रोमियो 7 - Halbiबिहाता जीवना चो कहनी 1 हे भाईमन, काय तुमी नी जानास मय नियम चो जानतो बितामन ले बलेंसें कि जिदलदाय ले माने जीव रऊ आय, हुलदाय ले हुनचो उपरे नियम चो जय रऊ आय? 2 कसनबल्लोने बिहा बिती बायले लेकी नियम चो असन आपलो मनुक चो जीवत-जीवत हुनचो ले बंदली से, मान्तर अगर मनुक मरून जाओ, तेबे हुन मनुक चो नियम ले छुटली। 3 ऐईकाजे कि मनुक चो जीवत-जीवत हुन कोनी दुसर मनुक चो होओ, तो बेबीचारीन बलाय होयेदे, मान्तर अगर मनुक मरून जाओ, तेबे हुन-हुन नियम ले छुटुन गेली, ऐथा ले कि अगर कोनी दुसर मनुक चो होऊन जाओ तेबले बले बेबीचारी नी होयेदे। 4 असने ची ऐ मोचो भाईमन, तुमी बले मसीह चो देंह चो बाटले नियम चो लागुन मरलोर बनुन गेलास, कि हुन दुसर चो होऊन जाआ, जोन मरलो बितामन थानले जीव उठलो: बल्ले आमी माहापुरू चो काजे फल आनु। 5 कसनबल्लोने जिदलदाय आमी देंह चो हिसाब ने चलते रलु, तेबे पापमन चो इच्छा जोन नियम चो बाटले रली, मरना चो फल पयदा करतो काजे आमचो अंगमन ने काम करते रली। 6 मान्तर जेचो गांट ने आमी रलु हुनचो काजे मरून भाती, अदायं नियम ले असन छुटलु, कि लिकलोर जुना रीति थाने नाई, मान्तर आत्मा चो नवा रीति थाने सेवा करूंसे। नियम ने पाप चो फायदा 7 तेबे आमी काय बलवां? काय नियम पाप आय? केबीई नाई! मान्तर बिना नियम चो मय पाप के नी चितायें नियम अगर नी बोलती, कि लालच नी कर तेबे मय लालच के नी जानते। 8 मान्तर पाप मवका पाऊन भाती हुकुम चो कारन मोचो ने सपाय परकार चो लालच पयदा करली, कसनबल्लोने बिना नियम पाप मुरदा आय। 9 मय तो नियम बिना पयले जीव रले, मान्तर जिदलदाय हुकुम ईली, तेबे पाप जीऊन गेलो, आउर मय मरून गेले। 10 आउर हुनी हुकुम जोन जीवना चो काजे रली, मोचो काजे मरना चो कारन ठेबली। 11 कसनबल्लोने पाप मवका पाऊन हुकुम चो बाटले मोके बहकालो, आउर हुनचेई बाटले मोके मारून बले दिलो। 12 ऐईकाजे नियम पवितर आय, आउर हुकुम, पवितर, धरमी, आउर अच्छा आय। नियम पाप ले बचाऊक नी सके 13 तेबे काय हुन जोन अच्छा रली, मोचो काजे मरना ठेबली? केबीई नाई! मान्तर पाप हुन अच्छा तीज चो बाटले मोचो काजे मरना चो पयदा करतो बिता होलो कि हुनचो पाप होतोर उजागर होओ, आउर हुकुम चो बाटले पाप खुबे ची पापमय ठेबो। 14 आमी जानु से कि नियम तो आत्मिक आय, मान्तर मय देंह आउर पाप चो हाथे बिकी होले से। 15 जोन मय करू आंय हुनके नी जाने; कसनबल्लोने जोन मय चाहाऊं आंय हुन नी करे, मान्तर जेचो ले मोके घिन ऐऊ आय हुनी करू आंय। 16 अगर जोन मय नी चाहायें हुनी करू आंय, तेबे मय मानु आंय कि नियम अच्छा आय। 17 तेबे असन हाल ने हुनचो करतो बिता मय नुआय, मान्तर पाप आय जोन मोचो ने बसली से। 18 कसनबल्लोने मय जाने कि मोचो ने बल्लोने मोचो देंह ने कोनी अच्छा तीज मोचो भीतरे नी करे। इच्छा तो मोचो ने आसे, मान्तर नुकु काम मोचो ले नी बने। 19 कसनबल्लोने जोन अच्छा काम चो मय इच्छा करू आंय, हुन तो नी करे, मान्तर जोन खराबी चो इच्छा नी करे हुनी ची करू आंय। 20 आउर अगर मय हुनी करू आंय जेचो इच्छा नी करे, तेबे हुनचो करतो बिता मय नी रले, मान्तर पाप जोन मोचो ने बसली से। 21 ऐ परकार मय ऐ नियम पाऊ आंय कि जिदलदाय भलाई करतोर इच्छा करू आंय, तेबे खराबी मोचो लगे ऐऊ आय। 22 कसनबल्लोने मय भीतरी मानेरूप ले तो माहापुरू चो नियम ले खुबे हरिक रऊ आंय। 23 मान्तर मोके आपलो अंगमन ने दुसर परकार चो नियम दका पडु आय, जोन मोचो अकल चो नियम ले लडु आय आउर मोके पाप चो नियम चो गांट ने डालु आय जोन मोचो अंगमन ने आसे। 24 मय कसन अभागा बिता माने आंय! मोके ऐ मरना चो देंह ले कोन छंडायेंदे? 25 आमचो परबु ईशु मसीह चो बाटले माहापुरू चो धन्यबाद होओ। ऐईकाजे मय खुद अकल ले तो माहापुरू चो नियम चो, मान्तर देंह ले पाप चो नियम चो सेवा करें से। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation