रोमियो 9 - Halbiमाहापुरू चो चुनलो लोग 1 मय मसीह ने सत बलेंसें, झूठ नी बलें आउर मोचो बिबक बले पवितर आत्मा ने गोहई देऊ आय। 2 कि मोके बड़े दुक आसे, आउर मोचो मन सदा दुकते रऊ आय, 3 कसनबल्लोने मय ऐ थाले चाहते रले कि आपलो भाईमन, चो काजे जोन देंह चो हिसाब ले मोचो कुटुममन आत, खुद ची मसीह ले शरापित आउर अलग होऊन जाते। 4 हुनमन इस्राएली आत, हकदार चो हक, महिमा, बायदामन, नियम चो ईनाम, माहापुरू चो उपास, आउर बचनमन हुनी ची मन चो आय। 5 पुरखा बले हुनी ची मन चो आत, आउर मसीह बले देंह चो हिसाब ले हुनी ची मन ले होलो, जोन सपाय चो उपरे परम माहापुरू जुग-जुग धन्य आसे। आमीन। इस्राएल चो नी मानतोर आउर माहापुरू इच्छा 6 मान्तर ऐ नाई, कि माहापुरू चो बचन टलुन गेली, ऐईकाजे कि जोन इस्राएल चो बंश आत, हुनमन सपाय इस्राएली नुआत; 7 आउर ना अब्राहाम चो बंश होतोर लागुन सपाय हुनचो पिला ठेबोत, मान्तर (लिकलोर आसे) “इसाक ची ले तुचो बंश होये दे।” 8 बल्लोने देंह चो पिला माहापुरू चो पिला नुआत, मान्तर बायदा चो पिला बंश गेनाय जाऊ आत। 9 कसनबल्लोने बायदा चो बचन ऐ आय, “मय ऐ समया चो अनुसार ऐयेंदें, आउर सारा चो बेटा होयेदे।” 10 आउर मात्र ऐई ची नाई, मान्तर जिदलदाय रिबका बले गोटक ले बल्लोने आमचो बुआ इसाक ले देंहबारी रली, 11 आउर ऐबे ले ना तो लेका जनमुन रये, आउर ना हुनमन काई अच्छा नाहले खराप करू रला, ऐईकाजे कि माहापुरू चो मन जोन हुनचो चुनलोर अनुसार आय, करममन चो कारन नाई मान्तर हाग दिलो बिता चो कारन आय, बनु रओ। 12 हुन बल्लो, “बड़े नानी चो दास होयेदे।” 13 जसन लिकलोर आसे, “मय याकूब ले मया करले, मान्तर एसाव के लाड़ नी जानले।” इस्राएल चो नी मानतोर आउर माहापुरू चो नियाय 14 ऐईकाजे आमी काय बलवां? काय माहापुरू चो थाने अनियाय आसे? केबीई नाई। 15 कसनबल्लोने हुन मूसा ले बले से, “मय जोन कोनी उपरे दया करूक चाहाय दें हुनचो उपरे दया करेंदे, आउर जोन कोनी उपरे किरपा करूक चाहाय दें हुनचेई उपरे किरपा करेंदे।” 16 आउर ऐ ना तो चाहतो बितामन चो, ना परातो बितामन चो मान्तर दया करतो बिता माहापुरू चो गोठ आय। 17 कसनबल्लोने पवितर शास्त्र ने फिरोन ले बोला गेली, “मय तुके ऐईकाजे उबा करले से कि तुचो थाने आपलो सामरत दकायें दें, आउर मोचो नाव चो परचार पुईतराय धरतनी थाने होओ।” 18 ऐईकाजे हुन जेचो उपरे चाहाऊ आय हुनचो उपरे दया करू आय, आउर जोन के चाहाऊ आय हुनके कठोर करून देऊ आय। 19 आउर तुय मोचो ले बोल से, “हुन फेर केंव दोष लगाऊ आय? कोन हुनचो इच्छा चो सामना करू आय?” 20 हे माने, अच्छा तुय कोन आस जोन माहापुरू चो सामना करसीस? काय घड़लो बिती तीज घड़लो बिता ले बोलुक सकु आय, “तुय मोके असन केंव बनालीस?” 21 काय कुमार के माटी थाने अधिकार निआय कि गोटक ची गोंदा माटी थानले गोटक बरतन मान चो काजे आउर दुसर के मान नी करतोर काजे बनाओ? 22 तेबे ऐथा कोन असन अकचकित चो गोठ आय कि माहापुरू आपलो रीस दकातोर आउर आपलो सामरत उजागर करतोर इच्छा ले रीस चो भण्डवामन चो, जोन बिनाश चो काजे तिआर कराय जाऊ रवत, बड़े धीरज ले सहला; 23 आउर दया चो भण्डवामन थाने, जोनमन के हुन महिमा चो काजे पयले ले तिआर करलो, आपलो महिमा चो धन के उजागर करतोर इच्छा करलो? 24 बल्लोने आमचो उपरे जोनमन के हुन ना मात्र यहूदीमन थानले, मान्तर दुसर जातिमन थानले बले हाग दिलो। 25 जसन हुन होशे चो किताब ने बले बललो से, “जोन मोचो परजा नी रली, हुनमन के मय आपलो परजा बलेंदें; आउर जोन लाड़री नी रली, हुनके लाड़री बलेंदें। 26 आउर असन होयेदे कि जोन जगा ने हुनमन ले ऐ बलाय जाऊ रली कि तुमी मोचो परजा नुआस, हुनी जगा हुनमन जीवता माहापुरू चो पिला बलाय होदे।” 27 आउर यशाया इस्राएल चो बारे ने हाग देऊन भाती बले से, “भले इस्राएल चो पिलामन चो गेनती समुन्द चो बारू चो बराबर होओ, तेबले बले हुनमन थानले खिन्डिक ची बाचदे। 28 कसनबल्लोने परबु आपलो बचन धरतनी थाने पुरा करून, धारमिकता ले झटके हुनके सिद करेदे।” 29 जसन यशाया पयले बले बोलु रलो, “अगर सेनामन चो परबु आमचो काई बंश नी छांडतो, तेबे आमी सदोम चो असन होऊन जातु, आउर अमोरा चो समान ठेबतु।” इस्राएल चो ऐबे चो दसा 30 आउर आमी काय बलवां? ऐ कि दुसर जातिमन जोन धारमिकता के नी डगराते रवत, धारमिकता परापत करला बल्लोने हुन धारमिकता के जोन बिश्वास ले आसे; 31 मान्तर इस्राएली, जोन धरम चो नियम के डगराते रवत हुन नियम लगले नी अमरला। 32 काय काजे? ऐईकाजे कि हुनमन बिश्वास ले नाई, मान्तर माना करममन ले हुनके डगराते रवत। हुनमन हुन ठोकर चो पकना थाने ठोकर खादला, 33 जसन लिकलोर आसे, “दका, मय सिय्योन ने गोटक ठेच लगतो बिती पकना, आउर ठोकर खातो बिती पकना संगाय से, आउर जोन हुन थाने बिश्वास करेदे हुन लाज नी होयेदे।” |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation