2 KORINTH 10 - Pathien Lekhabu Inthieng (BSI)

Paulain a rawngbâwlna a hliekhu

¹ Chun, kei Paula, nangni laia in mithmua thuhnuoirawltaka um a, nangni laia umnaw phingleh nangni tieng zuom si hlak ngei hin, Krista zaidamna le nunnêmnain ka ngên cheu.

² Anih, in kuomah ka um pha, ṭhenkhat, tisa anga uma mi ruottuhai chunga huoitaka um ka tum ngamna ang hin, ka zuom nawna ding cheuin ka ngên cheu.

³ Tisaa, um inlang khawm tisa indo angin kan indo nawh a,

⁴ (keini râldo inthuomna chu tisaah a ni si nawh a, kulpui dettak- hai ṭhiekna dinga Pathien zâra thil thaw thei tak a ni lem),

⁵ insêlnahai le thil insâng tinrêng Pathien hrietna hluotu dinga insângtaka siemhai chu ṭhiekin, ngaituona tinrêng Krista thuawina salah kan ṭhuoi a,

⁶ in thu awizie a famkim pha chun thuawi nawna po po phuba la dingin kan inzo bawk a.

⁷ In mithmua thil umhai chu a nih in en hlak chu. Tûkhawmin Krista ta nia ân ring chun, hi hi mâkhâtin ngaituo nâwk raw se; ama chu Krista ta a ni ang bawkin keini khawm kan ni ve hi.

⁸ Kan thuneina (Nangni ṭhiekna ding ni loa nangni siem ṭhatna dinga Lalpain a mi pêk hi), suong nasa nâwk zuol lang khawm ka muolpho âwm si nawh a,

⁹ ka lekhathawnhai chun sukṭit cheu tum anga kân lang nawna dingin chu chu ka ti a nih.

¹⁰ “A lekhathawnhai chu a rikin a ngar a, a taksa tieng ruok chu a âwmnêm a, a ṭawng khawm insit a um a nih,” an ti sih a.

¹¹ Chuong ang mi chun hi hi ngaituo raw se, in kuoma kan um naw laia lekhathawna thua kan um angin, in kuoma kan um pha khawm thil thawah um bawk kan tih.

¹² Ṭhenkhat mâni le mâni inhril- mawihai laia chun kan intiem sa ngam nawh a, anni leh hril khawm kan inhrilkhi ngam bawk nawh; amiruokchu, anni chu mâni le mâni inkhiin, mâni le mâni inhrilkhiin lungril nei loin an um a.

¹³ Keini ruok chu kan inkhîna bâka chun uong naw ning ungah. Pathienin biel a mîn changtir a, chu inkhîna ang pei chun uong lem kan tih, nangni chen khawm hung biel rau dinga inkhîna chu.

¹⁴ Biel phâk naw sa biel cheu angin kan huop lien taluo si nawh a; Krista Chanchin Ṭha hrilin in khuo chen khawma kan hung kha;

¹⁵ kan inkhina huntâwk liema, mi dang thaw sâwlhai chu, kan suong nawh a, in ringna ân ṭhang ang peiin, kan biel chin ang peiah, nangni lai nasataka suklienin um kan tih ti beiseina kan nei lem a,

¹⁶ buotsai sa kawng thua chun mi dang biel suong loin, in khêl tieng ram chen khawma Chanchin Ṭha kan hril theina dingin.

¹⁷ Nisienlakhawm, “A suong ta- phawt chun Lalpa chu suong raw se.”

¹⁸ Mâni inhrilmawi chun inpâk a hlaw si nawh a, Lalpain a hrilmawi chun inpâk a hlaw lem hlak.