रोमियो 15 - Halbi

दुसर चो बोजा उठातोर

¹ आउर आमी बलबीतामन के जरूरी आय कि कमजोरमन चो कमजोरीमन के सहु, ना कि आपन खुद के हरिक करू।

² आमीमन ले हरकोनी आपलो पड़ोसी के हुनचो भलाई काजे हरिक करू कि हुनचो उन्नती होओ।

³ कसनबल्लोने मसीह आपन खुद के हरिक नी करलो, मान्तर जसन लिकलोर आसे, “तुचो निन्दा करूमन चो निन्दा मोचो उपरे ईली।”

⁴ जितरो गोठमन पयले ले लिकाय गेली, हुनमन आमचो ची सिक्या चो काजे लिकलोर आसे कि आमी धीरज आउर पवितर शास्त्र चो प्रोत्साहन दुवारा आशा संगाऊ।

⁵ धीरज आउर शान्ति चो दाता माहापुरू तुमके ऐ बर देओ कि मसीह ईशु चो अनुसार आपस ने गोटक मन राआ।

⁶ बल्ले तुमी गोटक मन आउर गोटक राग ने आमचो परबु ईशु मसीह चो बुआ माहापुरू चो स्तुति करा।

एकमति होऊन माहापुरू चो महिमा

⁷ ऐईकाजे, जसन मसीह माहापुरू चो महिमा चो काजे तुमके गरहन करलो से, असने ची तुमी बले गोटक दुसर के गरहन करा।

⁸ ऐईकाजे मय बलेंसें कि जोन बायदामन बुआ दादीमन के दिआय जाऊ रये हुनमन के जमखम करतो काजे मसीह, माहापुरू चो सत चो सबुत देतो काजे, खतना करलोर लोगमन चो सेवक बनलो;

⁹ आउर दुसर जाति बले दया चो कारन माहापुरू चो स्तुति करोत; जसन लिकलोर आसे, “ऐईकाजे मय जाति-जाति ने तुचो धन्यबाद करें दे, आउर तुचो नाव चो भजन गायें दे।”

¹⁰ फेर बल्लो से, “हे जाति-जाति चो सपाय लोगमन, हुनचो परजा चो संगे हरिक करा।”

¹¹ आउर फेर, “हे जाति-जाति चो सपाय लोगमन, परबु चो स्तुति करा; आउर हे राज-राज चो सपाय लोगमन हुनके सहराहा।”

¹² आउर फेर यशाया बले से, “यिशै चो गोटक चेर उजागर होयेदे, आउर दुसर जातिमन चो राजा होतो काजे गोटक उठे दे, हुनचो थाने दुसरजातिमन आशा संगा दे।”

¹³ माहापुरू जोन आशा चो देऊ बिता आय तुमके बिश्वास करतो ने सपाय परकार चो हरिक आउर शान्ति ले भरपूर करो, कि पवितर आत्मा चो सामरत ले तुमचो आशा बाड़ते जाओ।

यरूशलेम ले इल्लुरिकुम

¹⁴ हे मोचो भाईमन, मय खुद तुमचो बारे ने जरूर जाने से कि तुमी बले खुद ची भलाई ले भरा आउर माहापुरू गिआन ले भरपूर हुआ, आउर गोटक दुसर के जनाऊक सकास।

¹⁵ तेबले बले मय काहांय-काहांय सुरता दियातो काजे तुमके जोन खुबे साहास करून लिकले। ऐ हुन अनुग्रह चो लागुन होली जोन माहापुरू मोके दिलो से,

¹⁶ कि मय दुसर जातिमन चो काजे मसीह ईशु चो सेवक होऊन भाती माहापुरू चो नगतखबर चो सेवक याजक चो समान करे, जेचो ले दुसर जातिमन चो माना चेगाया जातोर, पवितर आत्मा ले पवितर बनुन भाती गरहन कराय जाओ।

¹⁷ ऐईकाजे हुन गोठमन चो बारे ने जोन माहापुरू ले नाता संगाऊ आय, मय मसीह ईशु ने बड़ाई करूक सके।

¹⁸ कसनबल्लोने हुन गोठमन के छांडुन मोके आउर कोनी गोठ चो बारे ने बले बोलतोर साहास निआय, जोन मसीह दुसर जातिमन चो लगे चो काजे बचन, आउर करम,

¹⁹ आउर चिनामन, आउर भयंकर काममन चो सामरत ले, आउर पवितर आत्मा चो सामरत ले मोचो ची बाटले करला, ऐथा ले कि मय यरूशलेम ले धरून भाती चारो बाटे इल्लुरिकुम ले मसीह चो नगतखबर चो पुरा-पुरा परचार करले।

²⁰ मान्तर मोचो मन चो उदुम ऐ आय कि जहांय-जहांय मसीह चो नाव नी धराय गेली, हुनी थाने नगतखबर सुनायें, असन नी होओ कि दुसर चो पाया थाने घर बनाये।

²¹ मान्तर जसन लिकलोर आसे असने ची होओ, “जोनमन के हुनचो नगतखबर नी पहुँचली, हुनमन ची दकेदे आउर जोनमन नी सुनला हुनमन ची समज दे।”

रोम ने जातोर उआट

²² ऐईकाजे मय तुमचो लगे ऐतो ले घन-घन ठेबुन रये।

²³ मान्तर अदायं ऐ देशमन ने मोचो काम चो काजे आउर जगा नी रली, आउर खुबे बरकमन ले मोके तुमचो लगे ऐतोर मन करे से।

²⁴ ऐईकाजे जिदलदाय मय स्पेन के जायें दें तो तुमचो लगे होते-होते ऐयेंदें, कसनबल्लोने मोके आशा आसे कि हुन यातरा ने तुमचो ले भेट होयेदे, आउर जिदलदाय तुमचो संगत ले मोचो जीव खिन्डिक भरून जाओ तेबे तुमी मोके खिन्डिक दूर पुरे अमराऊन दिआस।

²⁵ मान्तर ऐबे तो मय पवितर लोगमन चो सेवा करतो काजे यरूशलेम ने जायें सें।

²⁶ कसनबल्लोने मकिदुनिया आउर अखाया चो लोगमन के ऐ इच्छा लागली कि यरूशलेम चो पवितर लोगमन ने गरीब लोगमन चो काजे खिन्डिक चन्दा करोत।

²⁷ हुनमन के अच्छा तो लागली, मान्तर हुनमन-हुनमन चो करजदार बले आत, कसनबल्लोने अगर दुसर जाति हुनमन चो आत्मिक गोठमन ने शामिल होला, तेबे हुनमन के बले जरूरी आय कि देंह चो गोठमन ने हुनमन चो सेवा करोत।

²⁸ ऐईकाजे मय ऐ काम पुरा करून आउर हुनमन के ऐ चन्दा सोपुन भाती तुमचो लगे होते-होते स्पेन ने जायें दें।

²⁹ आउर मय जाने से कि जिदलदाय मय तुमचो लगे ऐयेंदें, तो मसीह चो पुरा आशीष चो संगे ऐयेंदें।

³⁰ हे भाईमन, आमचो परबु ईशु मसीह चो आउर पवितर आत्मा चो मया चो सुरता दियाऊन भाती मय तुमचो ले बिनती करेंसे, कि मोचो काजे माहापुरू ले पारथना करतो ने मोचो संगे मिलुन भाती मतभुल राहा।

³¹ कि मय यहूदिया चो अबिश्वासिमन ले बाचुन रयेंदे, आउर मोचो हुन सेवा जोन यरूशलेम चो काजे आय, पवितर लोगमन के भाओ;

³² आउर मय माहापुरू चो इच्छा ले तुमचो लगे हरिक चो संगे ऐऊन भाती तुमचो संगे आराम पायें।

³³ शान्ति चो माहापुरू तुमी सपाय चो संगे रओ। आमीन।