रोमियो 6 - Halbiपाप चो काजे मरना, माहापुरू चो काजे जिवतोर 1 तेबे आमी काय बलवा? काय आमी पाप करते रवां कि अनुग्रह खुबे होओ? 2 केबीई नाई! आमी जिदलदाय पाप चो काजे मरून गेलु तेबे फेर पयले ले हुन थाने कसन जीवना बितावां? 3 काय तुमी नी जानास कि आमी सपाय जोनमन मसीह ईशु चो डूबन धरलु, हुनचो मरना चो डूबन धरलु। 4 आउर हुन मरना चो डूबन पावलो ने आमी हुनचो संगे गाड़ाय गेलु, बल्ले जसन मसीह बुआ चो महिमा चो कारन मरलो बितामन थानले जिआय गेलो, असने ची आमी बले नवा जीवन चो असन चाल चलु। 5 कसनबल्लोने अगर आमी हुनचो मरना चो बराबर ने हुनचो संगे भिडुन गेलु से, तेबे जरूर हुनचो जीव उठतोर बराबर ने बले भिडुन जाऊँ दे। 6 आमी जानुन से कि आमचो जुना मानेरूप हुनचो संगे कुरूस थाने चेगाया गेली बल्ले पाप चो देंह फकाहा होऊन जाओ, आउर आमी पयले ले पाप चो दास रऊँ। 7 कसनबल्लोने जोन मरून गेलो, हुन पाप ले छुटुन भाती धरमी ठेबलो। 8 ऐईकाजे अगर आमी मसीह चो संगे मरून गेलु, तेबे आमचो बिश्वास ऐ आय कि हुनचो संगे जीऊन्दे बले। 9 कसनबल्लोने ऐ जानु से कि मसीह मरलो बितामन थानले जीव उठून भाती फेर मरू नुआय; हुनचो उपरे फेर मरना चो जय नी होये। 10 कसनबल्लोने हुन जोन मरून गेलो तो पाप चो काजे गोटक ची हार मरून गेलो; मान्तर जोन जीव आसे तो माहापुरू चो काजे जीव आसे। 11 असने ची तुमी बले आपन खुद के पाप चो काजे तो मरा, मान्तर माहापुरू चो काजे मसीह ईशु ने जीव समजा। 12 ऐईकाजे पाप तुमचो नाश होतो बिती देंह ने राज नी करो, कि तुमी हुनचो लालचमन चो आसा ने राआ; 13 आउर ना आपलो अंगमन के अधरम चो हत्यार होतो काजे पाप के सोपा, मान्तर आपन खुद के मरलो बितामन थानले जीव उठलोर जानुन भाती माहापुरू के सोपा, आउर आपलो अंगमन के धरम चो हत्यार होतो काजे माहापुरू के सोपा। 14 तेबे तुमचो उपरे पाप चो जय नी होये दे, कसनबल्लोने तुमी नियम चो अधीन निआस मान्तर अनुग्रह चो अधीन ने आसास। पाप चो दास ले, माहापुरू चो दास 15 तेबे काय होली? काय आमी ऐईकाजे पाप करवां कि आमी नियम चो अधीन निआव मान्तर अनुग्रह चो अधीन ने आंसु? केबीई नाई! 16 काय तुमी नी जानास कि जेचो हुकुम मानतो काजे तुमी आपन खुद के दासमन चो समान सोपुन देऊ आहास हुनचेई दास आहास भला पाप चो, जेचो आखरी मरना आय, भला हुकुम मानु चो, जेचो आखरी धारमिकता आय? 17 मान्तर माहापुरू चो धन्यबाद होओ कि तुमी जोन पाप चो दास रलास अदायं मन ले हुन उपदेश चो मानतो बिता होऊन गेलास, जेचो छछा ने डालाय जाऊ रलास, 18 आउर पाप ले छंडाय जाऊन भाती धरम चो दास होऊन गेलास। 19 मय तुमचो देंह चो कमजोरी चो कारन मानेमन चो रीति थाने बलें सें। जसन तुमी आपलो अंगमन के कुकरम चो काजे अशुद्धता आउर कुकरम चो दास करून सोपुन रलास, असने ची अदायं आपलो अंगमन के पवितरता चो काजे धरम चो दास करून सोपुन दिआस। 20 जिदलदाय तुमी पाप चो दास रलास, तेबे धरम चो बाटले छुटछाड़ा रलास। 21 आउर जोन गोठमन ले अदायं तुमी लाजे होऊ आहास, हुनमन ले हुन समया तुमी काय फल पावते राआस? कसनबल्लोने हुनमन चो आखरी तो मरना आय। 22 मान्तर अदायं पाप ले छुटछाड़ाय होऊन भाती आउर माहापुरू चो दास बनुन भाती तुमके फल मिरली जेचो ले पवितरता परापत होऊ आय, आउर हुनमन चो आखरी अमर जीवना आय। 23 कसनबल्लोने पाप चो भुती तो मरना आय, मान्तर माहापुरू चो बर आमचो परबु मसीह ईशु थाने अमर जीवन आय। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation