रोमियो 2 - Halbiमाहापुरू चो धरम नियाय 1 आउर हे दोष लगतो बितामन, तुय कोनी बले केंव नी हो, तुय बेजबाप आस; कसनबल्लोने जोन गोठ ने तुय दुसर उपरे दोष लगाऊ आस हुनी गोठ ने आपन खुद के बले दोषी ठेबाऊ आस, ऐईकाजे कि तुय जोन दोष लगाऊ आस खुद ची हुन काम करू आस। 2 आमी जानु से कि असन-असन काम करतो बितामन चो उपरे माहापुरू चो बाटले ठीक-ठीक डण्ड चो हुकुम होऊ आय। 3 हे माने, तुय जोन असन-असन काम करतो बितामन उपरे दोष लगाय सीस आउर खुद हुनी ची काम करू आस; काय ऐ समजु आस कि तुय माहापुरू चो डण्ड चो हुकुम ले बाच से? 4 काय तुय हुनचो किरपा, आउर सयनशक्ति, आउर धीरजरूपी धन के तुच्छ जानसीस? काय ऐ नी समजीस कि माहापुरू चो किरपा तुके मन फिराव के सिकाऊ आय? 5 मान्तर तुय आपलो कठर टेकाहा मन चो लागुन हुनचो रीस चो दिन चो काजे, जोन थाने माहापुरू चो सत नियाय उजागर होयेदे, आपलो काजे रीस कमाय सीस। 6 हुन सपाय के हुनचो काममन चो असन पलटा देयेदे। 7 जोन अच्छा काम ने थीर रऊन भाती महिमा, आउर मान, आउर अमर चो डगर ने आसे, हुनमन के हुन अमर जीवना देयेदे; 8 मान्तर जोन मतलबी आत आउर सत के नी मानोत, मान्तर अधरम के मानु आत, हुनमन उपरे रीस आउर कोप पड़ेदे। 9 आउर कलेश आउर संकट सपाय माने चो जीव उपरे जोन खराप करू आय ऐयेदे, पयले यहूदी उपरे फेर यूनानी उपरे; 10 मान्तर महिमा आउर मान आउर जय हरकोनी के मिरेदे, जोन अच्छा करू आय, पयले यहूदी के फेर यूनानी के। 11 कसनबल्लोने माहापुरू कोचीई भेद-भाव नी करे। 12 ऐईकाजे जोनमन बिना नियम पाऊन पाप करला, हुनमन बिना नियम चो नष्ट बले होदे; आउर जोनमन नियम पाऊन पाप करला, हुनमन चो डण्ड नियम चो अनुसार होयेदे; 13 कसनबल्लोने माहापुरू चो थाने नियम चो सुनतो बिता धरमी नुआत, मान्तर नियम थाने चलतो बिता धरमी माना जादे। 14 फेर जिदलदाय दुसर जात चो लोग जोनमन लगे नियम निआय, टकर ले ची नियम चो गोठमन थाने चलु आत, तेबे नियम हुनमन चो लगे नी होलो थानले बले हुनमन आपलो काजे खुद ची नियम आत। 15 हुनमन नियम चो गोठमन आपलो-आपलो मन ने लिकलोर दकाऊ आत आउर हुनमन चो बिबक बले गोहई देऊ आय, आउर हुनमन चो बिचार गोटक दुसर थाने दोष लगाऊ नाहले हुनमन के बेकसूर ठेबाऊ आय। 16 जोन दिने माहापुरू मोचो नगतखबर चो असन ईशु मसीह चो बाटले मानेमन चो गुपत गोठमन चो नियाय करेदे। 17 मान्तर तुय यहूदी बलाय होऊ आस आउर नियम थाने भरसा करू आस, आउर माहापुरू चो बारे ने घमण्ड करू आस, 18 आउर हुनचो इच्छा जानीस आउर नियम चो सिक्या पाऊन भाती अच्छा-अच्छा गोठमन के लाड़ जानु आस; 19 आउर आपलो उपरे भरसा संगाऊ आस कि मय कानामन चो अगुवा, आउर अंधार ने पड़लो बितामन चो उजर, 20 आउर अकलहीनमन चो सिकातो बिता, आउर लेकामन चो सिकातो बिता आंय; आउर गिआन, आउर सत चो रूप, जोन नियम ने आसे, मोके मिरली से। 21 आउर काय तुय जोन दुसरा के सिकाऊ आस, आपन खुद के नी सिकाईस? काय तुय जोन चोरी नी करा बोलुन उपदेश देऊन खुद ची चोरी करू आस? 22 तुय जोन बोलु आस, “बेबीचार नी करा,” काय खुद ची बेबीचार करू आस? तुय जोन मुरतीमन ले ईचयाऊ आस, काय खुद ची मंदिरमन के लुटू आस? 23 तुय जो नियम चो बारे ने घण्मड करू आस, काय नियम नी मानुन भाती माहापुरू चो बेईजित करू आस? 24 “कसनबल्लोने तुमचो लागुन दुसर जातिमन ने माहापुरू चो नाव चो निन्दा कराया जाऊ आय,” जसन लिकलोर बले आसे। खतना चो लाब नी होतोर 25 अगर तुय नियम ने चलले तेबे खतना ले फायदा तो आसे, मान्तर अगर तुय नियम के नी मान से तो तुचो खतना बिन खतना चो बराबर होये दे। 26 ऐईकाजे अगर खतना होलो माने नियम चो बिदीमन के माने दे, तेबे काय हुनचो बिन खतना चो हाल खतना चो बराबर नी गेना जाये दे? 27 आउर जोन माने देंह रूप ले बिन खतना रलो, अगर हुन नियम के पुरा करो, तेबे काय तुके जोन लिकलो बिती पावतो आउर खतना कराय जातो थाने बले नियम के माने, दोषी नी ठेबाय दे? 28 कसनबल्लोने यहूदी हुन नुआय जोन उजागर ने यहूदी आय; आउर ना हुन खतना आय जोन उजागर ने आसे आउर देंह ने आसे। 29 मान्तर यहूदी हुनी आय जोन मन ने आसे; आउर खतना हुनी आय जोन मन चो आउर आत्मा ने आसे, ना कि लेखा चो; असन चो हरिक मानेमन चो बाटले नुआय, मान्तर माहापुरू चो बाटले होऊ आय। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation