रोमियो 12 - Halbiमाहापुरू के जीवता पुजा 1 ऐईकाजे हे भाईमन, मय तुमचो ले माहापुरू चो दया सुरता कराऊन भाती बिनती करें से कि आपलो देंहमन के जीवता, आउर पवितर, आउर माहापुरू के भावतो बिती पुजा करून चेगाहा। ऐई ची तुमचो आत्मिक सेवा आय। 2 ऐ जगत चो असन नी बना; मान्तर तुमचो मन चो नवा होऊन गेलो ने तुमचो चाल-चलन बले बदल ते जाओ, जेचो ले तुमी माहापुरू चो अच्छा, आउर भावतो, आउर सिद इच्छा ले मालुम करते राआ। आत्मा चो बरमन ले माहापुरू चो सेवा 3 कसनबल्लोने मय हुन अनुग्रह चो कारन जोन मोके मिरली से, तुमचो थानले हरकोनी के बलें सें कि जसन समजातोर जरूरी आय हुनचो ले बडुन भाती कोनी बले आपन खुद के नी समजो; मान्तर जसन माहापुरू हरकोनी के बिश्वास सबुत चो अनुसार बाटुन दिलो से, असने ची सुअकल चो संगे खुद के समजो। 4 कसनबल्लोने जसन आमचो गोटक देंह ने खुबे असन अंग आसे, आउर सपाय अंगमन चो गोटक ची समान काम नुआय; 5 असने ची आमी जोन खुबे आंसु, मसीह ने गोटक देंह होऊन भाती आपस ने गोटक दुसर चो अंग आंव। 6 जिदलदाय कि हुन अनुग्रह चो अनुसार जोन आमके दिआय गेली से, आमके अलग-अलग बरदान मिरली से, तेबे जोन के अगम गोठ चो दान मिरली से, हुन बिश्वास चो सबुत चो अनुसार अगम गोठ करो; 7 अगर सेवा करतोर दान मिरली से, तेबे सेवा ने लगु राआ; अगर कोनी सिकातो बिता होओ, तेबे सिकातो ने लगु रओ; 8 जोन उपदेशक होओ, हुन उपदेश देतो ने लगु रओ; दान देतो बिता उदारता ले देओ; जोन अगुवाई करो, हुन उदुम ले करो; जोन दया करो, हुन हरिक ले करो। मसीह बेवहार 9 मया निष्कपट होओ; खराप ले दूर राहा; भलाई ने लगु राआ। 10 भाईचारा चो मया ले गोटक दुसर ले लाड़ संगाहा; आपस ने ईजीत करतो ने गोटक दुसर ले बाड़ते चला। 11 कोशिश करतो ने ठग नी हुआ; आत्मिक हरिक ने भरू राआ; परबु चो सेवा करते राआ। 12 आशा ने हरिक राआ; कलेश ने थीर राआ; पारथना ने हरमेशा लगु राआ। 13 पवितर लोगमन के जोन काई जरूरत होओ, हुन थाने हुनमन चो सायता करा; मानदान करतो ने लगु राआ। 14 आपलो कन्दरातो बितामन के आशीष दिआस; आशीष दिआस सराप नी दिआस। 15 हरिक करतो बितामन चो संगे हरिक करा, आउर गागतो बितामन चो संगे गागा। 16 आपस ने गोटक समान मन संगाआ; घमण्डी नी हो, मान्तर सोज लोगमन चो संगे संगत संगाआ; आपलो नजर ने अकल बितामन नी होओ। 17 खराप चो पलटा कोचीई ले खराप नी करा; जोन गोठमन सपाय लोगमन चो लगे नुकु आय, हुनमन चो चिन्ता करा। 18 जाहां ले होऊक सके, तुमी भरसक सपाय मानेमन चो संगे मेल मिलाप संगाहा। 19 हे लाड़रामन, पलटा नी धरा, मान्तर माहापुरू के रीस चो मवका दिआस, कसनबल्लोने लिकलोर आसे, “पलटा धरतोर मोचो काम आय, परबु बले से मय ची पलटा देयें दें।” 20 मान्तर “अगर तुचो बयरी भुके होओ तेबे हुनके भात खुआव, अगर पिआश होओ तो हुनके पानी पिआव; कसनबल्लोने असन करलो ले तुय हुनचो मुण्ड थाने आईग चो इंगरामन चो कुड़ा लगा से।” 21 खराप ले नी हारा, मान्तर अच्छा ले खराप के जीता। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation