रोमियो 8 - Halbiपवितर आत्मा चो बाटले जीवना 1 आउर अदायं जोन मसीह ईशु ने आसोत, हुनमन उपरे डण्ड चो हुकुम निआय। कसनबल्लोने हुनमन देंह चो अनुसार नाई मान्तर आत्मा चो अनुसार चलु आत। 2 कसनबल्लोने जीवन चो आत्मा चो नियम ने मसीह ईशु ने मोके पाप चो, आउर मरना चो नियम ले छुटछाड़ा करून दिलो। 3 कसनबल्लोने जोन काम नियम देंह चो लागुन कमजोर होऊन भाती नी करूक सकली, हुनके माहापुरू करलो, बल्लोने आपलो ची बेटा के पापमय देंह चो बराबरी ने आउर पापबली होतो काजे पटाऊन भाती, देंह ने पाप चो उपरे डण्ड चो हुकुम दिलो। 4 ऐईकाजे कि नियम चो बिदी आमीमन ने जोन देंह चो अनुसार नाई मान्तर आत्मा चो अनुसार चलु से, पुरा कराय जाओ। 5 कसनबल्लोने देंह चो हिसाब ने चलतो माने देंह चो गोठमन ने मन लगाऊ आत; मान्तर आत्मा चो चलाये चलतो बिता आत्मा चो गोठमन थाने मन लगाऊ आत। 6 देंह थाने मन लगातोर तो मरना आय, मान्तर आत्मा उपरे मन लगातोर जीवन आउर शान्ति आय; 7 कसनबल्लोने देंह थाने मन लगातोर तो माहापुरू ले बईर संगातोर आय, कसनबल्लोने ना तो माहापुरू चो नियम चो लगे आसे आउर ना होऊक सके; 8 आउर जोन देंह चो दसा ने आसे, हुनमन माहापुरू के हरिक नी करूक सकोत। 9 मान्तर जिदलदाय कि माहापुरू चो आत्मा तुमीमन ने बसु आय, तेबे तुमी देंह दसा ने नाई मान्तर आत्मिक दसा ने आसास। अगर काचीई ने मसीह चो आत्मा निआय तो हुन हुनचो लोग नुआय। 10 अगर मसीह तुमचो ने आसे, तेबे देंह पाप चो लागुन मरली से; मान्तर आत्मा धरम चो लागुन जीव आसे। 11 अगर हुनचेई आत्मा जेचो ने ईशु के मरलो बितामन थानले जिआलो, तुमनमन ने बसलोर आसे; तेबे जोन मसीह के मरलो बितामन थानले जिआलो, हुन तुमचो नाश होतो बिती देंहमन के बले आपलो आत्मा चो बाटले जोन तुमनमन ने बसलोर आसे, जिआय दे। आत्मा चो बाटले बेटा 12 ऐईकाजे हे भाईमन, आमी देंह चो करजदार नुवांव कि देंह चो अनुसार दिन बिताऊ, 13 कसनबल्लोने अगर तुमी देंह चो अनुसार दिन बिताआ से तो मरा से, अगर आत्मा ले देंह चो काममन के मारा से तेबे जीव राआ से। 14 ऐईकाजे कि जितरो लोग माहापुरू चो आत्मा चो चलाये चलु आत, हुनीमन ची माहापुरू चो बेटा आत। 15 कसनबल्लोने तुमके गुलामी चो आत्मा नी मिरली कि फेर बाय बिकाल हुआ, मान्तर हकदार होतोर चो आत्मा मिरली से, जेचो ले आमी हे अब्बा हे बुआ बोलुन भाती हाग देऊ आंव। 16 आत्मा खुद ची आमचो आत्मा चो संगे गोहई देऊ आय, कि आमी माहापुरू चो पिला आंव; 17 आउर अगर पिला आंव तो हकदार बले, मान्तर माहापुरू चो हकदार आउर मसीह चो संगवारी हकदार आंव, कि जिदलदाय आमी हुनचो संगे दुख उठावां तेबे हुनचो संगे महिमा बले पावां। कष्ट ले महिमा तक 18 कसनबल्लोने मय समजे से कि ऐ समया चो दुक आउर कलेश हुन महिमा चो पुरे, जोन आमचो उपरे उजागर होतो बिती आय, काई बले नुआय। 19 कसनबल्लोने ब्रमांड बड़े आशा भरलो नजर ले माहापुरू चो बेटामन चो उजागर होतोर बाट दके से। 20 कसनबल्लोने ब्रमांड आपलो इच्छा ले नाई मान्तर लगे करतो बितामन चो बाटले, फकाहा चो लगे ऐ आशा ले कराय गेली 21 कि ब्रमांड बले खुद ची विनाश चो गुलामी ले छुटकारा पाऊन भाती, माहापुरू चो पिलामन चो महिमा चो छुटछाड़ा परापत करेदे। 22 कसनबल्लोने आमी जानु से कि पुईतराय ब्रमांड ऐबे ले मिसुन भाती कहरे से आउर तकलीसमन ने पढुन तड़पे से; 23 आउर मात्र हुनी ची नाई मान्तर आमी बले जेचो लगे आत्मा चो पयला फल आसे, खुद ची आपलो ने कहरे सोत; आउर हकदार होतोर बल्लोने आपलो देंह चो छुटकारा चो बाट दक से। 24 ऐ आशा चो लागुन आमचो मुक्ति होली से; मान्तर जोन तीज चो आशा कराया जाऊ आय, जिदलदाय हुन दकतो ने ऐओ तेबे फेर आशा काहां रयदे? कसनबल्लोने जोन तीज के कोनी दके से हुनचो आशा काय करेदे? 25 मान्तर जोन तीज के आमी नी दकु, अगर हुनचो आशा करूं आंव, तेबे धीरज ले हुनचो बाट टाकु बले आंव। 26 असने रीति ले आत्मा बले आमचो कमजोरी ने सायता करू आय, कसनबल्लोने आमी नी जानु, कि पारथना कसन रीति ले करतोर आय; मान्तर आत्मा खुद ची असन हुमारून-हुमारून भाती जोन सांगतोर ले बाहरे आसे, आमचो काजे गुहार करू आय। 27 आउर मनमन चो जाचतो बिता जाने कि आत्मा चो मनसा काय आय? कसनबल्लोने हुन पवितर लोगमन चो काजे माहापुरू चो इच्छा चो अनुसार बिनती करू आय। 28 आमी जानु से कि जोन लोग माहापुरू ले मया संगाऊ आत, हुनमन चो काजे सपाय गोठमन मिसुन भाती भलाई ची के पयदा करू आय; बल्लोने हुनीमन ची काजे जोन हुनचो इच्छा चो अनुसार हाग दिलोर आसोत। 29 कसनबल्लोने जोनमन के हुन पयले ले जानलो से हुनमन के पयले ले ठेबालो से बले कि हुनचो बेटा चो रूप रंग ने होओ, कि हुन खुबे भाईमन ने पयलवात ठेबो। 30 फेर जोनमन के हुन पयले ले ठेबालो, हुनमन के हाग दिलो बले; आउर जोनमन के हाग दिलो, हुनमन के धरमी बले ठेबालो; आउर जोनमन के धरमी ठेबालो, हुनमन के महिमा बले दिलो से। माहापुरू चो अमर मया 31 आउर आमी ऐ गोठमन चो बारे ने काय बलवा? अगर माहापुरू आमचो बाटे आसे, तेबे आमचो बयरी कोन होऊक सके? 32 जोन आपलो खुद बेटा के बले नी संगाऊन छांडलो, मान्तर हुनके आमी सपाय चो काजे देऊन दिलो, हुन हुनचो संगे आमके आउर सपाय काई केंव नी देयेदे? 33 माहापुरू चो चुनलो बितामन उपरे दोष कोन लगायेदे? माहापुरू ची आय जोन हुनमन के धरमी ठेबातो बिता आय। 34 फेर कोन आसे जोन डण्ड चो हुकुम देयेदे? मसीह ची आसे जोन मरलो मान्तर मरलो थानले जीव बले उठलो, आउर माहापुरू चो उजा बाटे आसे, आउर आमचो काजे गुहार बले करू आय। 35 कोन आमके मसीह चो मया ले अलग करेदे? काय कलेश, काय संकट नाहले उपद्रव, नाहले अकाल नाहले नंगाई, नाहले खतरा नाहले तलवार? 36 जसन लिकलोर आसे, “तुचो काजे आमी दिनभर घात कराय जाऊ आंव; आमी पुजाय होतो बिती मेंडामन चो असन गेनाया गेलु से।” 37 मान्तर ऐ सपाय गोठमन ने आमी हुनचो बाटले जोन आमचो ले मया करलो से, जितरो बिता ले बले बडुन भाती आंव। 38 कसनबल्लोने मय बिलकुल जाने से कि ना मरना, ना जीवना, ना सरगदूत, ना बड़पन, ना ऐबे, ना अगम, ना सामरत, ना डेंग, 39 ना गड़ीयां आउर ना कोनी आउर रचना, आमके माहापुरू चो मया ले, जोन आमचो परबु मसीह ईशु ने आसे, अलग करूक सके दे। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation