1 SAMUEL 27 - Pathien Lekhabu Inthieng (BSI)

Philistin mihai laia David a chêng

¹ Chun, David chun a lungrilin “Iengtika mani chu Saula kuta hin ka la bohmang ngei ding chu a ni hi; Philistin mihai rama tlânhmang nêka ṭha hi a um naw ding a ni hi; chuongchun, Saulan Israel ram sûng po poa a mi zawng hi beidawng tâng a ta, chuongchun, a kuta inthawka suok nîng ka tih,” a ta.

² Chuongchun, David chu a tho a, a kuoma mi za ruk umhai le chun Maok naupa Gath lal Akis kuomah an fe tah a.

³ Chun, David chu ama le a mihai leh, mi tin an sûngkuoin, David khawm a nuhmei pahnihai Jezreel mi Ahinoam le Nabal nuhmei Karmela mi Abigail leh, Gath khuoha Akis kuomah an um tah a.

⁴ Chun, David chu Gath khuoah a tlân ti Saula chu an hril a, chuong- chun, a zawng nâwk ta nawh a.

⁵ Chun, David chun Akis kuomah, “Mi lunginsiet la, i rama khuo pa- khata hin umna hmun mi pe hai sienla, chutaka chun um ka tih; i siehlaw hi iengdingin am lal khuoah um zing a ta?” a tih a.

⁶ Chuongchun, Akis chun chu ni chun Ziklag khuo chu a pêk tah a: chuleiin, Ziklag khuo chu tu chen hin Judai ram lalhai ta a ni ta zing a.

⁷ Chun, Philistin rama David a um sûng chu kum khat pumhlûm le thla li a nih.

⁸ Chun, David le a mihai chu an hang feh a, Gesur mihai dâm, Girzi mihai dâm, Amalek mihai dâm an rûn a; chuong hnamhai chu tienlaia inthawkin Sur ram tieng pang Aigupta ram chena um an nih.

⁹ Chun, David chun ram chu a thaw a, a nuhmei a pasalin hla hrim hrim a nei nawh a, berâmhai dâm, sebâwnghai dâm, sabengtunghai dâm, sanghâwngseihai dâm, an silfên dâm a lâkpêk a; chun a kîr nâwk a, Akis kuomah a feh a.

¹⁰ Akis chun, “Vawisûn hin khaw tieng am i rûn a?” a ta. David chun, “Juda Sim ram dâm, Jerahmeel Sim ram dâm, Ken mihai Sim ram dâm,” a ta.

¹¹ Chun, David chun, “Philistin rama a um sûng hrim hrimin, ‘David chun hieng ang hin a thaw rawp hlak a nih,’ ti rawi an tih,” tiin a nuhmei a pasalin Gath khuoa ṭhuoi ding hrim hrim a hla naw a nih.

¹² Chun, Akis chun David thuhril chu awiin, “Ama le ama hi Israel mihai ân theidatir ta hle el a, chu- leiin, kumkhuoin ka siehlawah um a tih,” a ta.