प्रकाशितवाक्य 4 - Halbi

सरग ने नजारा

¹ ऐ गोठमन चो पाचे जोन मय नंजरा ले तो काय दकेंसे कि सरग ने गोटक कपाट उगाढ़ी होली से, आउर जेके मय पयले तुरी चो असन शब्द ले आपलो संगे गोठमन करतोर सुनु रयें, हुनी बलेंसें, “ऐथा उपरे आव; आउर मय हुन गोठमन तुके दकायेंदे, जेचो ऐ गोठमन चो पाचे पुरा होतोर जरूरी आय।”

² तुरते मय आत्मा ने ईले; आउर काय दकेंसे कि गोटक सिंघासन सरग ने संगालो से, आउर हुन सिंघासन थाने कोनी बसलो से।

³ जोन हुन थाने बसलो से हुन यशब आउर माणिक्य चो असन दका पढ़े से, आउर हुन सिंघासन चो चारो बाटे मरकत असन गोटक मेंग धुन दका देयेसे।

⁴ हुन सिंघासन चो चारो बाटे चोबिस सिंघासन आसे; आउर ऐ सिंघासनमन उपरे चोबिस सियानमन पंडरी फटीई पिन्दुन भाती बसला से, आउर हुनमन चो मुण्डमन थाने सोना चो मुकुट आसे।

सरग ने आराधना

⁵ हुन सिंघासन थानले बिजलीमन आउर गरजन निकरेसे आउर सिंघासन चो पुरे आईग चो सात दियामन जरेसे, हुनमन माहापुरू चो सात आत्मामन आत,

⁶ आउर हुन सिंघासन चो पुरे माना बिल्लोर चो समान कांच चो असन समुन्द आसे। सिंघासन चो मन्जारे आउर सिंघासन चो चारो बाटे चार परानी आसोत, जेचो पुरे पाटे आँईक ची आँईकमन आसे।

⁷ पयला परानी डुरका चो असन आय, आउर दुसर परानी बाचा चो असन आय, तीसर परानी चो मुंह माने चो असन आसे, आउर चवथा परानी उड़ातो बिती उकाब चो असन आय।

⁸ चारो परानीमन चो छय-छय पाटकी आसे, आउर चारो बाटे आउर भीतरे आँईक ची आँईक आसे; आउर हुनमन रात दिन बिना बिसालोर बोलते रऊ आत, “पवितर, पवितर, पवितर परबु माहापुरू, सर्वशक्तिमान, जोन रये आउर जोन आसे आउर जोन ऐतो बिता आय।”

⁹ जिदलदाय हुन परानी हुनचो जोन सिंघासन थाने बसलो से, आउर जोन जुग-जुग जीव आसे, महिमा आउर ईजीत आउर धन्यबाद करदे;

¹⁰ तेबे चोबिसों सियानमन सिंघासन थाने बसतो बितामन चो पुरे घसरुन पढ़दे, आउर हुनके जोन जुग-जुग जीव आसे जुहार करदे; आउर हुनमन आपलो-आपलो मुकुट सिंघासन चो पुरे ऐ बोलुन भाती डालुन देदे,

¹¹ “हे आमचो परबु आउर माहापुरू, तुय ची महिमा आउर ईजीत आउर सामरत चो लायक आस; कसनबल्लोने तुय ची सपाय तीजमन बनालीस आउर हुनमन तुचीई इच्छा ले रली आउर बनाया गेली।”