pathien tienga chuong ang ringna chu Krista zârah kan nei a nih;

⁵ iengkhawm keinia inthawka suoka ruot dingin keini ngawtin kan tlin kan ti nawh a; kan tlin theina chu Pathien kuoma inthawk a ni lem.

⁶ Ama bawk chun thuthlung thar rawngbâwltuahai a mîn tlin tir a; lekha thu ela rawngbâwltuahai ni loin, Thlarau rawngbâwltuahai a ni lem; lekha thu ngawt chun a sukhlum hlak sih a. Thlarau ruok chun a sukhring hlak a nih.

⁷ Mosie hmêl a ropui leiin Israel nauhai chun a hmêl an en zing thei nawh a. (chu ropuina chu a bo ta riei riei a), thina rawngbâwlna lunga hawrawpa ziek hman, chuong ang khawpa ropuiin a tlung chun,

⁸ Thlarau rawngbâwlna chu ieng ang taka ropuiin am a tlung ding chu?

⁹ Thiemnaw inchangtirna rawng- bâwlna hman a ropui chun, felna rawngbâwlna chu ropuina tieng chun a nasa lem bêk bêk ding a nih.

¹⁰ Sukropuia um ta chun, hi tieng panga hin ropuina hrim a nei si nawh a; ropuina nasa chun a khûm leiin.

¹¹ Bo riei riei ta hman chu ropuia a tlung chun, um zing ding chu ropuia tuomin a um lem bêk bêk ding a nih.

¹² Chuongchun, chuong ang bei- seina chu kan nei leiin iengkim kan hril suok hlak a nih;

¹³ Mosie thaw ang khan kan thaw ve nawh, ama chun bo ta riei riei bo tâwpna chu Israel nauhaiin an en zing nawna dingin a hmai chu hmai inkhumnain ân khum a.

¹⁴ An lungril ruok chu sukngarin a um ta lem a; vawisûn chen khawm hin thuthlung hlui chu an tiemin inkhumna pângngai chu hlîm loin a um zing sih a; chu inkhumna chu Kristaa chun sukboin a um tah a.

¹⁵ Nisienlakhawm, vawisûn chen hin Mosie Lekhabu an tiem po leh an lungrila chun inkhumna chu a um hlak.

¹⁶ Nisienlakhawm, an lungril Lalpa tienga an nghat tik tik inkhum- na chu lâkhmang ni tâng a tih.

¹⁷ Chun, Lalpa chu Thlarau chu a na, Lalpa Thlarau umna taphawta chun zalênna a um hlak.

¹⁸ Chuongchun, keini chu kan rêngin hmai inkhum loin, hlimen anga Lalpa ropuina sunvarin, ropui- naa inthawka ropui peiin, chu angpui ngeia um dingin, sukdanglamin kan um hlak, Lalpaa (Thlaraua) inthawk- a kan hmu ang peiin.