1 KORINTH 16 - Pathien Lekhabu Inthieng (BSI)

Mi inthienghai ta dinga thawlâwm

¹ Chun, mi inthienghai ta dinga thawlâwm thu kha chu, Galati rama kohran hai kuomah thu ka pêk angin nangni khawmin lo thaw ve ro.

² Ni saria ni hmasatak peia chun mi tinin, malsâwmna in hmu zie ang peiin siekhâwl seng unla, ka hung phaa thawlâwm dâwl hrim a um nawna dingin.

³ Chun, in lunginsietna thilpêk chu Jerusalema fepui dingin ka hung tlung phaleh tûkhawm ṭha in ti ti lekhahai chawiin tir ka tih.

⁴ Chun, ka fe vena âwm a ni lem chun, kei leh fêng an tih.

Ân zin tumna

⁵ Chun, Makedonia ram ka fang suok hnungin in kuomah hung ka tih: Makedonia ram chu ka fang hrim hrim ding a ni sih a.

⁶ Nangni kuoma ruok chu ka châm zing a ni thei, thlasik sûng po khawm a ni el thei; khâwlai khawm ka fena taphawta nangniin in mîn thla theina dingin.

⁷ Tuta fe malam ela hmu cheu ka nuom nawh a, Lalpain rem a ti chun in kuoma sâwt deu châm ka beisei sih a.

⁸ Nisienlakhawm, Pentikost chen Ephesia hin châm zing ka tih,

⁹ kawtkhâr lientak le ṭangkai tak chu ka ta dingin ân hawng sih a, dotuhai tamtak an um bawk.

¹⁰ Chun, Timothe kha a hung tlung chun ṭi loa in kuoma a umna dingin fîmkhur ro; keiin ka thaw ang bawkin Lalpa sin chu a thaw sih a.

¹¹ Chuleiin, tûkhawmin hmusit naw raw se; ka kuoma a hung theina dingin thlamuongtakin inthla lem ro, unauhai ruolin ama lo hmu ka beisei sih a.

¹² Ei unau Appolo thu kha chu, unauhai ruola in kuoma hung dingin ka ngên rak a, ana chu, tuta ṭum chu hung a nuom naw tawp el; a remchâng pha ruok chu hung a tih.

Infuina le inthlana

¹³ Invêng unla, ringnaa chun ngîr det unla, insukhuoi unla, hrâttakin um ro,

¹⁴ In thaw taphawt chu hmangai- naa thaw ni raw se.

¹⁵ Unauhai, ka ngên cheu a nih: Stephan sûnghai chu Akaia rama awihai hmaṭhuoitu an na, mi inthienghai rawng bâwl dingin an inpêk ti in hriet a,

¹⁶ chuong ang mihai kuoma le sinthawa ṭhangpui le sin inrim taphawt kuoma chun intuklût dingin.

¹⁷ Chun, Stephan hai, Phortunata hai, Akaika hai an hung hi ka lâwm a nih, in um naw khawm inlang loa an mi siem lei hin.

¹⁸ Anni hin ka lungril le nangni lungril an mi sukhar sih a; chuongchun, hieng ang mi hi lâwm ro.

¹⁹ Asia ram kohranhai hin chibai an bûk cheu. Akuila le Priskilla, an ina kohran inkhawmhai le hin Lalpaa chun chibai tamtakin an bûk cheu.

²⁰ Unau po po hin chibai an bûk cheu. Infâwp inthiengin chibai inbûk seng ro.

²¹ Kei Paulain keima kut ngeia chibai ka bûkna cheu a ni hi.

²² Tûkhawmin Lalpa a hmangai naw chun ṭawngsephurin um raw se. Ei Lalpa chu a hung ie.

²³ Lalpa Isu Krista lunginsietna chu in kuomah um raw se.

²⁴ Krista Isua ka hmangaina hi in rênga kuomah um raw se. Amen.