प्रकाशितवाक्य 6 - Halbi

पयला सील-पंडरा घोड़ा उपरे चेगलो

¹ फेर मय दकले कि मेमना हुन सात सीलमन ले गोटक के खोललो; आउर हुन चारो परानीमन ले गोटक चो गरजलो असन शब्द सुनलो, “आव!”

² मय नंजरा ले आउर दका, गोटक पंडरा घोड़ा आसे, आउर हुनचो उपरे चेगलो बिता धनु धरून भाती आसे; आउर हुनके गोटक मुकुट दिया गेली, आउर हुन जय करते-करते निकरलो कि आउर बले जय परापत करो।

दुसरा मोहर-लड़ीई

³ जिदलदाय हुन दुसर सील खोललो, तेबे मय दुसर परानी के ऐ बोलतोर सुनले, “आव!”

⁴ फेर गोटक आउर घोड़ा निकरली जोन लाल रंग चो रये; हुनचो उपरे चेगलो बिता के ऐ अधिकार दिया जाऊ रये कि धरतनी थानले मिला-मिसा गुचाओ, बल्ले लोग गोटक दुसर के मारोत; आउर हुनके गोटक बड़े तलवार दिया गेली।

तीसरा मोहर-अकाल

⁵ जिदलदाय हुन तीसर सील खोललो, तेबे मय तीसर परानी के ऐ बोलतोर सुनले, “आव!” मय नंजरा ले, आउर दका गोटक करया घोड़ा आसे, आउर हुनचो उपरे चेगलो बिता चो हाथ ने गोटक किलो काटा आसे;

⁶ आउर मय हुन चारो परानीमन चो मंजी ले गोटक शब्द ऐ बोलतोर सुनले, “दीनार चो सेर भर गऊँ, आउर दीनार चो तीन सेर जोंदरी थाने तेल आउर दाखरस चो हानि नी करा।”

चवथा मोहर-मरना

⁷ जिदलदाय हुन चवथी सील खोललो, तेबे मय चवथा परानी चो शब्द ऐ बोलतोर सुनले, “आव!”

⁸ मय नंजरा ले, आउर दका, आउर गोटक हरदी घोड़ा आसे; आउर हुनचो उपरे चेगलो बिता चो नाव मरना आय, आउर अधलोक हुनचो पाटे-पाटे आसोत; आउर हुनमन के धरतनी चो गोटक चवथाई थाने ऐ अधिकार दिया गेली कि तलवार, आउर अकाल, आउर मरी, आउर धरतनी चो रान पशुमन चो बाटले लोगमन के मारून पका ओत।

पांचवां मोहर-शहीद

⁹ जिदलदाय हुन पांचवां सील खोललो, तेबे मय बेदी चो खाले हुनमन चो जीव के दकले जोन माहापुरू चो बचन चो लागुन आउर हुन गोहई चो लागुन जोन हुनमन देऊ रवत बद करा जाऊ रवत।

¹⁰ हुनमन बड़े जोर ले हाग देऊन भाती बल्ला, “हे मालिक, हे पवितर आउर सत; तुय केबे ले नियाय नी करसे? आउर धरतनी चो रतो बितामन ले आमचो लऊ चो पलटा केबे ले नी धरसे?”

¹¹ हुनमन थानले हरकोनी के पंडरा फटीई दिया गेली, आउर हुनमन के बोला गेली कि आउर डण्डिक आराम करा, जिदलदाय ले कि तुमचो संगवारी दास आउर भाई जोन तुमचो असन पुजाय होतो बिता आत हुनमन चो बले गेनती पुरा नी होओ।

छठवां मोहर-डर

¹² जिदलदाय हुन छठवां सील खोललो, तेबे मय दकले कि गोटक बड़े भूकम होली, आउर बेर कामरा चो असन करया आउर पुरा जोन लऊ चो असन होऊन गेली।

¹³ बादरी चो तारामन धरतनी थाने असन घसरुन पड़ली जसन बड़े लेहरा धुका ले हलुन भाती अंजीर चो रूक थानले काचा फर झडु आय।

¹⁴ बादरी असन सरकुन गेली जसन चिठ्ठी घड़याले सरकुन जाऊ आय; आउर हरकोनी डोंगरी, आउर ढ़िपका, आपलो-आपलो जगा ले गुचुन गेली।

¹⁵ तेबे धरतनी चो राजा, आउर सियान, आउर सरदार, आउर सवकार आउर सामरती लोग, आउर हरकोनी दास आउर हरकोनी छुटछाड़ा डोंगरीमन चो करपन ने आउर बड़े-बड़े पोकना मन ने जाऊन लुकला,

¹⁶ “आउर डोंगरीमन आउर बड़े-बड़े पोकना मन के बोलुक मुरयाला, आमचो उपरे घसरुन पड़ा; आउर आमके हुनचो मुंह ले जोन सिंघासन थाने बसलो से, आउर मेमना चो परकोप ले लुकाहा।”

¹⁷ कसनबल्लोने हुनमन चो परकोप चो भयंकर दिन ऐऊन पहुँचली से, अदायं कोन ठेबुक सकु आय?