प्रकाशितवाक्य 3 - Halbiसरदीस-मरलो कलीसिया 1 “सरदीस चो कलीसिया चो दूत के ऐ लिक: जेचो लगे माहापुरू चो सात आत्मामन आउर सात तारामन आसे, हुन ऐ बलेसे कि मय तुचो काममन के जाने से, तुय जीवता तो बलाय सीस, मान्तर आसीत मरलोर।” 2 “जागरत हुआ, आउर हुन तीजमन के जोन बाकी बाचली से आउर जोन मेटतो ने आसे, हुनमन के मजबूत कर; कसनबल्लोने मय तुचो कोनी काम के आपलो माहापुरू चो लगे पुरा नी पावले।” 3 “ऐईकाजे सुरता कर कि तुय कसन सिक्या पावलीस आउर सुनु रईस, आउर हुन थाने बनु रा आउर मन फिराव। अगर तुय जागरत नी रसे तेबे मय चोर चो असन ऐयेंदे, आउर तुय केबीई नी जानुक सकसे कि मय कोन घड़ी तुचो थाने ऐऊन पडे़दें।” 4 “मान्तर हव, सरदीस ने तुचो थाने कितलो असन लोग आसोत जोनमन आपलो-आपलो फटीई अशुद्ध नी करला, हुनमन पंडरी फटीई पिन्दुन भाती मोचो संगे बुलदे, कसनबल्लोने हुनमन ऐ लायक आत।” 5 “जोन जय पावला हुनके असने परकार पंडरा फटीई पिंदादे, आउर मय हुनचो नाव जीवना चो किताब थानले कोनी रीति ले नी काटेंदे; मान्तर हुनचो नाव आपलो बुआ आउर हुनचो सरग दूतमन चो पुरे मानेंदे।” 6 “जेचो कान आसे हुन सुनो कि आत्मा कलीसियामन ले काय बलेसे।” फिलदिलफिया-बिश्वास लायक कलीसिया 7 “फिलदिलफिया चो कलीसिया चो दूत के ऐ लिक: जोन पवितर आउर सत आत, आउर जोन दाऊद चो कुची संगाऊ आय, जेचो उगाढ़लो बिती के कोनी बन्द नी करूक सकोत आउर बन्द करलो बिती के कोनी उगाढुक नी सकोत, हुन ऐ बलेसे, कि” 8 “मय तुचो काममन के जानेंसे; दक, मय तुचो पुरे गोटक कपाट उगाढुन संगाले से, जेके कोनी बन्द नी करूक सके; तुचो सामरत खिन्डिक असन तो आय, फेर बले तुय मोचो बचन चो पालन करली सीस आउर मोचो नाव चो इन्कार नी करलीस।” 9 “दक, मय शयतान चो हुन सभा बितामन के तुचो वश ने करून देयेंदे जोन यहूदी बनुन बसलासे, मान्तर आत नाई मान्तर फंद बोलु आत दक, मय असन करेंदे कि हुनमन ऐऊन भाती तुचो पाँयमन थाने घसरदे, आउर ऐ जानदे कि मय तुचो ले मया संगालेसे।” 10 “तुय मोचो धीरज चो बचन के थामली सीस, ऐईकाजे मय बले तुके परीक्षा चो हुन समया बचाऊन संगायदे जोन धरतनी थाने रतो बिता के परकतो काजे पुईतराय संवसार थाने ऐतो बिता आय।” 11 “मय झटके ऐतो बिता आंय; जोन काई तुचो लगे आसे हुनके थामुन रा कि कोनी तुचो मुकुट झिकुन नी धरो।” 12 “जोन जय पावला हुनके मय आपलो माहापुरू चो मंदिर ने गोटक खुटा बनायेंदे, आउर हुन फेर केबीई बाहरे नी निकरेदे; आउर मय आपलो माहापुरू चो नाव आउर आपलो माहापुरू चो नंगर बल्लोने नवा यरूशलेम चो नाव, जोन मोचो माहापुरू चो लगे ले सरग उपर ले उतरतो बिती आय, आउर आपलो नवा नाव हुन थाने लिकेन्दे।” 13 “जेचो कान आसे हुन सुनो कि आत्मा कलीसियामन ले काय बलेसे।” लौदीकिया-उसुम-उसुम कलीसिया 14 “लौदीकिया चो कलीसिया चो दूत के ऐ लिक: जोन आमीन आउर बिश्वास लायक आउर सत गोहई आय, आउर माहापुरू चो बनालोर मुल कारन आय, हुन ऐ बलेसे: कि” 15 “मय तुचो काममन के जाने से कि तुय ना तो करा आस आउर ना तपलो; अच्छा होती कि तुय करा नाहले तपलो होतीस।” 16 “ऐईकाजे कि तुय उसुम-उसुम आस, आउर ना करा आस आउर ना तपलो, मय तुके आपलो मुंह थाने उगाल तो थाने आसे।” 17 “तुय बले सीस कि मय धनी आय आउर सवकार होऊन गेलेसे आउर मोके कोनी तीज चो कमी निआय; आउर ऐ नी जानीस कि तुय अभागा आउर तुच्छ आउर कंगाल आउर काना आउर फटीई नाहलो आस।” 18 “ऐईकाजे मय तुके सहमती देयेंसे कि आईग ने तपालो बिती सोना मोचो ले घेन कि तुय धनी होऊन जा, आउर पंडरी फटीई धर कि पिन्दुन भाती तुके आपलो ढुमढापन चो लाज नी होओ, आउर आपलो आँईकमन ने लगातो काजे सुरमा धर कि तुय दकुक सक।” 19 “मय जोन-जोन के मया करू आंय, हुन सपाय के सिकाऊ आंय आउर ताड़ना देऊ आंय; ऐईकाजे टिव-टिव हो आउर मन फिराव।” 20 “दक, मय कपाट थाने उबा होऊन ठखठखायसे; अगर कोनी मोचो शब्द सुनुन भाती कपाट उगाढ़ेदे, तेबे मय हुनचो लगे भीतरे ऐऊन भाती हुनचो संगे भोजन करेंदे आउर हुन मोचो संगे।” 21 “जोन जय पावला मय हुनके आपलो संगे आपलो सिंघासन थाने बसायेंदे, जसन मय बले जय पाऊन भाती आपलो बुआ चो संगे हुनचो सिंघासन थाने बसले।” 22 “जेचो कान आसे हुन सुनो कि आत्मा कलीसियामन ले काय बलेसे।” |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation