प्रकाशितवाक्य 22 - Halbiजीवना पानी चो लंदी 1 फेर हुन मोके बिल्लोर चो असन झलक तो बिती, जीवना चो पानी चो लंदी दकालो, जोन माहापुरू आउर मेमना चो सिंघासन ले निकरून भाती 2 हुन नंगर चो सड़क चो मंजीगता बहते रली। लंदी चो ऐ पाट आउर हुनपाट जीवना चो रूक रये; हुन थाने बारा परकार चो फर फरते रये, आउर हुन हर मयना फरते रये; आउर हुन रूक चो पानमन ले जाति-जाति चो लोग चेंगा होते रओत। 3 फेर सराप नी होये दे, आउर माहापुरू आउर मेमना चो सिंघासन हुन नंगर ने होये दे आउर हुनचो दास हुनचो सेवा कर दे। 4 हुनमन हुनचो मुंह दक दे, आउर हुनचो नाव हुनमन चो कपारमन थाने लिकलोर होये दे। 5 फेर रात नी होये दे, आउर हुनमन के दीया आउर बेर चो उजर चो जरूरत नी होये दे, कसनबल्लोने परबु माहापुरू हुनमन के उजर देये दे, आउर हुनमन जुग-जुग राज करे दे। ईशु मसीह चो दुबारा ऐतोर 6 फेर हुन मोचो ले बल्लो, “ऐ गोठमन बिश्वास चो लायक आउर सत आय। परबु, जोन अगम गिआनीमन चो आत्मामन चो माहापुरू आय, आपलो सरगदूत के ऐईकाजे पठालो कि आपलो दासमन के हुन गोठमन, जेचो झटके पुरा होतोर जरूर आय, दकाओ।” 7 “दक, मय झटके ऐतो बिता आय! धन्य आय हुन, जोन ऐ किताब चो अगम गोठ चो गोठमन मानु आय।” 8 मय हुनी यूहन्ना आय, जोन ये गोठमन सुनते आउर दकते रलो। जिदलदाय मय सुनले आउर दकले, तेबे जोन सरगदूत मोके ऐ गोठमन दकाते रलो, मय हुनचो पाँयमन थाने पाँय पढ़तो काजे घसरुन पढ़ले। 9 मान्तर हुन मोचो ले बल्लो, “दक, असन नी कर; कसनबल्लोने मय तुचो, आउर तुचो भाई अगम गिआनीमन, आउर ऐ किताब चो गोठमन के मानतो बितामन चो संगवारी दास आय। माहापुरू के ची पाँय पढ़।” 10 फेर हुन मोचो ले बल्लो, “ऐ किताब चो अगम गोठ चो गोठमन के बन्द नी कर; कसनबल्लोने समया लगे आसे। 11 “जोन अनियाय करू आय, हुन अनियाय ची करते रओ, आउर जोन मईल आय, हुन मईल बुनुन रओ; आउर जोन धरमी आय, हुन धरमी बुनुन रओ; आउर जोन पवितर आय; हुन पवितर बनुन रओ।” ईशु मसीह कलीसिया काजे गोहई 12 “दक, मय झटके ऐतो बिता आय; आउर हरकोनी चो काम चो अनुसार पलटा देतो काजे करलो फल मोचो लगे आसे। 13 “मय अलफा आउर ओमेगा, मुयला आउर आखरी, आउर मुर आउर आखरी आंय।” 14 “धन्य हुनमन आत, जोन आपलो फटीई धोऊ आत, कसनबल्लोने हुनमन के जीवना चो रूक चो लगे ऐतोर अधिकार मिरे दे, आउर हुनमन कपाटमन ले होऊन भाती नंगर ने ओलदे।” 15 मान्तर कुकूरमन, आउर पंगनाहामन, आउर बेबीचारी, आउर हत्यारा आउर मुरती पुजा करू, आउर हरकोनी फंद के चाहतो बिता आउर गड़तो बिता बाहरे रये दे। 16 “मय ईशु आपलो सरगदूत के ऐईकाजे पठाले कि तुमचो पुरे कलीसियामन चो बारे ने ऐ गोठमन चो गोहई देओ। मय दाऊद चो मूल आउर बंश, आउर बिहान चो बरतो बिती तारा आय।” 17 आत्मा आउर दुली दुनो बले सोत, “आव!” “आउर सुनतो बिता बले बोलो,” “आव!” “जोन पिआस आसे हुन ऐओ, आउर जोन कोनी चाह ले हुन जीवन चो पानी सेंत मेंत धरो।” जनातोर 18 मय हरकोनी के, जोन ऐ किताब चो अगम गोठ चो गोठमन सुन आय, गोहई देयें से: अगर कोनी माने ऐ गोठमन ने काई बड़ा दे तेबे माहापुरू हुन बिपत्तिमन के, जोन ऐ किताब ने लिकलोर आसे, हुनचो उपरे बड़ाये दे। 19 आगर कोनी ऐ अगम गोठ चो किताब चो गोठमन थानले काई निकराय दे, तेबे माहापुरू हुन जीवन चो रूक आउर पवितर नंगर थानले, जेचो चरचा ऐ किताब ने आसे, हुनचो भाग निकराऊन देये दे। 20 जोन ऐ गोठमन चो गोहई देऊ आय हुन ऐ बोलु आय, “हव, मय झटके ऐतो बिता आय।” आमीन। हे परबु ईशु आव! 21 परबु ईशु चो अनुग्रह पवितर लोगमन चो संगे रओ। आमीन। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation