तीतुस 3 - Halbi

मसीही चाल-चलन

¹ लोगमन के सुद्धि दिआव कि बड़े अधिकारीमन आउर अधिकारीमन चो लगे रवत, आउर हुनमन चो हुकुम मानोत, आउर हरकोनी अच्छा काम चो काजे तिआर रवत,

² काकीई दोष नी लगाआ, झगड़ा बिता नी होओ; मान्तर कोमल स्वभाव चो होओ, आउर सपाय मानेमन चो संगे बड़े सोज चो संगे रओ।

³ कसनबल्लोने आमी बले पयले निरबुद्धि, आउर हुकुम नी मानतो बिता आउर भरम ने पडुन आउर नाना परकार चो मनमानीमन आउर सुक बिलास चो गुलामी ने रलु, आउर बईर, आउर डाह करतो ने जीवना बीताते रलु, आउर घिन-घिना रलु, आउर गोटक दुसर ले बईर संगाते रलु।

⁴ मान्तर जिदलदाय आमचो मुक्तिकरू माहापुरू चो किरपा आउर मानेमन उपरे हुनचो मया परकट होली,

⁵ तेबे हुन आमचो मुक्ति करलो; आउर ऐ धरम चो काममन चो लागुन नुआय, जोन आमीमन खुद करलु, मान्तर आपलो दया चो अनुसार नवा जनम चो नाहातोर आउर पवितर आत्मा चो आमके नवा बनातोर बाटले होली।

⁶ जेके हुन आमचो मुक्तिकरू ईशु मसीह चो बाटले आमचो उपरे जादा ले जादा रिकालो।

⁷ जेचो ले आमी हुनचो अनुग्रह ले धरमी ठेबुन भाती, अमर जीवना चो आशा चो अनुसार हकदार बनु।

⁸ ऐ गोठ सते आय, आउर मय चाहाय से कि तुय ऐ गोठमन चो बारे ने हिम्मत ले बोल ऐईकाजे कि जोनमन माहापुरू उपरे बिश्वास करला से, हुनमन अच्छा-अच्छा काममन ने लगुन रतोर धिआन संगा ओत। ये गोठमन अच्छा आउर मानेमन चो लाब चो आय।

झगड़ा ले बचा

⁹ मान्तर मुरूकता चो गोठ बात मन, आउर बंसावलीमन, आउर बिरूद आउर झगड़ामन ले जोन नियम चो बारे ने होओ, बाचुन रा; कसनबल्लोने हुनमन बीना फल आउर फकाहा आत।

¹⁰ कोनी पाखंडी के गोटक दुयहार समजाऊन-बुजान भाती हुनचो ले अलग रा,

¹¹ ऐ जानुन भाती कि असन माने भुलकुन गेलोसे, आउर आपन खुद के दोषी ठेबाऊन भाती पाप करते रऊ आय।

आखरी खबर

¹² जिदलदाय मय तुचो लगे अरतिमास नाहले तुखिकुस के पटायेंदें तेबे मोचो लगे निकुपुलिस ऐतोर कोशिश कर, कसनबल्लोने मय हुनी थाने शीत काटतोर तय करलेसे।

¹³ जेनास नियमकारी आउर अपुल्लोस के कोशिश करून पुरे अमराऊन देस, आउर दक कि हुनमन के कोनी तीज चो घाटा नी होऊक सको।

¹⁴ आमचो लोग बले जरूरतमन के पुरा करतो काजे अच्छा काममन ने लगुन रतोर सिकोत कि बीना फल नी रओत।

शुभकामनामन

¹⁵ मोचो सपाय संगवारीमन चो तुके जुहार। जोन बिश्वास चो लागुन आमचो ले मया संगाऊ आत, हुनमन के जुहार तुमी सपाय उपरे अनुग्रह होते रओ।