रोमियो 4 - Halbiअब्राहाम बिश्वास ले धरमी ठेबलो 1 तेबे आमी काय बलवां, कि आमचो देंह चो बुआ अब्राहाम के काय परापत होली? 2 कसनबल्लोने अगर अब्राहाम काममन ले धरमी ठेबाय जातो, तेबे हुनके घमण्ड करतोर कारन होती, मान्तर माहापुरू चो लगे नाई। 3 पवितर शास्त्र काय बले से? ऐ कि “अब्राहाम माहापुरू उपरे बिश्वास करलो, आउर ऐ हुनचो काजे धारमिकता गेनाय गेली।” 4 कामकरू बितामन चो भुती देतोर दान नुआय, मान्तर हक समजा जाऊ आय। अब्राहाम खतना ले आगतु बिश्वास ले धरमी ठेबलो 5 मान्तर जोन काम नी करे मान्तर भक्ति नी करतो बिता चो धरमी ठेबातो बिता उपरे बिश्वास करू आय, हुनचो बिश्वास हुनचो काजे धारमिकता गेना जाऊ आय। 6 जेके माहापुरू बिना करममन चो धरमी ठेबाऊ आय, हुनके दाऊद बले धन्य बोलु आय: 7 “धन्य आत हुनमन जोनमन चो अधरम छमा होली आउर जोनमन चो पाप ढ़ापाय गेली। 8 धन्य आय हुन माने जेके माहापुरू पापी नी ठेबा ये।” 9 तेबे ऐ धन्य बचन, काय खतना बितामन ची काजे आय नाहले खतना नी होलो बितामन चो काजे बले? आमी ऐ बोलु से, “अब्राहाम चो काजे हुनचो बिश्वास धारमिकता गेनाय गेली।” 10 तेबे ऐ कसन गेनाय गेली? खतना चो हाल ने नाहले बिना खतना चो हाल ने? खतना चो हाल ने नाई मान्तर बिना खतना चो हाल ने। 11 हुन खतना चो चिना पावलो कि हुन बिश्वास चो धारमिकता थाने छाप होऊन जाओ जोन हुन बिना खतना चो हाल ने संगाऊ रलो, जेचो ले हुन-हुन सपाय चो बुआ ठेबो जोन बिना खतना चो हाल ने बिश्वास करू आत बल्ले हुनमन बल्ले धरमी ठेबोत; 12 आउर हुन खतना करलो बितामन चो बुआ होओ, जोन ना मात्र खतना कराय होलोर आत, मान्तर आमचो बुआ अब्राहाम चो हुन बिश्वास चो लिकलो थाने बले चलु आत जोन हुन बिना खतना चो हाल ने करू रलो। 13 कसनबल्लोने ऐ बायदा कि हुन जगत चो हकदार होये दे, ना अब्राहाम के ना हुनचो बंश के नियम चो दुवारा दिआय जाऊ रली, मान्तर बिश्वास चो धारमिकता चो दुवारा मिरली। 14 कसनबल्लोने अगर नियम बिता हकदार आत, तो बिश्वास फकाहा आउर बायदा निसफल ठेबली। 15 नियम तो रीस पयदा करू आय, आउर जाहांय नियम निआय हुता हुनचो तोड़ बले निआय। 16 ऐई कारन बायदा बिश्वास थाने टिकली से कि अनुग्रह चो रीति थाने होओ, कि हुन हुनचो सपाय बंशमन चो काजे जमखम होओ, ना कि मात्र हुनचो काजे जोन नियम बिता आय मान्तर हुनचो काजे बले जोन अब्राहाम चो समान बिश्वास बिता आत; हुनी तो आमी सपाय चो बुआ आय, 17 जसन लिकलोर आसे, “मय तुके खुबे जातिमन चो बुआ ठेबाले से” हुन माहापुरू चो पुरे जेचो थाने बिश्वास करलो, आउर हुन मरलो बितामन के जिआ लो से, आउर जोन गोठमन आसे ची नाई हुनमन चो नाव असन धरू आय कि माना हुनमन आसोत। 18 हुन मुरमुरा ने बले आशा संगाऊन भाती बिश्वास करलो, ऐईकाजे कि हुन बचन चो असन कि “तुचो बंश असन होये दे,” हुन खुबे असन जातिमन चो बुआ होओ। 19 हुन जोन एक सव बरक चो रलो, आपलो मरलो असन देंह आउर सारा चो गरब चो मरलो बिती चो असन हाल जानुन भाती बले बिश्वास ने कमजोर नी होलो, 20 आउर ना अबिश्वासी होऊन भाती माहापुरू चो बायदा थाने संका करलो, मान्तर बिश्वास ने जमखम होऊन भाती माहापुरू चो महिमा करलो; 21 आउर जरूर जानलो कि जोन गोठ चो हुन बायदा करलो से, हुन हुनके पुरा करतो ने बले सकु आय। 22 ऐई कारन ऐ हुनचो काजे धारमिकता गेनाय गेली। 23 आउर ऐ बचन, “बिश्वास हुनचो काजे धारमिकता गेनाय गेली,” ना मात्र हुनचेई काजे लिकाय गेली, 24 मान्तर आमचो काजे बले जोनमन काजे बिश्वास धारमिकता गेनाय जाय दे, बल्लोने आमचो काजे जोन हुनचो उपरे बिश्वास करू आत जोन आमचो परबु ईशु के मरलो थानले जिआ लो। 25 हुन आमचो अपराधमन काजे धराय गेलो, आउर आमचो धरमी ठेबतो काजे जिआय बले गेलो। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation