तीतुस 2 - Halbi

सत सिक्या के मानतोर

¹ मान्तर तुय असन गोठमन बोल जोन खर उपदेश चो लायक आय।

² बल्ले डोकरा माने हुसीयार आउर गंभीर आउर सहन करू होओ, आउर हुनमन चो बिश्वास आउर मया आउर धीरज पक्का होओ।

³ ऐई परकार डोकरी बायले लेकीमन चो चाल चलन पवितर लोगमन असन होओ; हुनमन दोष लगातो बिती आउर मतवारिन नाई, मान्तर अच्छा गोठमन सिकातो बिती होओत

⁴ कि हुनमन जुआन बायले लेकीमन के जनाते रओत कि आपलो मुनुकमन आउर पिलामन ले मया करा;

⁵ आउर सहन करू, पवितर, घर चो कार बार करतो बिती, अच्छा, आउर आपलो-आपलो मुनुक चो लगे रतो बिती होओ, कि माहापुरू चो बचन चो निन्दा नी होऊक सको।

⁶ असने ची जुआन मानेमन के बले समजाव कि सहन करू बिता होओत।

⁷ सपाय गोठमन ने आपन खुद के अच्छा काममन चो नमूना बनाव। तुचो उपदेश ने सफाई, गमभीरता,

⁸ आउर असन चंट रओ कि कोनी हुनके खराप नी बोलुक सकोत, जेचो ले बिरूदी आमचो उपरे कोनी दोष लगातोर मवका नी पाऊन भाती लाजे होओत।

⁹ दासमन के समजाव कि आपलो-आपलो मालिक चो लगे रओत, आउर सपाय गोठमन ने हुनमन के हरिक संगावत, आउर पलटून भाती जबाप नी देओत;

¹⁰ चोरी चलाकी नी करोत, मान्तर सपाय परकार ले पुरा बिश्वासी निकरोत कि हुनमन सपाय गोठमन ने आमचो मुक्तिकरू माहापुरू चो उपदेश चो शोभा बड़ा ओत।

¹¹ कसनबल्लोने माहापुरू चो हुन अनुग्रह परकट आसे, जोन सपाय मानेमन चो मुक्ति चो कारन आय,

¹² आउर आमके जनाऊन देऊ आय कि आमी अभक्ति आउर संवसार चो मनमानीमन ले मन फिराऊन भाती ऐ जुग ने सहन करू आउर धरम आउर भक्ति ले जीवना बिताऊ;

¹³ आउर हुन धन्य आशा चो बल्लोने आपलो माहान माहापुरू आउर मुक्ति करू ईशु मसीह चो महिमा चो परकट होतोर बाट टाकते रओत।

¹⁴ जोन आपन खुद के आमचो काजे देउन दिलो कि आमके हर परकार चो अधरम ले छंड़ाओ, आउर शुद्ध करून आपलो काजे गोटक असन जाति बनाओ जोन अच्छा-अच्छा काममन ने पुरे-पुरे होओ।

¹⁵ पुरा अधिकार चो संगे ऐ गोठमन बोल, आउर समजाव आउर सिकाते रा। कोनी तुके तुच्छ जानुक नी सकोत।