रोमियो 1 - Halbiजुहार 1 पौलुस चो बाटले जोन ईशु मसीह चो दास आय, आउर पठालोबिता होतो काजे हाग दिया गेलो, आउर माहापुरू चो हुन नगतखबर काजे अलग करा गेलो से 2 जेचो हुन पयले ची ले आपलो अगम गिआनीमन चो बाटले पवितर शास्त्र ने, 3 आपलो बेटा आमचो परबु ईशु मसीह चो बारे ने बायदा करलो; हुन देंह चो बाटले तो दाऊद चो पुरखा ले जनमलो 4 आउर पवितरता चो आत्मा चो बाटले मरलो बितामन थानले जीव उठतोर कारन सामरत चो संगे माहापुरू चो बेटा ठेबलो से। 5 हुनचो बाटले आमके अनुग्रह आउर पठालोबिता चो काम मिरली कि हुनचो नाव चो कारन सपाय जातिमन चो लोग बिश्वास करून हुनचो मानोत, 6 जोनमन थानले तुमी बले ईशु मसीह चो होतो काजे हाग दिया गेला साहास। 7 हुन सपाय चो नाव जोन रोम ने माहापुरू चो लाड़रा आत आउर पवितर होतो काजे हाग दिया गेला सोत आमचो बुआ माहापुरू आउर परबु ईशु मसीह चो बाटले तुमके अनुग्रह आउर शान्ति मिरते रओ। रोम ने जातोर इच्छा 8 पयले मय तुमी सपाय काजे ईशु मसीह चो बाटले आपलो माहापुरू चो धन्यबाद करेंसे, कसनबल्लोने तुमचो बिश्वास चो चरचा पूईतराय जगत ने होये से। 9 माहापुरू जेचो सेवा मय आपलो आत्मा ले हुनचो बेटा चो नगतखबर चो बारे ने करेंसे, हुनी मोचो गोहई आय कि मय तुमके कसन परकार सरलगा सुरता करते रऊ आंय, 10 आउर सदा आपलो पारथना ने गुहार करू आंय कि कोनी रीति ले अदायं तुमचो लगे ऐतोर मोचो बाट माहापुरू चो इच्छा ले सफल होओ। 11 कसनबल्लोने मय तुमचो ले मिलतो आशा करू आंय कि मय तुमके कोनी आत्मिक बरदान देयें जेचो ले तुमी थीर होऊन जाआ; 12 बल्लोने ऐ कि जिदलदाय मय तुमचो मंजी ने होयें, तेबे आमी हुन बिश्वास चो बाटले जोन मोचो ने आउर तुमचो ने आसे, गोटक दुसर ले होसला पाऊँ। 13 हे भाईमन, मय नी चाहायें कि तुमी ऐचो ले अनजान राहा कि मय घन-घन तुमचो लगे ऐतोर चाहले, कि जसन मोके दुसर जातिमन ने फल मिरली, असने ची तुमचो ने बले मिरो, मान्तर ऐबले ठेबाया गेले। 14 मय यूनानीमन आउर दुसर भाषामन चो, आउर अकल बितामन आउर बेअकल बितामन चो करजदार आंय। 15 आउर मय तुमके बले जोन रोम ने रऊ आस, नगतखबर सुनातो काजे भरसक तिआर आंसे। धरमी बिश्वास ले जियेदे 16 कसनबल्लोने मय नगतखबर ले नी लाज होयें, ऐईकाजे कि हुन हरकोनी बिश्वास करतो बिता चो काजे, पयले तो यहूदी फेर यूनानीमन चो काजे, मुक्ति चो काजे माहापुरू चो सामरत आसे। 17 कसनबल्लोने हुन थाने माहापुरू चो धारमिकता बिश्वास ले आउर बिश्वास चो काजे उजागर होऊ आय; जसन लिकलोर आसे, “बिश्वास ले धरमी जन जीव रयदे।” अधार्मिकता उपरे माहापुरू चो रीस 18 माहापुरू चो रिस तो हुन लोगमन चो सपाय अभक्ति आउर अधरम थाने सरग ले उजागर होऊ आय, जोन सत के अधरम ले चेपान संगाऊ आत। 19 ऐईकाजे कि माहापुरू चो बारे ने गिआन हुनमन चो मन-मन ने उजागर आसे, कसनबल्लोने माहापुरू हुनमन उपरे उजागर करलो से। 20 हुनचो नी दकलो गुन, बल्लोने हुनचो जुग-जुग चो सामरत आउर माहापुरू रूप, जगत चो रचना चो समया ले हुनचो काममन चो बाटले दकुक लाय ऐऊ आय, ऐथा ले कि हुनमन बेजबाप आसोत। 21 ऐई कारन कि माहापुरू के जानलो ने बले हुनमन माहापुरू चो लायक बड़ाई आउर धन्यबाद नी करला, मान्तर फकाहा बिचार करूक मुरयाला, ऐथा ले कि हुनमन चो बेअकल मन अंधार होली। 22 हुनमन आपन खुद के अकल बिता जानुन भाती मुरूक बनला, 23 आउर विनाश नी होतो बिता माहापुरू चो महिमा के नाशवान माने, आउर चड़ीईमन, आउर चार पाँयामन, आउर रेंगतो बिती जन्तुमन चो मुरती चो बराबर ने बदला। 24 ऐई लागुन माहापुरू हुनमन के हुनमन चो मन चो मनमानीमन चो अनुसार अशुद्धता चो काजे छांडलो कि हुनमन आपस ने आपलो देंहमन चो हिन्सता करोत। 25 कसनबल्लोने हुनमन माहापुरू चो सत के बदलुन भाती झूठ बनाला, आउर ब्रमांड चो उपास आउर सेवा करला, ना कि हुन बनातो बिता चो जोन हरमेशा धन्य आय! आमीन। 26 ऐईकाजे माहापुरू हुनमन के निच काममन चो वश ने छांडलो; ऐथा ले कि हुनमन चो बायलेमन बले स्वभाविक टकर के हुनचो ले जोन टकर चो बिरूद आय, बदलुन दिला। 27 असने ची माने बले बायलेमन चो संगे स्वभाविक टकर छांडुन भाती आपस ने कामातुर होऊन भाती जलुक मुरयाला, आउर मानेमन चो संगे निरलज काम करून आपलो भरम चो ठीक फल पावला। 28 जिदलदाय हुनमन माहापुरू के चिताऊक नी चाहला, तेबे माहापुरू बले हुनमन के हुनमन चो ठगमन थाने छांडलो कि हुनमन घिन-घिना काम करोत। 29 ऐईकाजे हुनमन सपाय परकार चो अधरम, आउर दुष्ट, आउर लोभ, आउर बयर ले भरला; आउर डाह, आउर हत्या, आउर झगड़ा, आउर छंद, आउर कुचर ले भरपूर होला, आउर खुदेयार, 30 बदनाम करतो बिता, माहापुरू के गन्दातो बिता दुसरमन चो ईजीत नी करतो बिता, घमण्डी, ढ़ोंगाहा, खराप-खराप गोठमन चो बनातो बिता, आया बुआ चो हुकुम नी मानतो बिता, 31 बेअकल, बिश्वासघाती, मया नाहलो आउर निरदई होला। 32 हुनमन तो माहापुरू चो ऐ बिदी जानोत कि असन-असन काम करतो बिता मरना चो डण्ड चो लायक आत, तेबले बले ना मात्र खुद ची असन काम करू आत मान्तर करतो बितामन ले हरिक बले होऊ आत। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation