रोमियो 11 - Halbiइस्राएल उपरे माहापुरू चो दया 1 ऐईकाजे मय बलेंसें, काय माहापुरू आपलो परजा के छांडुन दिलो? केबीई नाई! मय बले तो इस्राएली आंय, अब्राहाम चो बंश आउर बिन्यामीन चो बंश थानले आंय। 2 माहापुरू आपलो हुन परजा के नी छांडलो, जोन के हुन पयले ची ले जानलो। काय तुमी नी जानास कि पवितर शास्त्र एलिया चो बारे ने काय बले से, कि हुन इस्राएल चो बिरूद ने माहापुरू ले बिनती करू आय? 3 “हे परबु, हुनमन तुचो अगम गिआनीमन के घात करला, आउर तुचो बेदीमन के घसराऊन दिला से; आउर मय ची ऐकला बाचले से, आउर हुनमन मोचो जीव चो बले डगर ने आसोत।” 4 मान्तर माहापुरू ले हुनके काय जबाप मिरली? “मय आपलो काजे सात हजार मानेमन के संगाऊन छांडले से, जोनमन बाल देवता चो पुरे मांडी नी टेकला सोत।” 5 ठीक ऐई रीति ले ऐ समया बले, अनुग्रह ले चुनलोर खिन्डिक लोग बाकी आसोत। 6 अगर ऐ अनुग्रह ले होली से, तो फेर करम ले नुआय; नी होले अनुग्रह फेर अनुग्रह नी रये। 7 ऐईकाजे परिनणाम काय होली? ऐ कि इस्राएली जेचो खोज ने रओत, हुन हुनमन के नी मिरली; मान्तर चुनलो बितामन के मिरली, आउर बाकी लोग कठोर कराय गेला। 8 जसन लिकलोर आसे, “माहापुरू हुनमन के आजी चो दिन तक भारी नींद ने संगालो से, आउर असन आँईकमन दिलो जोन नी दको आउर असन कान जोन नी सुनो।” 9 आउर दाऊद बले से, “हुनमन चो भात हुनमन चो काजे जाल आउर फान्दा, आउर ठोकर आउर डण्ड चो कारन होऊन जाओ। 10 हुनमन चो आँईकमन थाने अंधार होऊन जाओ कि नी दकोत, आउर तुय हरमेशा हुनमन चो पाट के लुआऊन संगाव।” इस्राएल चो इन्कार करतोर आखरी नुआय 11 आउर मय बलेंसें काय हुनमन ऐईकाजे ठोकर खादला कि घसरुन पड़ोत? केबीई नाई! मान्तर हुनमन चो घसरतोर लागुन दुसर जातिमन के मुक्ति मिरली, कि हुनमन के जलन होओ। 12 ऐईकाजे अगर हुनमन चो घसरतोर जगत चो काजे धन आउर हुनमन चो घटती दुसर जातिमन चो काजे सम्पत्ति चो कारन होली, तेबे हुनमन चो भरपूरी ले काय काई नी होये। 13 मय तुमी दुसर जातिमन ले ऐ गोठमन बलेंसें। जिदलदाय कि मय दुसर जातिमन चो काजे पठालोबिता आंय, तेबे मय आपलो सेवा चो बड़ाई करू आंय, 14 कि कोनी रीति ले मय आपलो कुटुममन ने जलन पयदा कराऊन भाती हुनमन थानले कितलो झन चो मुक्ति करायेंदे। 15 कसनबल्लोने जिदलदाय हुनमन चो छांडुन दिआय जातोर जगत चो मेल चो कारन होली, तेबे काय हुनमन चो गरहन कराय जातोर मरलो बितामन थानले जीव उठतोर बराबर नी होये? 16 जिदलदाय भेट चो पयला पेड़ा पवितर ठेबली, तो पुरा चटकलो बिती आंटा बले पवितर आय; आउर जिदलदाय चेर पवितर ठेबली, तो खेंदामन बले असने ची आय। 17 मान्तर अगर कितरो खेंदामन टुटाऊन दिआय गेली, आउर तुय रान जैतून होऊन भाती हुनमन थाने साटा गेली, आउर जैतून चो चेर चो फिसलान चो भागी होली सीस, 18 तेबे खेंदामन थाने घमण्ड नी कर; आउर अगर तुय घमण्ड कर से तेबे जानुन रा कि तुय चेर के नाई मान्तर चेर तुके समालु आय। 19 फेर तुय बोल से, “खेंदामन ऐईकाजे टुटाया गेली कि मय साटा जायें।” 20 ठीक आय, हुनमन तो अबिश्वास चो लागुन टुटाया गेली, मान्तर तुय बिश्वास ले बनु रऊ आस ऐईकाजे घमण्डी नी हो, मान्तर भय मान, 21 कसनबल्लोने जिदलदाय माहापुरू स्वभाविक खेंदामन के नी छांडलो तो तुके बले नी छांडेदे। 22 ऐईकाजे माहापुरू चो किरपा आउर कड़क के दक! जोन घसरुन गेला हुनमन उपरे कड़क, मान्तर तुचो उपरे किरपा अगर तुय हुन थाने बनु रसे, नी होले तुय बले गोंदुन दिआय जासे। 23 हुनमन बले अगर अबिश्वास ने नी रओत, तेबे साटा जादे; कसनबल्लोने माहापुरू हुनमन के फेर साटुक सके। 24 कसनबल्लोने अगर तुय हुन जैतून ले, जोन स्वभाव ले रान आय, गोंदाय गेली आउर स्वभाव चो बिरूद अच्छा जैतून ने साटाय गेली, तेबे ऐ जोन स्वभाविक खेंदामन आत, आपलो ची जैतून ने केंव नी साटाय जादे। 25 हे भाईमन, काहांय असन नी होओ कि तुमी आपन खुद के अकल बिता समजा; ऐईकाजे मय नी चाहायें कि तुमी ऐ भेद ले अनजान राहा कि जिदलदाय ले दुसर जातिमन पुईतराय रीति ले नी ओलोत, हुदलदाय ले इस्राएल चो गोटक भाग असने ची कठोर रये दे। 26 आउर ऐई रीति ले पुईतराय इस्राएल मुक्ति पायेदे। जसन लिकलोर आसे, “छंड़ातो बिता सिय्योन ले ऐयेदे, आउर भक्ति नी करतो बिता के याकूब ले दूर करेदे; 27 आउर हुनमन चो संगे मोचो ऐ बायदा होयेदे, जिदलदाय कि मय हुनमन चो पापमन के दूर करून देयें दें।” 28 नगतखबर चो ले तो तुमचो काजे हुनमन माहापुरू चो बयरी आत, मान्तर चुनुन जातोर ले हुनमन बुआ-दादीमन चो लागुन लाड़रा आत। 29 कसनबल्लोने माहापुरू चो बरदान आउर बुलाहट अटल आय। 30 कसनबल्लोने जसन तुमी पयले माहापुरू चो हुकुम नी मानलास, मान्तर ऐबे हुनमन चो हुकुम नी मानले ने तुमचो उपरे दया होली; 31 असने ची हुनमन बले अदायं हुकुम नी मानला, कि तुमचो उपरे जोन दया होये से ऐचो ले हुनमन उपरे बले दया होओ। 32 कसनबल्लोने माहापुरू सपाय के हुकुम नी मानु बिता चो बन्दी बनान भाती संगालो, बल्ले हुन सपाय उपरे दया करो। 33 आहा! माहापुरू चो धन आउर अकल आउर गिआन काय ची गंभीर आय! हुनचो बिचार कसन अथाह, आउर हुनचो बाट कसन बड़े भारी आय! 34 “परबु चो अकल के कोन जानलो? नाहले हुनचो मंत्री कोन होलो? 35 नाहले कोन पयले हुनके काई दिलो से जेचो पलटा हुनके दिआय जाओ?” 36 कसनबल्लोने हुनचो बाटले, आउर हुनचेई कारन, आउर हुनचेई काजे सपाय काई आय: हुनचो महिमा जुग-जुग होते रओ। आमीन। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation