रोमियो 14 - Halbiछुटछाड़ा चो नियम 1 जोन बिश्वास ने कमजोर आसे, हुनके आपलो संगे धरा, मान्तर हुनचो संकामन थाने बिवाद करतो काजे नाई। 2 गोटक के बिश्वास आसे कि सपाय काई खातोर ठीक आय, मान्तर जोन बिश्वास ने कमजोर आसे हुन साग डार ची खाऊ आय। 3 खातो बिता नी खातो बिता के तुच्छ नी जानो, आउर नी-खातो बिता खातो बिता थाने दोष नी लगा ओ; कसनबल्लोने माहापुरू हुनके गरहन करलो से। 4 तुय कोन आस जोन दुसर चो सेवक थाने दोष लगाऊ आस? हुनचो थीर रतोर नाहले घसरुन जातोर हुनचो मालिक ची ले नाता संगाऊ आय, मान्तर हुन थीर ची करून दिया जाये दे, कसनबल्लोने परबु हुनके थीर संगाऊक सके। 5 कोनी तो गोटक दिन के दुसर ले बडुन भाती मानु आय, आउर कोनी सपाय दिनमन के गोटक समान मानु आय। हरकोनी आपलो ची मन ने तय करोत। 6 जोन कोनी दिन के मानु आय, हुन परबु चो काजे मानु आय। जोन खाऊ आय, हुन परबु चो काजे खाऊ आय, कसनबल्लोने हुन माहापुरू चो धन्यबाद करू आय, आउर जोन नी खाये, हुन परबु चो काजे नी खाये आउर माहापुरू चो धन्यबाद करू आय। 7 कसनबल्लोने आमचो थानले ना तो कोनी आपलो काजे जीऊ आय आउर ना कोनी आपलो काजे मरू आय। 8 अगर आमी जीव आंसु, तो परबु चो काजे जीव आंसु, आउर अगर मरू आंव, तो परबु चो काजे मरू आंव; आउर आमी जीऊ नाहले मरू, आमी परबु चेई आंव। 9 कसनबल्लोने मसीह ऐईकाजे मरलो आउर जीव बल्ले उठलो कि हुन मरलो बितामन चो आउर जीव रलो बितामन चो दुनो चो परबु होओ। 10 तुय आपलो भाई उपरे केंव दोष लगाऊ आस? नाहले तुय फेर केंव आपलो भाई के तुच्छ जानु आस? आमी सपाय ले सपाय माहापुरू चो नियाय सिंघासन चो पुरे उबा होवां। 11 कसनबल्लोने लिकलोर आसे, “परबु बले से, मोचो जीव चो किरिया कि हरकोनी मांडी मोचो पुरे टेके दे, आउर हरकोनी जीब माहापुरू के अंगीकार करे दे।” 12 ऐईकाजे आमचो थानले हरकोनी माहापुरू के आपलो-आपलो लेखा देये दे। 13 आउर पयले ले आमी गोटक दुसर थाने दोष नी लगाऊं, मान्तर तुमी ऐ ठानुन राआ कि कोनी आपलो भाई चो पुरे ठेच नाहले ठोकरना खातोर कारन नी संगाहा। मया चो नियम 14 मय जाने से आउर परबु ईशु ने मोके तय होली से कि कोनी तीज आपन खुद ले अशुद्ध नाई, मान्तर जोन हुनके अशुद्ध समजु आय हुनचो काजे अशुद्ध आय। 15 अगर तुचो भाई तुचो भात चो कारन मुरमुरा होऊ आय, तो फेर तुय मया चो रीति ले नी चलीस; जेचो काजे मसीह मरलो, हुनके तुय आपलो भात चो कारन नष्ट नी कर। 16 आउर तुमचो काजे जोन भलाई आय हुनचो निन्दा नी होऊक सको। 17 कसनबल्लोने माहापुरू चो राज खातोर-पिवतोर नुआय, मान्तर धरम आउर मिला-मिसा आउर हुन हरिक आय जोन पवितर आत्मा ले हऊ आय। 18 जोन कोनी ऐ रीति ले मसीह चो सेवा करू आय, हुन माहापुरू के भाऊ आय आउर मानेमन ने गरहन लायक ठेबु आय। 19 ऐईकाजे आमी हुन गोठमन ने लगुन रऊँ जोनमन ले मिला-मिसा आउर गोटक दुसर चो सुदार होओ। 20 भात चो काजे माहापुरू चो काम नी नशाव। सपाय काई शुद्ध तो आय, मान्तर हुन माने चो काजे खराप आय जेके हुनचो भात ले ठोकरना लगु आय। 21 अच्छा तो ऐ आय कि तुय ना मास खा आउर ने दाखरस पिव, ना आउर काई असन कर जेचो ले तुचो भाई ठोकरना खाओ। 22 तुचो जोन बिश्वास होओ, हुनके माहापुरू चो पुरे आपलो ची मन ने संगाव। धन्य आय हुन जोन हुन गोठ ने, जेके हुन ठीक समजु आय, आपन खुद के दोषी नी ठेबा ये। 23 मान्तर जोन संका करून खाऊ आय हुन डण्ड चो लायक ठेबुन चुकलो, कसनबल्लोने हुन बिश्वास ले नी खाये; आउर जोन काई बिश्वास ले नाई हुन पाप आय। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation