रोमियो 10 - Halbiइस्राएल के नगतखबर चो जरूरत 1 ऐ भाईमन, मोचो मन चो इच्छा आउर हुनमन काजे माहापुरू ले मोचो पारथना आय कि हुनमन मुक्ति पाओत। 2 कसनबल्लोने मय हुनमन चो गोहई देयें से कि हुनमन के माहापुरू चो काजे लगाव रऊ आय, मान्तर अकल चो संगे नाई। 3 कसनबल्लोने हुनमन माहापुरू चो धारमिकता ले नी जानुन भाती, आउर आपलो धारमिकता दकातोर कोशिश करून, माहापुरू चो धारमिकता चो लगे नी होला। 4 कसनबल्लोने हरकोनी बिश्वास करतो बितामन काजे धारमिकता चो काजे मसीह नियम चो आखरी आय। 5 कसनबल्लोने मूसा ऐ लिकलो से कि जोन माने हुन धारमिकता थाने जोन नियम ले आसोत, चले से, हुन-हुनचेई ले जीव रयदे। 6 मान्तर जोन धारमिकता बिश्वास ले आय, हुन असन बले से, “तुय आपलो मन ने ऐ नी बोल कि सरग थाने कोन चेगे दे?” (बल्लोने मसीह के उतराऊन आनतो काजे!) 7 नाहले “अधलोक ने कोन उतरे दे” (बल्लोने मसीह के मरलो बितामन थानले जिआन भाती उपरे आनतो काजे!) 8 मान्तर हुन काय बले से? ऐ कि “बचन तुचो लगे आसे, तुचो मुंह ने आउर तुचो मन ने आसे,” ऐ हुनी बिश्वास चो बचन आय, जोन आमी परचार करू आंव, 9 कि अगर तुय आपलो मुंह ले ईशु के परबु जानुन भाती अंगीकार कर, आउर आपलो मन ले बिश्वास करो कि माहापुरू हुनके मरलो बितामन थानले जिआ लो, तेबे तुय जरूर मुक्ति पाव से। 10 कसनबल्लोने धारमिकता चो काजे मन ले बिश्वास कराय जाऊ आय, आउर मुक्ति चो काजे मुंह ले अंगीकार कराय जाऊ आय। 11 कसनबल्लोने पवितर शास्त्र ऐ बले से, “जोन कोनी हुनचो उपरे बिश्वास करेदे हुन लाज नी होयेदे।” 12 यहूदीमन आउर यूनानीमन ने काई भेद नियाय, ऐईकाजे कि हुन सपाय चो परबु आय आउर आपलो सपाय नाव धरतो बितामन काजे उदार आय। 13 कसनबल्लोने, “जोन कोनी परबु चो नाव धरेदे, हुन मुक्ति पायेदे।” इस्राएल चो नगतखबर के नी मानतोर 14 फेर जोन थाने हुनमन बिश्वास नी करला, हुनमन हुनचो नाव कसन धरदे? आउर जेचो बारे सुनलु नाई, हुनचो उपरे कसन बिश्वास करवां? आउर परचारक बिना कसन सुनवां? 15 आउर अगर पटाया नी जाऊँ, तेबे कसन परचार करवां? जसन लिकलोर आसे, “हुनमन चो पाँय कितरो सुन्दर आय, जोन अच्छा गोठमन चो नगतखबर सुनाऊ आत!” 16 मान्तर सपाय हुन नगतखबर थाने कान नी लगाला। यशाया बले से, “हे परबु, कोन आमचो खबर थाने बिश्वास करलो?” 17 आउर बिश्वास सुनलो ले आउर सुनतोर मसीह चो बचन ले होऊ आय। 18 मान्तर मय बलेंसें, काय हुनमन नी सुनला? सुनला तो जरूर आय; कसनबल्लोने लिकलोर आसे, “हुनमन चो राग सपाय धरतनी थाने, आउर हुनमन चो बचन जगत चो आखरी तक अमरली से।” 19 मय फेर बलेंसें, काय इस्राएली नी जानते रवत? पयले तो मूसा बले से, “मय हुनमन चो कारन जोन जाति नुआत, तुमचो मन ने जलन उपजायेंदे; मय गोटक टेकाहा जाति चो कारन तुमके रिस दिआयें दे।” 20 फेर यशाया बड़े हिम्मत चो संगे बले से, “जोन मोके नी डगराते रवत, हुनमन मोके भेटला; आउर जोन मोके पचारते बले नी रवत, हुनमन थाने मय उजागर होले।” 21 मान्तर इस्राएल चो बारे ने हुन ऐ बले से, “मय सबु दिना आपलो हाथ गोटक हुकुम नी मानतो बिती आउर झगड़ा करतो बिती परजा चो बाटे फसारून रयें।” |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation