रोमियो 13 - Halbi

शासन चो अधीन

¹ हरकोनी माने सरकारी अधिकारीमन चो लगे रओ, कसनबल्लोने कोनी अधिकार असन नुआत जोन माहापुरू चो बाटले नी होओ; आउर जोन अधिकार आसे, हुन माहापुरू चो ठेबालोर आय।

² ऐईकाजे जोन कोनी अधिकार चो बिरूद करू आय, हुन माहापुरू चो बिदी चो सामना करू आय, आउर सामना करतो बितामन डण्ड पावदे।

³ कसनबल्लोने राजा अच्छा काम चो नाई, मान्तर घिन-घिना काम चो काजे डर चो कारन आय; आउर अगर तुय हाकिम ले निडर रऊक चाहाय सीस, तो अच्छा काम कर, आउर हुनचो बाटले तुचो सहराय होये दे;

⁴ कसनबल्लोने हुन तुचो भलाई काजे माहापुरू चो सेवक आय। मान्तर अगर तुय खराप कर से, तो डर, कसनबल्लोने हुन तलवार फकाहा धरून भाती नाई; आउर माहापुरू चो सेवक आत कि हुनचो रीस चो अनुसार खराप काम करतो बितामन के डण्ड देओत।

⁵ ऐईकाजे लगे रतोर नाई मात्र हुन रीस चो डर ले जरूर आय, मान्तर बिबक बले ऐई गोहई देऊ आय।

⁶ ऐईकाजे कर बले दिआस कसनबल्लोने शासन करू बिता माहापुरू चो सेवक आत आउर हरमेशा ऐई काम ने लगुन रऊ आत।

⁷ ऐईकाजे हरकोनी चो हक चुकाहा; जेके करजा चो जरूरत आसे, हुनके करजा दिआस; जेके लागा जरूरत आसे, हुनके लागा दिआस; जेके डरतोर जरूरी आय, हुनचो ले डरा; जेचो ईजीत करतोर जरूरी आय, हुनचो ईजीत करा।

पड़ोसी ले मया

⁸ आपस चो मया के छांडुन आउर कोनी गोठ ने काचीई करजदार नी हुआ, कसनबल्लोने जोन दुसर ले मया संगाऊ आय, हुनी ची नियम पुरा करलो से।

⁹ कसनबल्लोने ऐ कि “बेबीचार नी कर, हत्या नी कर, चोरी नी कर, लालच नी कर,” आउर ऐ मन के छांडुन आउर कोनी बले हुकुम आसे जाले सपाय चो अरत ऐ गोठ ने मिरू आय, “आपलो पड़ोसी ले आपलो समान मया संगाव।”

¹⁰ मया पड़ोसी चो काई बुराई नी करे, ऐईकाजे मया करतोर नियम के पुरा करतोर आय।

मसीह के पिन्दतोर

¹¹ समया के चिताऊन भाती असने ची करा, ऐईकाजे कि अदायं तुमचो काजे नींद ले चेतुन उठतोर समया अमरली से; कसनबल्लोने जोन समया आमी बिश्वास करू रलु, हुन समया चो बिचार ले अदायं आमचो मुक्ति लगे आसे।

¹² रात खुबे बितुन गेली से, आउर दिन निकरतो थाने आसे; ऐईकाजे आमी अंधार चो काममन के छांडुन भाती उजर चो हत्यार बान्दु।

¹³ जसन दिन के फोबु आय, असने ची आमी सीदा चाल चलु, ना कि खेला बुला, आउर मतवारीपन ने, ना बेबीचार, आउर ढीला ढाला ने, आउर ना झगड़ा आउर कुचर ने।

¹⁴ मान्तर परबु ईशु मसीह के पिन्दा, आउर देंह चो मनमानीमन के पुरा करतोर उपाय नी करा।