प्रकाशितवाक्य 21 - Halbiनवा रचना 1 “फेर मय नवा बादरी आउर नवा धरतनी के दकले, कसनबल्लोने पयला बादरी आउर पयला धरतनी जाते रये, आउर समुन्द बले नी रली।” 2 “फेर मय पवितर नंगर नवा यरूशलेम के सरग ले माहापुरू चो लगले उतरतोर दकले। हुन-हुन दुली चो असन रली जोन आपलो मुनुक चो काजे सिंगार करलोर रओ।” 3 “फेर मय सिंघासन थानले कोनी के बड़े जोर ले ऐ बोलतोर सुनले, दक, माहापुरू चो डेरा मानेमन चो मंजी ने आसे। हुन हुनमन संगे डेरा करे दे, आउर हुनमन हुनचो लोग हो दे, आउर माहापुरू खुद हुनमन संगे रये दे आउर हुनमन चो माहापुरू होये दे।” 4 “हुन हुनमन चो आँईकमन ले सपाय आँसु पुछुन देये दे; आउर ऐचो पाचे मरना नी रये दे, आउर ना शोक, ना बिलाप, ना दुखा रये दे; पयले चो गोठमन जाते रली।” 5 जोन सिंघासन थाने बसुन रये, हुन बल्लो, “दक, मय सपाय काई नवा करून देऊ आंय।” फेर हुन बल्लो, “लिकुन धर, कसनबल्लोने ऐ बचन बिश्वास चो लायक आउर सत आय।” 6 फेर हुन मोचो ले बल्लो, “ऐ गोठमन पुरा होली से। मय अलफा आउर ओमेगा, मुर आउर आखरी आंय। मय पिआसा के जीवना चो पानी चो सतान थानले सेंत मेंत पिआयें दें।” 7 “जोन जय पावला हुनी ऐ तीजमन चो हकदार होय दे; आउर मय हुनचो माहापुरू होयें दें, आउर हुन मोचो बेटा होय दे।” 8 “मान्तर डराहामन, आउर अबिश्वासीमन, आउर घिन-घिनामन, आउर हत्यारामन आउर बेबीचारीमन, आउर पंगनाहामन, आउर मुरती पुजा करूमन, आउर सपाय फंदीमन चो भाग हुन झील ने मिरे दे जोन आईग आउर गन्धक ले जरते रऊ आय: ऐ दुसर मरना आय।” मेमना चो दुली 9 फेर जोन सात सरग दूतमन चो लगे सात आखरी बिपत्तिमन ले भरलो बिती सात बटकामन रये, हुन थानले गोटक मोचो लगे ईलो, आउर मोचो संगे गोठयाऊन बल्लो, “ऐ घाई आव, मय तुके दुली बल्लोने मेमना चो बायले दकायें दें।” नवा यरूशलेम 10 तेबे हुन मोके आत्मा ने गोटक बड़े आउर डेंग डोंगरी थाने धरून निलो, आउर पवितर नंगर यरूशलेम के सरग ले माहापुरू चो लगे ले उतरतोर दकालो। 11 माहापुरू चो महिमा हुनमन थाने रली, आउर हुनचो उजर खुबे ची बड़े मोल्या पकना, बल्लोने बिल्लोर चो असन यशब चो असन सफाई रली। 12 हुनचो बाड़ा बड़े डेंग रली, आउर हुनचो बारा कपाट आउर कपाटमन थाने बारा सरगदूत रवत; आउर हुन कपाटमन थाने इस्राएलीमन चो बारा कुलमन चो नाव लिकलोर रली। 13 पूरब चो बाटे तीन कपाट, उतर चो बाटे तीन कपाट, दक्षिण चो बाटे तीन कपाट, आउर पश्चिम चो बाटे तीन कपाट रये। 14 नंगर चो बाड़ा चो बारा पायामन रली, आउर हुन थाने मेमना चो बारा पठालोबितामन चो बारा नाव लिकलोर रली। 15 जोन मोचो संगे गोठयाते रये हुनमन चो लगे नंगर आउर हुनचो कपाटमन आउर हुनचो बाड़ा के नापतो काजे गोटक सोना चो गज रये। 16 हुन नंगर गुलटिया बसुन रये आउर हुनचो लाम, ओसार बराबर रली; आउर हुन-हुन गज ले नंगर के नाप लो, तेबे साढ़े सात सव कोस चो निकरली: हुनचो लाम आउर ओसार आउर डेंग बराबर रये। 17 हुन हुनचो बाड़ा के माने चो बल्लोने सरगदूत चो नाप ले नाप लो, तेबे एक सव चवालीस हाथ निकरली। 18 हुनचो बाड़ा यशब चो बनुन रली, आउर नंगर असन शुद्ध सोना चो रये जोन सफाई कांच चो असन होओ। 19 हुन नंगर चो पाँयामन हर परकार चो बड़े मोल चो पकनामन ले सजारलोर रली; पयला पाया यशब चो, दुसर पाया नीलमणि चो, तीसर लालड़ी चो, चवथा मरकत चो, 20 पांचवां गोमेदक चो, छठवां माणिक्य चो, सातवां पीतमणि चो, आंटवा पेरोज चो, नवा पुखराज चो, दसवां लहसनिए चो, गियारवां धूम्रकान्त चो, आउर बारवां याकूब चो रली। 21 बारों कपाट बारा मोतीमन चो रये; गोटक-गोटक कपाट गोटक-गोटक मोती चो बनुन रये। नंगर चो सड़क सफाई कांच चो असन शुद्ध सोना चो रली। नवा यरूशलेम चो महिमा 22 मय हुन थाने कोनी मंदिर नी दकले, कसनबल्लोने सर्वशक्तिमान परबु माहापुरू आउर मेमना हुनचो मंदिर आत। 23 हुन नंगर ने बेर आउर जोन चो उजर चो जरूरत निआय, कसनबल्लोने माहापुरू चो तेज ले हुन थाने उजर होये से, आउर मेमना हुनचो दीया आय। 24 जाति-जाति चो लोग हुनचो उजर ने चला बुला हो दे, आउर धरतनी चो राजा आपलो-आपलो तेज चो समान हुन थाने आनदे। 25 हुनचो कपाट दिन ने केबीई बन्द नी होये दे, आउर राती हुता नी होये। 26 लोग जाति-जाति चो तेज आउर वयभव चो समान हुन थाने आनदे। 27 मान्तर हुन थाने कोनी अशुद्ध तीज, नाहले घिन-घिना काम करतो बिता, नाहले फंद के बनातो बिता कोनी रीति ले नी ओले, मान्तर मात्र हुन लोग जोनमन चो नाव मेमना चो जीवना चो किताब ने लिकलोर आसे। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation