1 SAMUEL 4 - Pathien Lekhabu Inthieng (BSI)

¹ Chun, Samuel thu chu Israel mi po po lai chun ân thang suok tah a.

Philistin mihaiin Thuthlung bâwm an man Chun, Israel mihai chu Philistin mihai do dingin an fe suok a, Ebenezer kâwlah ṭhanghmun an khuor a; Philistin mihai ruok chun Aphekah ṭhanghmun an khuor a.

² Chun, Philistin mihai chu Israel mihai lo dang dingin an lo inzar dar a; chun, an hang inthaw chun Philistin mihai hmaa chun Israel mihai chu an tlâwm tah a; indona hmuna chun sipai sâng li lai amanih an that a.

³ Chun, mipuihai chu an riek- hmuna an fe chun Israel upahai chun, “Ieng leia vawisûn hin Philistin mihai hmaa LALPAIN a mi suk- tlâwm am a nih aw? Ei kuoma um a, ei hmêlmahai kuta inthawka mi sandam dingin Siloa inthawkin LALPA thuthlungna bâwm kha hang lâng ei tiu,” an ta.

⁴ Chuongchun, mipuihai chun Siloa chun mi an tir a, chutaka in- thawk chun cherubim chunga ṭhung, sipaihai LALPA thuthlung bâwm chu an va lâk tah a; Pathien thuthlung bâwm an lâknaa chun Eli naupasal- hai pahni Hophni le Phinehas an ṭhang veh a.

⁵ Chuongchun, LALPA thuthlung bâwmin an riekhmun a hung tlung chun, Israel mi po pohai chu inring- takin an khêk ta dur dur el a, hnuoi chen khawm a tlawr ri dur dur el a.

⁶ Chun, Philistin mihaiin an khêkri an hriet chun, “Hebraihai riekhmuna khêkri inri ta dur dur el chu iengtizie am a ni ta leh?” an ta. Chun, an riekhmuna chun LALPA bâwm a hung tlung a nih ti an hriet tah a.

⁷ Chun, Philistin mihai chun an ṭi tah a, “Riekhmuna chun Pathien a hung a ni ta chu teh,” an tih a. “Ei chung a rik ie, kha hma khan chuong ang chu a um ngai si nawh a.

⁸ Ei chung a rik ie! chuong pathienhai kut hrâttaka inthawk chun tuin am mi sandam a ta? Chuong pathienhai chu an nih, Aigupta mihai thlalêra hri tinrênga sukhlumtu chu.

⁹ Aw, nangni Philistin mihai, in siehlawa an um ang khan Hebraihai siehlawah in um nawna dingin hrâttakin um unla, insukpasal ro khai, insukpasal unla thaw pei ro,” an ta.

¹⁰ Chuongchun, Philistin mihai chun an hang thawh a, Israel mihai chu an tlâwm a, an puonin tieng seng an tlân ta vawng a; an that nasa êm êm el a, Israelhai laia sipai sîng thum an thi a nih.

¹¹ Chun, Pathien bâwm chu an lâkpêk a; Eli naupahai pahni, Hophni le Phinehas chu an that bawk a.

¹² Sipai laia Benjamin thla, mi pakhat a tlân a, a puonhai tlêr nung le a lua pilvut kai rakin chu ni ngei chun, Silo chu a va tlung a.

¹³ Chun, a va tlung chun, Eli chun lampui sîra a ṭhungnaa ṭhung pumin a lo thlîr zing a, Pathien bâwm lei khan a lungrilin ân thin ân thin a. Chun, ama chun khuo a hang tlung a, chanchin chu a hang hril chun a khuoin an khêk ta veng vung el a.

¹⁴ Eli chun an khêkri chu a lo hrietin, “Chu inri mur mur chu iengtizie am a na?” a ta. Chun, mi chu inhmawtakin a va feh a. Eli chu a va hril a.

¹⁵ Eli chu kum sâwmkuo le kum riet mi a na, a mit ân thim tah a, khuo a hmu thei ta nawh a.

¹⁶ Chun, mi chun Eli kuoma chun, “Sipai laia inthawka hung ka ni hi, vawisûn hin sipai laia inthawka hung tlân ka nih,” a ta. Ama chun, “ka naupa, ieng angin am thil a um a?” a ta.

¹⁷ Chanchin hung intluntu chun a dawn a, “Israel mihai chu Philistin mihai hmaa chun an tlânseh a; chun, mipui lai chun inthatna nasatak a um bawk a; i naupahai pahni Hophni le Phinehas khawm an thih a; Pathien bâwm khawm an lâkpêk tah,” a ta.

¹⁸ Chun, Pathien bâwm thu a hang hril phingle chun kawtkhâr bula ṭhungnaa inthawk chun a thalin a tluh a, a ring a tliek a, a thi tah a, ama hi a tar êm leiin ân dâwl zo ta naw a nih. Israel chunga kum sâwmli rorêl tah a nih.

¹⁹ Chun, a monu Phinehas nu- hmei chun nau a vawn a, a nei a hnai ta hleh a, Pathien bâwm an lâkpêk ti thu a hang hriet a, a tarpupa le a pasal an thi ti a hang hriet chun, a kûn a, nau chu a nei tah a, a nauha chun ama a hung nang nghâl ta sih a.

²⁰ Chun, a thi vâng vâng laia a kâwla ngîr nuhmeihai chun a kuomah, “Ṭi naw rawh, naupasal i nei ta hi,” an ta. Nisienlakhawm, ama chun a dawn dêr nawh a, a ngaisak bawk nawh a.

²¹ Chun, “Ropuina chun Israel- hai chu a suoksan tah,” tiin, nau- pang hminga chun Ikabod a sak a. Pathien bâwm chu an lâkpêk tah a, a tarpupa le a pasal khawm an thi ta sih a.

²² “Ropuina chun Israel chu a suoksan tah a, Pathien bâwm chu an lâkpêk ta sih a,” a ta.