प्रकाशितवाक्य 5 - Halbi

सील लगालो किताब कोन उगाढुक सके?

¹ जोन सिंघासन थाने बसुन रये, मय हुनचो उजा हाथ ने गोटक किताब दकले जोन भीतरे आउर बाहरे लिकलोर रली, आउर हुन सात सील लगाऊन भाती बन्द करा जाऊ रये।

² फेर मय गोटक बलवन्त सरगदूत के दकले जोन जोर-जोर ले ऐ परचार करते रलो, “ऐ किताब के खोलतोर आउर हुनचो सीलमन टुटातो लायक कोन आय?”

³ मान्तर ना सरग ने, ना धरतनी थाने, ना धरतनी चो खाले कोनी हुन किताब के खोलतोर नाहले हुन थाने नजर डालतोर लायक निकरला।

⁴ तेबे मय सुयकुन-सुयकुन गागुक मुरयाले, कसनबल्लोने हुन किताब के खोलतोर नाहले हुन थाने नजर डालतोर लायक कोनी नी मिरला।

⁵ ऐ थाने हुन सियानमन ले गोटक मोचो ले बल्लो, “नी गाग; दक, यहूदा चो कुल चो हुन डुरका जोन दाऊद चो मुल आय, हुन किताब के खोलतोर आउर हुनचो सातो सीलमन के टुटातो काजे जयवन्त होलो से।”

⁶ तेबे मय हुन सिंघासन आउर चारो परानीमन आउर हुन सियानमन चो मंजी ने, माना गोटक पुजा करलो बिती मेमना उबलोर दकले। हुनचो सात सींग आउर सात आँईकमन रली, ऐ माहापुरू चो सातो आत्मामन आत जोन पुईतराय धरतनी थाने पटाया गेलीसे।

⁷ हुन ऐऊन भाती हुनचो उजा हाथ ले जोन सिंघासन थाने बसुन रये, हुन किताब धरलो।

⁸ जिदलदाय हुन किताब के धरलो, तेबे हुन चारो परानी आउर चोबिसों सियानमन हुन मेमना चो पुरे घसरुन पढ़ला। हुनमन थानले हरकोनी चो हाथ ने बीणा आउर धुप, जोन पवितर लोगमन चो पारथनामन आय, ले भरलो बिती सोना चो बटका रवत।

⁹ हुनमन ऐ नवा गीत गाऊक मुरयाला, “तुय ऐ किताब के धरतोर, आउर ऐचो सीलमन खोलतोर लायक आस; कसनबल्लोने तुय पुजाय होऊन भाती आपलो लऊ ले हरकोनी कुल आउर भाषा आउर लोग आउर जाति थानले माहापुरू चो काजे लोगमन के घेनली सीस,

¹⁰ आउर हुनमन के आमचो माहापुरू चो काजे गोटक राज आउर याजक बनालो; आउर हुनमन धरतनी थाने राज करे सोत।”

सरग दूतमन बाटले मेमना के सहरातोर

¹¹ जिदलदाय मय दकले, तेबे हुन सिंघासन आउर हुन परानीमन आउर हुन सियानमन चो चारो बाटे खुबे असन सरग दूतमन चो शब्द सुनले, जेचो गेनती लाखो आउर करोड़ो चो रली,

¹² आउर हुनमन जोर ले बोलते रवत, “पुजा करलो बिती मेमना ची सामरत आउर धन आउर गिआन आउर शक्ति आउर ईजीत आउर महिमा आउर धन्यबाद चो लायक आय!”

¹³ फेर मय सरग ने आउर धरतनी थाने आउर धरतनी चो खाले आउर समुन्द चो सपाय बनालो बिती तीजमन के, आउर सपाय काई के जोन हुनमन थाने आसे, ऐ बोलते सुनले, “जोन सिंघासन थाने बसलो से हुनचो आउर मेमना चो धन्यबाद आउर ईजीत आउर महिमा आउर राज जुग-जुग रओ!”

¹⁴ आउर चारो परानीमन आमीन बल्ला, आउर सियानमन घसरुन भाती पाँय पढ़ला।