1 SAMUEL 3 - Pathien Lekhabu Inthieng (BSI)

Lalpain Samuel a ko

¹ Chun, naupang Samuel chun Eli hmaa chun LALPA rawng a bâwl a. Chuong lai chun LALPA thu chu a hlu hle el a, ân langa inlârnahai a um nawh a.

² Chun, hieng hi a hung na, Eli chu ama hmuna a zâl laiin (a mit ân thim ta deu a, khuo a hmu ṭha thei mang ta nawh a),

³ Pathien khâwnvar khawm a la thi hmain, Pathien bâwm umna LALPA biek ina chun Samuel chu a hang zâl a;

⁴ LALPA chun Samuel chu a ko a, ama chun, “Hitaka hi ka um,” a ta.

⁵ Chun, Eli kuoma chun a va tlân a, a kuomah, “Hitaka hi ka um, i mi ko a,” a ta. Ama chun, “Ka ko naw che ie, va zâl nâwk ta rawh,” a ta.

⁶ Chun, LALPA chun Samuel chu a ko nâwk a. Samuel chu a tho a, Eli kuoma chun a feh a, “Hitaka hi ka um, i mi ko a,” a ta. Ama chun a dawn a, “Ka ko naw che ie, ka naupa, va zâl nâwk ta rawh,” a ta.

⁷ Chuong lai chun Samuel chun LALPA a la hriet nawh a, LALPA thu a kuoma phuong a la ni naw bawk a.

⁸ Chun, LALPA chun Samuel a ko nâwk a, chu chu a vawi thumna a nih. Chun, a tho a, Eli kuoma chun a feh a, “Hitaka hi ka um, i mi ko a,” a ta. Chuongchun, Eli chun naupang chu LALPAIN a ko a nih ti a lo hriet tah a.

⁹ Chuleiin, Eli chun Samuel kuom- a chun, “Fe la, va zâl nâwk phawt la, a ko nâwk che chun, ‘LALPA, thu hril rawh, i siehlaw hin a ngai zing,’ ti el rawh” a ta. Chuongchun, Samuel chu a hmuna chun a va zâl nâwk tah a.

¹⁰ Chun, LALPA chu a hung a, a hung ngîr a, a hmaa a ko ang khan, “Samuel, Samuel,” tiin a ko nâwk a. Chuongchun, Samuel chun, “Thu hril rawh, I siehlaw hin a ngai zing,” a ta.

¹¹ Chun, LALPA chun Samuel kuoma chun, “Ngai ta, Israel rama hin a hre taphawthai na chu a khing hni hnia a ṭhâwng zâwngtakin thil ka thaw ding a nih.

¹² Chu ni chun a sûngkuo chung- châng thu ka hril po po chu a bula inthawka a tâwp chenin Eli chunga hin ka thaw ding a nih.

¹³ A nauhaiin Pathien an hrilsiet- na suol chu hre zing pumin a khap naw leiin a sûngkuo chu kumkhuoa dingin ka ngaituo ding a nih ti ka hril ta sih a.

¹⁴ Chuleiin, Eli sûngkuo kuoma chun Eli sûnghai bawsietna chu in- thâwinain amanih, thilinhlânin ama- nih iengtika khawm sukkieng thei ni naw nih, tiin ṭawng kân khâm tah a nih,” a ta.

¹⁵ Samuel chu zingkâr chenin a zâl a; chun, LALPA in kawtkhârhai chu a hawng a, Samuel chun chuong inlârna chu Eli inhriettir ding chu a ṭih a.

¹⁶ Chun, Eli chun Samuel chu a ko a, “Samuel, ka naupa,” a ta. Ama chun, “Hitaka hin ka um,” a ta.

¹⁷ Chun, ama chun, “Ieng thil am LALPA chun i kuomah a hril lie? Ka kuoma hin iengkhawm ip naw rawh aw; i kuoma a hril po po chu ka kuomah ip i nei chun i chungah Pathien chun a thaw thawin thaw sienla, chu nêka nasa khawmin,” a ta.

¹⁸ Chun, Samuel chu a hung a, iengkim el chu a hril fai vawng a, a kuoma chun iengkhawm ip a nei nawh a. Chun, ama chun, “LALPA a nih annâwm, ṭha a ti ang peiin thaw raw se,” a ta.

¹⁹ Chun, Samuel chu a hung in- ṭhanglien deu deu a, a kuomah LALPA a um pei a; a thu hrim hrim chu lei- hnuoiah ân luonghmangtir el nawh a.

²⁰ Chuongchun, Dana inthawka Beer-seba tlung rakin Israel mi po pohai chun Samuel chu LALPA zâwlnei dinga sukdet a ni tah ti an hriet tah a.

²¹ Chun, LALPA chu Siloa chun ân lâr nâwk a; LALPA chu thuin Samuel kuoma chun Siloa chun ân lâr a ni sih a.