1 KORINTH 6 - Pathien Lekhabu Inthieng (BSI)

Awinawhai hmaa inhêk

¹ Nangni laia tûkhawmin mi dang chungah thubuoi nei unla mi inthienghai hmaa tlun loin mi felnawhai hmaah in tlun ngam ding am a nih?

² Anleh, mi inthienghai chun khawvêl hi an ngaituo ding a nih ti in hriet naw am a nih? Chun, khawvêl hman hi in ngaituoa um ding a ni chun, thil chîntakhai khawm chu ngaituo tlâklo in ni ding am a nih?

³ Tulai dam sûng khawsak thu chu hrillo, vântirkohai chen khawm ei ngaituo ding a nih ti in hriet naw am a nih?

⁴ Chuongchun, tulai dam sûng khawsak thuhai ngaituo ding in neiin kohran laia mi hmusitumhai chu in inngaituotir hlak am a nih?

⁵ In inzakna dingin ka hril a nih. A unau kâra thu sukthlu thei, mi var pakhat bêk nangni lai in hmu thei naw nîng a ti maw!

⁶ Unauin a unau rorêlnaa ân tlun hlak hi? Awilohai hmaah a ni nâwk nghâl sih a.

⁷ Anih, hi hi in fel zo zânnawna pakhat chu a ni pang el, thubuoi in nei intuo hlak hi. Iengdinga in- diknawtaka thawna chu in tuor lem el naw am a na? Iengdinga suk- dâwngna chu in tuor el naw?

⁸ Anih, nangni ngei khawmin in unauhai chungah in sukdik nawh a, in sukdâwng hlak.

⁹ Anleh, mi felnawhai chun Pathien ram hluo naw ni hai ti in hriet naw am a nih? Hlêmin um naw ro; indithmanghai amanih, milim betuhai amanih, uirehai amanih, mihurhai amanih, mawngkawhurhai amanih,

¹⁰ inruhmanghai amanih, mi du- âmhai amanih, zu inruihmanghai amanih, inhalhmanghai amanih, hlêpruhaiin amanih Pathien ram hluo naw ni hai.

¹¹ Chun, nangni ṭhenkhat chuong ang mi in ni hlak kha; nisienla- khawm, Lalpa Isu Krista hminga le ei Pathien Thlaraua sâwpfai in ni tah a, sukthieng in ni tah a, thiemchang in ni tah.

Taksaa Pathien chawimawi

¹² Thil iengkim thaw ka ta dingin a thieng a; nisienlakhawm, thil iengkim thaw a ṭha kher nawh; thil iengkim thaw ka ta dingin a thieng a; nisienlakhawm, ieng thu hnuoia um khawm kân phal nawh.

¹³ Fâk dinghai chu phîng ta ding a na, phîng chu fâk dinghai ta ding a nih; nisienlakhawm, Pathienin sukbo ve vêng a tih. Chun, taksa hi inditna ding a ni nawh a, Lalpa ta ding a ni lem: Lalpa khawm chu taksa ta ding a nih.

¹⁴ Pathienin Lalpa chu a keitho a, eini khawm a thilthawtheinain mi keitho vêng a tih.

¹⁵ In taksahai chu Krista pênghai a nih ti in hriet naw am a nih? Krista pênghai chu lâkpêkin nawchizawr pênghaiah ka siem ding am a nih? Teu lo e!

¹⁶ Anleh, nawchizawr zawmpui chu ama leh pumkhat an nih ti in hriet naw am a nih? “An pahniin tisa pumkhat hung ni tâng an tih” ti ziek a ni sih a.

¹⁷ Lalpa inzawmpui ruok chu ama leh Thlarau pumkhat an nih.

¹⁸ Indit hi tlânsan ro. Mihriem isuksuol tinrêng hi taksa puotiengah a nih; mi dithmang ruok chun ama taksa chungah a suksuol a nih.

¹⁹ Anleh, in taksa chu in sûnga um Pathien kuoma inthawka in hmu Thlarau Inthieng in a ni ti in hriet naw am a nih? Mâni ta khawm in ni nawh a,

²⁰ mana inchâwk in ni tah in sawnnaw; chuleiin, in taksaa chun Pathien chawimawi ro.