1 SAMUEL 19 - Pathien Lekhabu Inthieng (BSI)

Saulân that dingin David a zawng

¹ Chuongchun, Saula chun a naupa Jonathan le a siehlaw- hai po po chu David chu that dingin a hril a.

² Nisienlakhawm, Saula naupa Jonathan chun David chu a ngaina hle el a. Chuongchun, Jonathan chun David chu, “Ka pa Saula chun that a tum cheh a, chuleiin, zîngah zîngkâr chun fîmkhur la, hmun inthupah inbi zing raw khai;

³ chun, fe suok ka ta, i umna phûlah ka pa kâwlah va ngîr ka ta, i chungchâng thuah ka pa bieng ka ta, ieng amanih ka hriet chun hril ka ti che,” a ta.

⁴ Chun, Jonathan chun a pa Saula hmaa chun David chu ân pâk a, a kuomah, “Lal chun a siehlaw chung- ah, David chunga hin thil suol thaw lul naw raw se, i chungah iengkhawm a suksuol si nawh a, a thilthawhai chu i ta dinga ṭhatak a ni sih a;

⁵ thi dâwn loin Philistin mi kha a thawh a, chun LALPAIN Israel mihai po po sandamna ropuitak a thaw- suokpêk a, chu chu nang khawma i hmuh a, lâwm khawm i lâwm hle kha; chuleiin, a san iengkhawm um loa David chu thatin, ieng dingin am thisen pawi tâwklo chunga chun thil suksuol el i ta?” a ta.

⁶ Chuongchun, Saula chun Jona- than rawl chu a ngai a, Saula chun, “Ṭawng inkhâmin, LALPA hringna sâlin ka hril a nih, ama chu sukhlum ni naw tawp a tih,” a ta.

⁷ Chun, Jonathan chun David chu a ko a, Jonathan chun chuong thil po po chu a hril a. Chun, Jonathan chun David chu Saula kuoma chun a ṭhuoi a, inhma ang bawk khan a kuoma chun a um nâwk tah a.

⁸ Chun, indona a hung um nâwk a, chuongchun, David chu ân thawk suok a, Philistin mihai chu a va thawh a, a va that ṭeu a, a hmaa chun an tlânseh a.

⁹ Chun, Saula chu a ina fei chawia a ṭhung laiin LALPA tir khawhri a chungah a hung tlung a; chun, David chun ṭingṭang a kei a.

¹⁰ Chun, Saula chun a fei chun David chu banga khâwde tlat a tum a; nisienlakhawm, Saula kuoma in- thawk chun a fe hmang vat a, fei chu banga chun a khâw bûr ta chut el a; chun, David chu a tlân suok a, chu zân chun a him tah a.

¹¹ Chun, Saula chun David chu in tienga zîngkâra lo inchâna that dingin mi a tir a; chun, David nuhmei Mikal chun, “Vawizân hin i hringna i humhim naw chun, zînga hin an that ding che a nih,” tiin a hril a.

¹² Chuongchun, Mikal chun David chu tukverah a thlâk thla a, chuongchun, a tlân hmang a, a him tah a.

¹³ Chun, Mikal chun milim chu a lâk a, khuma chun ân zâltir a; chun, a lu tieng chun kêl hmul lukham a sieh a, puonin ân khum a.

¹⁴ Chun, David ṭhuoi dinga Saulan mi a hung tir chu, “A dam nawh,” a lo ta.

¹⁵ Chun, Saula chun David va en dingin mi a tir a, “A khum pumin hung zâwn suok unla, lo that el ka tih,” a ta.

¹⁶ Chun, a mi tirhai chu an va lût chun, ngai ta, khuma chun milim chu a lu tienga kêl hmul lukham khamin a lo um a.

¹⁷ Saula chun Mikal kuoma chun, “Ieng dinga hienga i mi hlêm a, a himna dinga ka hmêlma chu în suoktir am a na?” a ta.

¹⁸ Tûn David chu a tlân hmang a, a him tah a, Rama khuoa Samuel kuomah a va tlung a, a chunga Saula thilthawhai po po chu a hril a. Chun, ama le Samuel chu an feh a, Naiothah an um a.

¹⁹ Chun, Saula chu, “Ngai ta, David chu Rama khuoa Naiothah a um” ti an hril a.

²⁰ Chuongchun, David chu va ṭhuoi dingin Saula chun mitirhai a tir a, chun, zâwlnei ruolin thu an hril duol duol lai le Samuel an chunga hotua um an va hmu chun, Saula mitirhai chunga chun Pathien thlarau a hung tlung a, anni khawm chun thu an hril ve ta duol duol a.

²¹ Chu chu Saula an hang hril chun, mi dang a tir nâwk a, anni khawm chun thu an va hril ve ta duol duol el a.

²² Chuongchun, ama khawm chu Rama khuoa chun a fe ve tah a; chun, Seku hmuna tuisunsuo lientak hmun chu a va tlung a, “Samuel le David hi khâwlai am an um a?” tiin ân dawn a. Chun, tuin amani hin, “Ngai ta, Rama khuoa Naiothah an um,” a ta.

²³ Chuongchun, Rama khuoa Naiotha chun a feh a, chun, Pathien thlarau chu a chunga chun a hung tlung ve tah a, a fe pei a, Rama khuoa Naioth a tlung hmakhat chun thu a hril malam pei a.

²⁴ Chun, ama khawmin a silfênhai a hlîp veh a, Samuel hmaa chun thu a hril ve ta nuk nuk a, chu ni zânkhuo le sûnnithlâk chun ruokin a zâl a. Chuleiin, “Saula khawm chu zâwl- neihai lai a ṭhang ve el am a ni tah?” ti hi an chîng sawng tah a.