1 JOHAN 1 - Pathien Lekhabu Inthieng (BSI)

Hringna Thu chu

¹ Hringna Thu a tîra inthawka um kha, kan nâin kan ihriet kha, kan mitin kan ihmu kha, kan en zinga kan kuta kan idap kha, chu chu chanchin chu;

² (chu hringna chu a hung inlang tah a, kan lo hmuh a, kan inhriettir bawk a, chu chatuon hringna, Pa kuoma um, kan kuoma hung inlang chu, kan hril cheu a ni hi);

³ chu kan ihriet le kan ihmu chu in kuomah kan hril ve cheu a ni hi, nangni khawma in mi pâwl ve theina dingin; anih, keini pâwlna chu Pa le a Naupa Isu Krista pâwlna a nih.

⁴ Chuongchun, kan lâwm a fam- kim theina dingin hieng thuhai hi in kuomah kan ziek a ni hi.

Pathien chu var a nih

⁵ Chun, thuincha a kuoma in- thawka kan hriet a, in kuoma kan hril sâwng ding cheu chu hi hi a nih:— Pathien chu var a nih, amaa chun inthim hrim a um nawh.

⁶ Inthima um siin, “Ama ka pâwl,” ei ti chun khêl ei hril a nih, thutak khawm chu ei zâwm nawh.

⁷ Amiruokchu, ama chu vara a um angin eini khawm vara um ei ni chun, ei inpâwl tlâng a nih, chun, a Naupa Isu thisenin ei suol po po a mi sâwpfai pêk hlak a nih.

⁸ “Suol ka nei nawh,” ei ti chun mâni le mâni ei inhlêm fâwm a, thutak khawm chu einiah a um naw a nih.

⁹ Ei suolhai thupha ei chawi chun, ei suolhai ngaidam ding le, ei felnaw- na po po sâwpfai dingin ama chu ring a umin a fel a nih.

¹⁰ “Thil ka suksuol nawh,” ei ti chun ama chu khêlhlipah ei siem a, a thu khawm einiah a um naw a nih.