रोमियो 16 - Halbiभईन फीबे के जुहार 1 मय तुमचो ले फिबे चो काजे जोन आमचो भईन आउर किंख्रीया चो कलीसिया चो सेविका आय, बिनती करें से, 2 कि तुमी, जसन कि पवितर लोगमन के जरूरत आय, हुनके परबु ने गरहन करा; आउर जोन कोनी गोठ ने हुनके तुमचो जरूरत होये दे, हुनचो सायता करा, कसनबल्लोने हुन बले खुबेमन चो मान्तर मोचो बले उपकार करतो बिती रली से। रोम चो संत मन के जुहार 3 प्रिसकिला आउर अकविला के जोन मसीह ईशु ने मोचो सकरमी आय, जुहार। 4 हुनमन मोचो जीव चो काजे आपली ची जीव खतरा ने डालुन देऊ रवत; आउर मात्र मय ची नाई, मान्तर दुसर जातिमन चो सपाय कलीसियामन बले हुनमन चो धन्यबाद करू आत। 5 हुन कलीसिया के बले जुहार जोन हुनचो घर ने आसोत। मोचो लाड़रा इपैनितुस के, जोन मसीह चो काजे आसिया चो पयला फल आय, जुहार। 6 मरियम के, जोन तुमचो काजे खुबे मसागत करली, जुहार। 7 अन्द्रुनीकुस आउर युनियास के जोन मोचो कुटुम चो आत, आउर मोचो संगे कयद होऊ रवत आउर पठालोबितामन ने नामी आत, आउर मोचो ले पयले मसीह होऊ रवत, जुहार। 8 अम्पलियातुस के, जोन परबु ने मोचो लाड़रा आय, जुहार। 9 उरबानुस के, जोन मसीह ने आमचो सकरमी आय, आउर मोचो लाड़रा इस्तखुस के जुहार। 10 अपिल्लेस के जोन मसीह ने चन्ट निकरलो, जुहार। अरिस्तुबुलुस चो घरलोगमन के जुहार। 11 मोचो कुटुम हेरोदियोन के जुहार। नरकिस्सुस चो घरलोगमन के जोन लोग परबु ने आसोत, हुनमन के जुहार। 12 त्रुफेना आउर त्रुफोसा के जोन परबु ने मसागत करू आय, जुहार। लाड़रा पिरसिस के, जोन परबु ने खुबे मसागत करलो, जुहार। 13 रूफुस के जोन परबु ने चुनलोर आसे आउर हुनचो आया के, जोन मोचो बले आया आय, दुनो के जुहार 14 टसुक्रितुस आउर फिलगोन आउर हिर्मेस आउर पत्रुबास आउर हिर्मास आउर हुनचो संग चो भाईमन के जुहार। 15 फिलुलुगुस आउर युलया आउर नेर्युस आउर हुनचो भईन, आउर उलुम्पास आउर हुनचो संग चो सपाय पवितर लोगमन के जुहार। 16 आपस ने पवितर चुमा ले जुहार करा। तुमके मसीह चो सपाय कलीसियामन चो बाटले जुहार। भाग-भाग करतो बितामन के छांडतोर 17 अदायं हे भाईमन, मय तुमचो ले बिनती करे से, कि जोन लोग हुन सिक्या चो उलटा, जोन तुमी पावलासास, फुट डालतोर आउर ठोकरना खुआतोर कारन होऊ आत, हुनमन के टारून दिआस आउर हुनमन ले दूर राहा। 18 कसनबल्लोने असन लोग आमचो परबु मसीह चो नुआत, मान्तर आपलो पेट चो सेवा करू आत; आउर खुदचारी गोठमन ले सीदा-सादा मन चो लोगमन के फुसयान देऊ आत। 19 तुमचो हुकुम मानतोर चरचा सपाय लोगमन ने फयलुन गेली से, ऐईकाजे मय तुमचो बारे ने हरिक करें से, मान्तर मय ऐ चाहायें से कि तुमी भलाई चो काजे अकल बितामन मान्तर खराप चो काजे नुकु बनुन राहा। 20 शान्ति चो माहापुरू शयतान के तुमचो पाँयमन ले झटके रमदुन देये दे। आमचो परबु ईशु मसीह चो अनुग्रह तुमचो उपरे होते रओ। पौलुस चो मीतमन ले जुहार 21 मोचो सकरमी तीमुथियुस चो, आउर मोचो कुटुममन लुकियुस आउर यासोन आउर सोसिपत्रुस चो तुमके जुहार। 22 मय चिठ्ठी लिकतो बिता तिरतिथुस चो, परबु ने तुमके जुहार। 23 गयुस जोन मोचो आउर कलीसिया के चलातो बिता आय, हुनचो तुमके जुहार:। इरास्तुस जोन नंगर चो भण्डारी आय, आउर भाई क्वारतुस चो तुमके जुहार। 24 आमचो परबु ईशु मसीह चो अनुग्रह तुमचो उपरे होते रओ। आमीन। आशिर्बाद 25 अदायं जोन तुमके मोचो नगतखबर आउर ईशु मसीह चो खबर चो परचार चो अनुसार थीर करूक सके, हुन भेद चो उजर चो अनुसार जोन हरमेशा ले लुकु रली, 26 मान्तर अदायं उजागर होऊन भाती जुग-जुग चो माहापुरू चो हुकुम ले अगम गिआनीमन चो किताबमन चो दुवारा सपाय जातिमन के सांगा गेली से कि हुनमन बिश्वास ले हुकुम मानतो बिता होऊन जाओत, 27 हुनी गोटक मात्र अकल बिता माहापुरू चो ईशु मसीह चो दुवारा जुग-जुग महिमा होते रओ। आमीन। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation