प्रकाशितवाक्य 9 - Halbiपांचवां तुरी 1 जिदलदाय पांचवां सरगदूत तुरी फुकलो, तेबे मय सरग ले धरतनी थाने गोटक तारा घसरतोर दकले, आउर हुनके अन्दकुप खोदरा चो कुची दिया गेली। 2 हुन अन्दकुप खोदरा के खोललो, आउर खोदरा थानले बड़े भाटी असन कुमरा उठली, आउर खोदरा चो कुमरा ले बेर आउर लेहरा भिंग अंधार होऊन गेली। 3 हुन कुमरा थानले धरतनी थाने थापामन निकरला, आउर हुनमन के धरतनी चो बिच्छुमन चो असन शक्ति दियाय गेली। 4 हुनमन के बोला गेली कि ना धरतनी चो लाटा के ना कोनी काचा बिती के, ना कोनी रूक के हानि पहुँचाला, मात्र हुन मानेमन के हानि पहुँचाला जेचो कपार थाने माहापुरू चो मोहर निआय। 5 हुनमन के लोगमन के मारून पकातोर तो नाई मान्तर पांच मयना ले डण्ड देतोर अधिकार दिया गेली; आउर हुनमन चो डण्ड असन रली जसन बिच्छु चो डाड़ा ने कोचक ले माने के होऊ आय। 6 हुन दिनमन ने माने मरना के डगरादे आउर नी पावदे; आउर मरतोर इच्छा करदे, मरना हुनमन ले परायदे। 7 हुन थापामन चो कट लड़ीई चो काजे तिआर करलोर घोड़ामन असन रवत, आउर हुनमन चो मुण्डमन थाने माना सोना चो मुकुट रये; आउर हुनमन चो मुंह मानेमन चो असन रये। 8 हुनमन चो केश बायले लेकीमन चो केश जसन आउर दात डुरकामन चो दात असन रये। 9 हुनमन लुआ चो असन झिलम पिनदुन रवत; आउर हुनमन चो पाकटीमन चो शब्द असन रये जसन रतमन आउर खुबे असन घोड़ामन चो जोन लड़ीई ने पराऊ आत। 10 हुनमन चो लेंगड़ी बिच्छुमन चो असन रली आउर हुनमन ने डाड़ा रये, आउर हुनमन के पांच मयना ले मानेमन के दुक पहुँचातोर जोन अधिकार मिरू रये, हुन हुनमन चो लेंगड़ी ने रली। 11 अन्दकुप खोदरा चो दूत हुनमन थाने राजा रलो; हुनचो नाव इब्रानी ने अबदोन, आउर यूनानी ने अपुल्लयोन आय। 12 पयला बिपत्ति बीतुन चुकली, दका, अदायं ऐचो पाचे दुय बिपत्तिमन आउर ऐतो बिती आय। छठवां तुरी 13 जिदलदाय छठवां सरगदूत तुरी फुकलो तेबे सोना चो बेदी जोन माहापुरू चो पुरे आसे हुनचो सींगमन थानले मय असन शब्द सुनले, 14 माना कोनी छठवां सरगदूत ले, जेचो लगे तुरी रये, बलेसे, “हुन चार सरग दूतमन के जोन बड़े लंदी फरात चो लगे बान्दलोर आसोत, खोलुन दिआ।” 15 हुन चारो दूत खोलुन दिला गेला जोन हुन घड़ी, आउर दिन, आउर मयनामन, आउर बरक चो काजे मानेमन चो गोटक भाग के मारतो काजे तिआर करा जाऊ रवत। 16 हुनमन चो पलटन चो चेगलो बितामन चो गेनती बीस करोड़ रली; मय हुनमन चो गेनती सुनले। 17 मोके ऐ दरशन ने घोड़ा आउर हुनमन चो असन चेगलो बितामन दका दिला जेचो झिलमन ने आईग आउर धूम्रकान्त आउर गन्धक चो असन रली, आउर हुन घोड़ामन चो मुण्ड डुरकामन चो मुण्डमन चो असन रये; आउर हुनमन चो मुंह ले आईग, कुमरा आउर गन्धक निकरते रये। 18 ऐ तीनो माहामारीमन बल्लोने आईग आउर कुमरा आउर गन्धक असन, जोन हुनमन चो मुंह ले निकरते रये मानेमन चो गोटक भाग मारून दिया गेली। 19 कसनबल्लोने हुन घोड़ामन चो सामरत हुनमन चो मुंह आउर हुनमन चो लेंगड़ी ने रली; ऐईकाजे कि हुनमन चो लेंगड़ीमन सांपमन असन रली, आउर हुन लेंगड़ीमन चो मुण्ड बले रये आउर ऐचीई ले हुनमन डण्ड पहुँचाते रवत। 20 बाकी मानेमन जोन हुन मरीमन ले नी मरून रला, आपलो हाथ चो काममन ले मन नी फिराला, कि दुष्टआत्मामन चो, आउर सोना आउर चाँदी आउर पीतल आउर पकना आउर काट चो मुरतीमन चो पुजा नी करोत जोन ना दकुक ना सुनुक, ना हिन्डुक सकोत; 21 आउर जोन लऊ आउर पंगनाहा, आउर बेबीचार, आउर चोरी हुनमन करून रवत, हुनमन ले मन नी फिराला। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation