प्रकाशितवाक्य 7 - Halbi

गोटक अंतराल

¹ ऐचो पाचे मय धरतनी चो चारो कोनयामन थाने चार सरगदूत उबा दकले। हुनमन धरतनी चो चारो लेहरामन के थामुन रवत बल्ले धरतनी नाहले समुन्द नाहले कोनी रूक थाने लेहरा नी चलो।

² फेर मय गोटक आउर सरगदूत के जीवता माहापुरू चो मोहर धरून भाती पूरब ले उपर चो बाटे ऐतोर दकले; हुनमन हुन चारो सरग दूतमन ले जोन के धरतनी आउर समुन्द चो हानि करतोर अधिकार दिया जाऊ रये, जोर ले हाग देऊन भाती बल्लो,

³ “जिदलदाय ले आमी आपलो माहापुरू चो दासमन चो कपार थाने मोहर नी लगाऊन देऊं, हुलदाय ले धरतनी आउर समुन्द आउर रूकमन के हानि नी पहुँचाहा।”

इस्राएल चो 1, 44,000 लोग

⁴ जोन थाने मोहर दिया गेली मय हुनचो गेनती सुनले, बल्लोने इस्राएल चो पिलामन चो सपाय कुलमन ले एक लाख चवालीस हजार थाने सील दिया गेली:

⁵ यहूदा चो कुल थानले बारा हजार थाने मोहर दिया गेली; रूबेन चो कुल थानले बारा हजार थाने, गाद चो कुल थानले बारा हजार थाने।

⁶ आशेर चो कुल थानले बारा हजार थाने, नप्ताली चो कुल थानले बारा हजार थाने, मनश्शे चो कुल थानले बारा हजार थाने,

⁷ शिमोन चो कुल थानले बारा हजार थाने, लेवी चो कुल थानले बारा हजार थाने, इस्साकार चो कुल थानले बारा हजार थाने,

⁸ जबूलून चो कुल थानले बारा हजार थाने, यूसुफ कुल थानले बारा हजार थाने, आउर बिन्यामीन चो कुल थानले बारा हजार मोहर दिया गेली।

कलेश ले गोटक बड़े भीड़

⁹ ऐचो पाचे मय नंजराले, आउर दका, हरकोनी जाति आउर कुल आउर लोग आउर भाषा थानले गोटक असन बड़े भीड़, जेके कोनी गनुक नी सकते रवत, पंडरा फटीई पिन्दुन आउर आपलो हाथमन ने खजुर चो खेंदामन धरून भाती सिंघासन चो पुरे आउर मेमना चो पुरे उबा आसोत,

¹⁰ आउर जोर ले हाग देऊन भाती बले से, “मुक्ति चो काजे आमचो माहापुरू चो, जोन सिंघासन थाने बसलो से, आउर मेमना चो जय-जय कार होओ!”

¹¹ आउर सपाय सरगदूत हुन सिंघासन आउर सियानमन आउर चारो परानीमन चो चारो बाटे उबा आसोत; फेर हुनमन सिंघासन चो पुरे पाटा पडुन घसरुन पढ़ला आउर माहापुरू के पाँय पडुन भाती बल्ला,

¹² “आमीन! आमचो माहापुरू चो स्तुति आउर महिमा आउर गिआन आउर धन्यबाद आउर ईजीत आउर सामरत आउर शक्ति जुग-जुग बनुन रओ। आमीन!”

¹³ ऐ थाने सियानमन ले गोटक मोके बल्लो, “ऐ पंडरा फटीई पिन्दलो बिता कोन आत? आउर काहां ले ईला सोत?”

¹⁴ मय हुनके बल्ले, “हे मालिक, तुय ची जानीस।” हुन मोके बल्लो, “ऐ हुनमन आत, जोन हुन माहाकलेश थानले निकरून भाती ईला सोत; ऐ मन आपलो-आपलो फटीई मेमना चो लऊ ने धोऊन भाती पंडरा करला सोत।”

¹⁵ ऐई लागुन हुनमन माहापुरू चो सिंघासन चो पुरे आसोत, आउर हुनचो मंदिर ने दिन रात हुनचो सेवा करू आत, आउर जोन सिंघासन थाने बसलो से, हुन हुनमन चो उपरे आपलो तम्बू तानेदे।

¹⁶ हुनमन फेर भुक आउर पिआस नी होदे; आउर ना हुनमन उपरे घाम, ना काई तप पढ़ेदे।

¹⁷ कसनबल्लोने मेमना जोन सिंघासन चो मंजी ने आसे हुनमन चो राका करेदे, आउर हुनमन के जीव रूपी पानी चो सतानमन चो लगे धरून नेयेदे; आउर माहापुरू हुनमन चो आँईकमन ले सपाय आँसु फुछुन देयदे।