तीतुस 1 - Halbi

शुभकामनामन

¹ पौलुस चो बाटले जोन माहापुरू चो दास आउर ईशु मसीह चो पठालोबिता आय, माहापुरू चो चुनलो लोगमन चो बिश्वास आउर हुन सत चो पयचान चो अनुसार जोन भक्ति चो अनुसार आय,

² हुन अमर जीवना चो आशा थाने जेचो बायदा माहापुरू, जोन झूठ बोलुक नी सके जुग-जुग ले करलो से,

³ मान्तर ठीक समया थाने आपलो बचन के हुन परचार चो बाटले परकट करलो, जोन आमचो मुक्तिकरू माहापुरू चो हुकुम चो अनुसार मोके सोपाय गेली।

⁴ तीतुस चो नाव, जोन बिश्वास चो संगती चो बिचार ले मोचो सत बेटा आय: माहापुरू बुआ आउर आमचो मुक्तिकरू मसीह ईशु चो बाटले तुके अनुग्रह आउर शान्ति मिरते रओ।

सियान चो लायक

⁵ मय ऐईकाजे तुके क्रेते ने छांडुन ऐऊन रले कि तुय बाकी गोठमन के सुधार, आउर मोचो हुकुम चो अनुसार नंगर-नंगर सियानमन के नियुक्त करो।

⁶ जोन बेकसूर आउर गोटक ची बायले चो मुनुक होओ, जेचो पिलामन बिश्वासी होओत, आउर जोनमन थाने ठग आउर काई दोष नी रओ।

⁷ कसनबल्लोने अध्यक्ष के माहापुरू चो भण्डारी होतोर लागुन बेकसूर होतोर आसे; ना टेकाहा, ना रीसाआ, ना मतवार, ना मारपेट करू बिता, आउर ना नीच कमाई चो लोभीई होओ,

⁸ मान्तर सगामान करू बिता, भलाई के चाहतो बिता, सहन करू, नियायी, पवितर आउर शांत होओ;

⁹ आउर हुन बिश्वास लायक बचन थाने जोन धरम उपदेश चो अनुसार आय, थीर रओ कि खर सिक्या ले उपदेश सिकाक सको आउर बिरूदीमन चो मुंह बले बन्द करूक सको।

पाखंडी गुरजी

¹⁰ कसनबल्लोने खुबे लोग पुटुर-पुटुर करतो बिता आउर धोका देऊ बिता आत, खास करून खतना बितामन थानले।

¹¹ ऐ मन चो मुंह बन्द करतोर आसे। ऐ लोग नीच कमाई चो काजे गलत गोठमन सिकाऊन भाती घर चो घर नसाऊन देऊ आत।

¹² हुनीमन थानले गोटक लोग, जोन हुनीमन चो अगम गिआनी आय, बल्लो से, “क्रेतीलोग हरमेशा फंदी, दुष्ट पशु, आउर ठग पेटला होऊ आत।”

¹³ ऐ गोहई सत आय, ऐईकाजे हुनमन के कड़ाई ले जनाऊन देस कि हुनमन बिश्वास ने पक्का होऊन जाओत,

¹⁴ आउर यहूदिमन चो कथा कहनीमन आउर हुन मानेमन चो हुकुममन थाने मन नी लगा ओत, जोन सत ले भटकुन जाऊ आत।

¹⁵ शुद्ध लोगमन चो काजे सपाय तीजमन शुद्ध आय, मान्तर अशुद्ध आउर बिश्वासिमन चो काजे काई बले शुद्ध नुआय, मान्तर हुनमन चो अकल आउर बिबक दुनो अशुद्ध आय।

¹⁶ हुनमन बोलु आत कि आमी माहापुरू के जानु, मान्तर आपलो काममन ले हुनचो इन्कार करू आत; कसनबल्लोने हुनमन घिन घिना आउर हुकुम नी मानु बिता आत, आउर कोनी अच्छा काम चो लायक नुआत।